ބެކެމްބާއު މަރުވުން: މިހާތަނަށް ބާއްވާ އެންމެ ބޮޑު ޖަނާޒާ ބަޔާންގެ ދަނޑުގައި
11 ޖެނުއަރީ 2024 | ބުރާސްފަތި 06:14ޖަނާޒާ އޮންނާނީ ބަޔާންގެ ދަނޑު އެލިއާންޒް އެރީގައި ހުކުރު ދުވަހު
ފްރާންޒް ބެކެމްބާއުގެ ތައުޒިޔާގެ ފޮތުގައި ބަޔާންގެ ބައެއް ފަރާތްތަކުން ސޮއިކުރަނީ
ޖަރުމަނާއި ބްޔާން މިއުނިކްގެ ލެޖެންޑް ފްރާންޒެ ބެކެމްބާއުގެ ޖަނާޒާވާނީ މިހާތަނަށް ފުޓްބޯޅަ ޝަހުސިއްޔަތަކަށް ބާއްވާ އެންމެ ބޮޑު ޖަނާޒާ އަށް ކަމަށް އޭނާގެ ކުލަބު ބަޔާން މިއުނިކުން ބުނެފި އެވެ.
އޭނާގެ ޖަނާޒާ ބާއްވާނީ އަންނަ ހަފުތާގެ ހުކުރު ދުވަހު ބަޔާންގެ ދަނޑު ކަމަށްވާ އެލިއާންޒް އެރީނާގަ އެވެ. މި ޖަނާޒާގައި ދުނިޔެ އާއި ޖަރުމަނުގެ ލީޑަރުންނާއި ކުޅުންތެރިންނާއި ފުޓްބޯޅަ ލެޖެންޑުންނާއި ރަހުމަތްތެރިންނާއި އާއިލާގެ މެމްބަރުން ބައިވެރިވާނެ އެވެ.
ބަޔާން މިއުނިކުން ބުނީ ބެކެމްބާއު އަކީ އެކުލަބުގެ އެންމެ އަގުހުރި ޝަހުސިއްޔަތު ކަމަށާއި އެންމެ ފަހުގެ އިހްތިރާމް އަދާކުރުމަށް ބޮޑު ރަސްމިއްޔާތެއް ބާއްވަން ކުލަބުން ބޭނުންވަނީ އޭނާގެ ހިދުމަތަށް ޝުކުރުވެރިވުމުގެ ގޮތުން ކަމަށެވެ. އަދި މިފަދަ ބޮޑު ޖަނާޒާއެއް ބޭއްވުމަށް އެކުލަބުގެ ރައީސް ކާލް ހެއިންޒް ރުމެނިގޭ އާއި ކުލަބުގެ ކުރީގެ ރައީސުންނާއި އިސްވެރިން މަޝްވަރާކޮށްފައިވާ ކަމަށެވެ.
ކުޅުންތެރިއެއްގެ ގޮތުންނާއި ކޯޗެއްގެ ގޮތުން ވޯލްޑްކަޕް ކާމިޔާބުކުރި ބެކެމްބާއު މަރުވީ އުމުރުން 78 އަހަރުގައި މިދިޔަ އަންގާރަ ދުވަހު އެވެ. އޭނާ އަކީ ޖަރުމަނުގައި 2006 ވަނަ އަހަރު ބޭއްވި ވޯލްޑްކަޕް އޮގަނަޒިން ކޮމިޓީގެ ޗެއާމަނެވެ. އޭނާ ވަނީ ބަޔާން އަށް ގިނަ ކާމިޔާބީތަކެއް ކުޅުންތެރިއެއް އަދި ކޯޗެއްގެ ގޮތުން ހޯދައިދިނުމަށްފަހު އެކުލަބުގެ ރައީސްކަން ވެސް ކޮށްފަ އެވެ.
ބަޔާންގެ ބަޔާނުގައި ބުނެފައިވަނީ އެކުލަބު މިހާރު މިދެކޭފަދަ ވަރުގަދަ ކުލަބަކަށް ބެކެމްބާއު ނުލައި ނުވީސް ކަމަށެވެ.
