މެސީ ޕީއެސްޖީ އަށް އިހްތިރާމެއް ނުކުރޭ: ކުލަބުގެ ވެރިޔާ

ޕީއެސްޖީ އަށް ކުޅުނު އާޖެންޓީނާގެ ކެޕްޓަން ލަޔޮނަލް މެސީ އެކުލަބަށް އިހްތިރާމް ނުކުރާ ކަމަށް ޕީއެސްޖީން ބުނެފި އެވެ.

އެކުލަބުގެ ރައީސް އަދި ގަތަރުގެ މަހުޖަނު ނަސީރު އަލް ހެއްލައިފީ މިހެން ވިދާޅުވީ ޕީއެސްޖީއަށް ކުޅުނު ދުވަސްވަރު އެކުލަބުން ކަންތައްތައް ކޮށްފައިވަނީ އެންމެ އެދެވޭ ގޮތަށް ނޫން ކަމަށް މެސީ ބުނަމުންދާތީ އެވެ.

މިކަމާ ހިތްހަމަނުޖެހުން ފާޅުކުރައްވާ ހެއްލައިފީ ވިދާޅުވީ ޕީއެސްޖީގައި ހުރެ ނުދައްކާ ވާހަކަ ކުލަބުން ދިއުމަށްފަހު ދެއްކުން ރަނގަޅުނޫން ކަމަށެވެ. އަދި އެއީ އޭނާ އަށް ބަލައިގަނެވޭނެ ކަމެއްނޫން ކަމަށާއި މިއީ އިހްތިރާމް ނުކުރުން ކަމަށެވެ.

ނަމަވެސް އޭނާ ވިދާޅުވީ 2022ގެ ވޯލްޑްކަޕް މެސީ ކާމިޔާބު ކުރުމުން އެކަން ފާހަގަ ކުރަން ދަނޑުގައި ރަސްމިއްޔާތެއް ނުބޭއްވުނީ ސަބަބުތަކެއް ހުރުމުން ކަމަށެވެ.

ހެއްލައިފީ އިތުރަށް ވިދާޅުވީ ދަނޑުގައި ބޮޑު ރަސްމިއްޔާތެއް ނުބޭއްވުނަސް މެސީ އަށް މަރުހަބާކިޔައި ވޯލްޑްކަޕުގެ ކާމިޔާބީ ފާހަގަކުރި ކަމަށެވެ.

ނަމަވެސް މެސީ ބުނީ ވޯލްޑްކަޕް ކާމިޔާބުކުރި އާޖެންޓީނާގެ ކުޅުންތެރިންނާއި އޮފިޝަލުގެ ތެރެއިން އެ ކާމިޔާބީ ކުލަބުގައި ފާހަގަކުރަން ފުރުސަތު ނުލިބުނު ހަމައެކަނި މީހަކީ އޭނާ ކަމަށެވެ.