މަލްޓީ ޕާޓީ ޑިމޮކްރަސީ ހަރުދަނާކޮށް ކުރިއެރުވުމަށް އީޔޫން 20 ލަފާ ހުށަހަޅައިފި

ރާއްޖޭގެ މަލްޓި ޕާޓީ ޑިމޮކްރަސީ ޚަރުދަނާކޮށް ކުރިއެރުވުމަށް ޔޫރަޕިއަން ޔޫނިއަން އިލެކްޝަން އޮބްޒަރވޭޝަން މިޝަންއިން 20 ލަފައެއް ހުށަހަޅައިފިއެވެ.

ސެޕްޓެމްބަރ މަހުގެ 9 އަދި 30 ވަނަ ދުވަހު ބޭއްވި ރިޔާސީ އިންތިޚާބާބެހޭ ގޮތުން އީޔޫގެ އިލެކްޝަން އޮބްޒަރވޭޝަން މިޝަން (އީޔޫ އީއޯއެމް)އިން ވަނީ ފައިނަލް ރިޕޯޓް މިހާރު ޝާއިއުކޮށްފައެވެ. 11 ހަފުތާގެ މުއްދަތަކަށް ބަހާލައިގެން ކުރިޔަށްގެންދިޔަ އޮބްޒަރވޭޝަނަށްފަހު އީޔޫ އީއޯއެމްގެ ހޯދުންތަކާއި ލަފާތައް ރިޕޯޓުގައި ހިމަނާފައިވެއެވެ.

މިޝަނުން ފާހަގަކޮށްފައިވާ ކަންކަމުގެ ތެރޭގައި؛ ސިޔާސީ އަދި ކެމްޕެއިން ފަންޑް ރެއިޒިންގއާއި، މާލީ ޚަރަދުތަކުގެ ދެ ފުށް ފެންނަ އަދި ހަރުދަނާ ގޮތެއްގައި ބެލެހެއްޓިފައެއް ނުވެއެވެ. އީޔޫ އީއޯއެމްއިން (ޕަބްލިކް ސަރވިސް މީޑިޔާ ހިމެނޭ ގޮތަށް) މީޑިޔާގެ ސިޔާސީ ޕާޓިޝަން ރެކޯޑްކޮށްފައިވާއިރު، ސޯޝަލް މީޑިޔާގައި މައުލޫމާތު އޮޅުވާލާފައިވާކަމުގެ މައުލޫމާތު ލިބިފައިވާކަމަށް ބުނެފައިވެއެވެ.

ކުރިޔަށް އޮތް އިންތިޚާބުތައް ކުރިއެރުވުމުގެ މަގުސަދުގައި އީޔޫ އީއޯއެމްއިން ކަމާބެހޭ ފަތާތްތަކަށް 20 ލަފައެއް ހުށަހަޅާފައިވާއިރު، އޭގެތެރޭގައި އިސްކަންދޭ ހަތް ދާއިރާއެއް ހިމެނެއެވެ.

އެ ދާއިރާތަކަކީ:

މި ރިޕޯޓާ ގުޅޭގޮތުން މައުލޫމާތު ދިނުމަށް ބޭއްވި ނޫސްވެރިންގެ ބައްދަލުވުމުގައި ޔޫރަޕިއަން ޕާލަމަންޓްގެ މެމްބަރު، ޗީފް އޮބްޒާވަރ މިސްޓަރ ނަޗޯ ސަންޗޭޒް އަމޯރް ވިދާޅުވީ ރިޔާސީ އިންތިޚާބަކީ ޓެކްނިކަލް ގޮތުން ވަރަށް ރަނގަޅަށް ހިންގައި ޕްރޮފެޝަނަލްކޮށް އިލެކްޝަންސް ކޮމިޝަނުން ކުރިޔަށް ގެންދިޔަ އިންތިޚާބެއްކަމަށެވެ. ހަގީގީ އިންތިޚާބެއް ބޭއްވޭނެގޮތަށް ގާނޫނީ އޮނިގަނޑުގެ އިންތިޒާމު ވަނީ ހަމަޖައްސާފައިކަމަށް ވިދާޅުވިއެވެ.

ސިޔާސީ ވާދަވެރިކަމުގައި އަންހެނުން ފެންނަ މިންވަރު ދަށްކަމަށާއި އިންތިޚާބު ހިންގުމުގައިވެސް އަންހެނުންގެ ބައިވެރިވުން ކުޑަކަން ވަނީ ފާހަގަކޮށްފައެވެ. މީގެއިތުރުން ވޯޓު ގަތުމާއި ޕަބްލިކް އޮފީސް އިންސްޓްރޫމެންޓަލައިޒޭޝަންގެ އުސޫލުތަކާއި ކެމްޕެއިންކުރުމުގަައި ހަމަހަމަކަމާއި އިންސާފުވެރިކަމަށް އުނިކަން އަންނަ ކަންކަން ވެފައިވާކަން ފާހަގަކުރެއްވިއެވެ.

ރާއްޖޭގެ އިލެކްޝަންސް ކޮމިޝަނާއި ފޮރިން މިނިސްޓްރީގެ ދައުވަތަކަށް އީޔޫ އީއޯއެމްގެ މަސައްކަތްތައް ކުރިޔަށް ގެންގޮސްފައިވަނީ މިދިޔަ އަހަރުގެ ޖުލައި 31ން އޮކްޓޯބަރ 15އަށެވެ. މި މިޝަނުގައި އީޔޫގެ މެމްބަރު 18 ގައުމެއްގެ އިތުރުން، ޕާޓްނަރ ގައުމުތައް ކަމުގައިވާ ކެނެޑާ، ނޯވޭ އަދި ސްވިޒަލެންޑުން ޖުމްލަ 40 އޮބްޒަރވަރުން އެކްރެޑިޓްކޮށްފައިވެއެވެ.