އަންނަ އަހަރުގެ ލޯކަލް ކައުންސިލު އިންތިހާބަށް ރައްތަކާއި ސިޓީތަކުގެ އާބާދީތަކުގެ މައުލޫމާތު އާންމުކޮށްފި

2026 ވަނަ އަހަރު ބޭއްވުމަށް ހަމަޖެހިފައިވާ ލޯކަލް ކައުންސިލުތަކުގެ އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިހާބަށް ރަށްތަކާއި ސިޓީތަކުގެ އާބާދީގެ މައުލޫމާތު އިލެކްސަންސް ކޮމިޝަނުން އާންމުކޮށްފައެވެ.

ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގެ ދަށުން، އިންތިހާބު ބޭއްވުމުގެ ކުރިން މި މައުލޫމާތުތައް އާންމުކުރުމަކީ އިލެކްޝަންސް ކޮމިޝަންގެ ޒިންމާއެކެވެ. މިގޮތުން އީސީން ވަނީ މިދިޔަ މަހުގެ 30 ގެ ނިޔަލަށް ހުރި އާބާދީގެ މައުލޫމާތު ހުކުރު ދުވަހު އާންމުކޮށްފައެވެ.

ޤާނޫނު ނަންބަރު 2010/7 (ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނު) ގައިވާގޮތުގެމަތީން، 2025 ސެޕްޓެންބަރު 30 ގެ ނިޔަލަށް، ދިވެހިރާއްޖޭގެ ރަށްތަކާއި، ސިޓީތަކުގެ ޖުމުލަ އާބާދީ ގެ މަޢުލޫމާތު، ގަވާއިދު ނަންބަރު 2019/R-1086 (ލޯކަލް ކައުންސިލްތަކުގެ އިންތިޚާބާއި، އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބުގެ އިންތިޚާބީ ދާއިރާތައް ކަނޑައެޅުމާބެހޭ ގަވާއިދު) ގައިވާ ގޮތުގެމަތީން ތިރީގައި ބަޔާންކޮށްފައި އެވަނީއެވެ. އެހެންކަމުން، ލޯކަލް ކައުންސިލްތަކާއި، އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކަށް މެންބަރުން އިންތިޚާބުކުރުމުގައި ބަލާނީ، ޤާނޫނު ނަންބަރު 7/2010 (ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނު) ގައިވާ ގޮތުގެމަތީންނެވެ.

އިލެކްޝަންސް ކޮމިޝަން

އާންމުކުރެވުނު މައުލޫމާތުތަކަށް ބަލާއިރު، މާލޭ ސިޓީގައި 83،813 މީހުން ރަޖިސްޓަރީ ވެފައި ވާއިރު، އައްޑޫ ސިޓީގައި 35،549 މީހުން ރަޖިސްޓަރީ ވެފައިވެއެވެ. އަދި ކުޅުދުއްފުށީ ސިޓީގައި 11،110 މީހުންނާއި ތިނަދޫ ސިޓީގައި 10،453 މީހުން ރަޖިސްޓަރީ ވެފައިވާ ކަން ފާހަގަކުރެވެއެވެ.

ސިޓީތައް ފިޔަވައި އެހެނިހެން ރަށްރަށުގެ ތެރެއިން އެންމެ ބޮޑު އާބާދީއެއް ރަޖިސްޓަރީ ވެފައި ވަނީ ޅ. ނައިފަރުގައެވެ. އެރަށުގައި 5،878 މީހުން ރަޖިސްޓަރީ ވެފައިވާއިރު، ލ. ގަމުގައި 5،523 މީހުންނާއި، ޅ. ހިންނަވަރުގައި 5،092 މީހުންނާއި، ރ. ދުވާފަރުގައި 5،037 މީހުން ރަޖިސްޓަރީ ވެފައިވެއެވެ.

https://www.elections.gov.mv/announcements/363

އަންނަ އަހަރުގެ އިންތިހާބުގެ ކުރިން ސަރުކާރުން ވަނީ ލާމަރުކަޒީ ގާނޫނަށް އިތުރު އިސްލާހުތަކެއް ގެނައުމަށް ރައްޔިތުންގެ މަޖިލީހަށް ބިލެއް ހުށަހެޅުމަށް ނިންމާފައެވެ. މި އިސްލާހުތަކުގެ ތެރޭގައި އަތޮޅު ކައުންސިލުތައް އުވާލުމާއި، ރަށު ކައުންސިލުތަކުގެ މެންބަރުންގެ އަދަދު ދަށްކުރުން ހިމެނެއެވެ.

މީގެއިތުރުން، އައްޑޫ ސިޓީ ކައުންސިލުގެ އޮނިގަނޑަށް ބަދަލު ގެނައުމާ ގުޅޭގޮތުން ރައްޔިތުންގެ ހިޔާލު ހޯދުމަށް މި މަހުގެ 25 ވަނަ ދުވަހު ވޯޓެއް ނެގުމަށް ވަނީ ހަމަޖެހިފައެވެ. މި ވޯޓަކީ ހުޅުދޫ، މީދޫ އަދި ފޭދޫގައި ވަކިވަކި ކައުންސިލުތައް އުފެއްދުމާމެދު ރައްޔިތުންގެ ހިޔާލު ހޯދުމަށް ނެގޭ ވޯޓެކެވެ.