މިނިސްޓަރުން ފެންވަރުގެ 45 ބޭފުޅުންނެވެ. ފަހަރެއްގައި ސަރުކާރުން ބުނެފާނެއެވެ. ކެބިނެޓްގައި ތިއްބަވަނީ 22 މިނިސްޓަރުން ނޫންތޯއެވެ؟ މި އަދަދު އައި ގޮތްވެސް ދަންނަވާލާނަމެވެ. ކެބިނެޓްގައި ހިމެނިވަޑައިގަންނަވާ ވަޒީރުންގެ އިތުރުން، ސީނިއާ މިނިސްޓަރެއްގެ ގޮތުގައި އައްޔަންކުރައްވާފައިވާ ބޭފުޅަކާއި، މިނިސްޓަރު ފެންވަރުގައި އައްޔަންކުރައްވާފައިވާ 20 ބޭފުޅުން އަދި އެޑްވައިޒަރުންގެ ގޮތުގައި ތިއްބެވި 2 ބޭފުޅުންނެވެ. ހައްތަހާވެސް މިނިސްޓަރުންގެ ފެންވަރުގައި އައްޔަންކުރައްވާފައިވާ ބޭފުޅުންނެވެ. ޑެޕިއުޓީ މިނިސްޓަރުންގެ ގޮތުގައި 152 ބޭފުޅުންނެވެ. ސްޓޭޓް މިނިސްޓަރުންގެ ފެންވަރުގައި 88 ބޭފުޅުންނެވެ. މަތި ބަރެއް ނުވިއެއް ނޫންތޯއެވެ؟
މި ސަރުކާރުގެ ސިޔާސީ މަގާމްތަކުގެ އަދަދު މިވީ ކުޑަ ދުވަސްކޮޅުގެ ތެރޭގައި މި ވަނީ އިންތިހާ އަށް އިތުރުވެފައެވެ. މަތި ލުއި ސަރުކާރެއް ދެއްކުމަށް ވީ ވައުދު ފުއްދޭ ތަނެއް ނުފެނެއެވެ. ހަމައެކަނި މީހުން ގިނައީކީ އެއް ނޫނެވެ. މަޤާމުތަކަށް އައްޔަން ކުރާ މީހުންގެ ފެންވަރު ދަށްވެފައި ސިޔާސީ ކަންކަމަށް އަލެވެ. ދައިރާގެ ތަޖުރިބާ މަދުވެފައި ތަންދޮރު ނުދަންނަ މީހުން ވެސް އެހާ ގިނަ އެވެ.
ކޮންމެއަކަސް ސިޔާސި މަޤާމުތައް ގިނަވެ އާއްމުންގެ ފާޑުކިޔުން ސަރުކާރަށް އަމާޒުވާން ފަށައިފިއެވެ. އެއާ އެކު ގިނަބައެއްގެ ފާޑުކިޔުން ސަރުކާރަށް އަމާޒުވެއްޖެއެވެ. ސިޔާސީ މަޤާމްތައް މަދުކުރުމުގެ ބަދަލުގައި ކުރައްވަން ފެއްޓެވި ކަމަކީ ފަތްކޮޅު އެރުވުމަކާ ނުލާ މަޤާމްތައް ދެއްވަން ފެށުމެވެ. މި މަޤާމްތައް މިހާރު ދެއްވަމުން ދަނީ އާންމުކޮށް އިއުލާން ކުރުމަކާއި ނުލާ ސިއްރިއްޔާތުގައޭ ބުނުމަކީ ދޮގަކަށް ނުވާނެއެވެ. މިއީ މީގެ ކުރިން ދުވަހަކުވެސް ފެނުނު މަންޒަރެއް ނޫނެވެ.
ރައީސް އޮފީހުގެ ވެބްސައިޓަށް ބަލާލުމުން ސާފުކޮށް އެނގޭ ކަމަކީ އިޢުލާން ނުކޮށް ފަތްކޮޅު އެރުވިކަން ނާންގާ އެތައް ބަޔަކު މަޤާމްތަކަށް އައްޔަންކޮށްފައިވާކަމެވެ. އެކަން އެގޮތަށް ކުރައްވާ ސަބަބެއް ސަރުކާރުން ހާމަކުރައްވާފައި ނެތް އިރު މިއީ ކުރިން އެއްވެސް ސަރުކާރުން ކުރައްވާފައިވާ ކަމެއް ނޫނެވެ.
މަޤާމްތައް ދެއްވާފައިވާ ބޭފުޅުންގެ ތެރޭގައި އެމްއެންޕީ، ޕީއެންސީ، ޕީޕީއެމްގެ ބޭފުޅުން ހިމެނެއެވެ. މީގެ ކުރީގައި ސްޓޭޓް މިނިސްޓަރުގެ މަޤާމަށް އަބަދުވެސް ފަތްކޮޅު ހަވާލުކުރައްވައެވެ. އެ އުސޫލާއި ޚިލާފަށް ސަރުކާރުން މިހާ ސިއްރިއްޔާތުގައި އެކަން ކުރާ ސަބަބާއި މެދު ސުވާލު އުފެދެއެވެ. އެއީ ސިޔާސީ މަޤާމްތައް ގިނަ ވުމުން ކިޔާ ފާޑުކިޔުން އިތުރުވެދާނެތީ ނޫންބާއޭ ހިތަށް އަރައެވެ. އަދި ކުރިއަށް އޮތްތަނުގައި ވެސް މި ސިޔާސީ މަޤާމްތަކަށް މީހުން އައްޔަންކުރުން މަދުވާތަނެއް ނުފެނެއެވެ. އެކަން ވަނީ ހައްތަހާ އިތުރެވެ.
