ގައުމުތަކާއެކު އޮންނަ ގުޅުމަށް އަސަރުކުރުމަކީ ފަތުރުވެރިކަމުގެ މާކެޓަށް ވެސް އަސަރުކުރާނެ ކަމެއް - ޑރ.މައުސޫމް
ފަތުރުވެރިކަމުގެ ގުޅުންތައް މިހާރަށް ވުރެ ރަނގަޅުވާ މަންޒަރު ފެނިގެންދާނެ ކަމަށް އުންމީދުކުރައްވާ ކަމަށް ޑރ.މައުސޫމް ވިދާޅުވި
ކުރީގެ ޓުއަރިޒަމް މިނިސްޓަރު ޑރ. އަބްދުﷲ މައުސޫމް
ސަރުކާރާއި ފަރުދީ ފެންވަރުގައި ގައުމުތަކުގެ މެދުގައި އޮންނަ ގާތް ގުޅުމަކީ ދުޅަހެޔޮ ފަތުރުވެރިކަމަކަށް އޮންނަ ބިންގާ ކަމަށާއި އެހެންކަމުން ގައުމުތަކާއެކު އޮންނަ ގުޅުމަށް އަސަރުކުރުމަކީ ފަތުރުވެރިކަމުގެ މާކެޓަށް ވެސް އަސަރުކުރާނެ ކަމެއްކަމަށް ކުރީގެ ޓުއަރިޒަމް މިނިސްޓަރު ޑރ. އަބްދުﷲ މައުސޫމް ވިދާޅުވެއްޖެއެވެ.
އެކްސްގައި ކުރެއްވި ޕޯސްޓެއްގައި ޑރ.މައުސޫމް ވިދާޅުވީ އިންޑިއާ ސަރުކާރާއި ރާއްޖޭގެ ސަރުކާރާ ދެމެދާއި ރައްޔިތުންނާއި ވިޔަފާރިތަކުގެ މެދުގައި އޮންނަ ގުޅުމަކީ ފަތުރުވެރިކަމަށް މުހިންމު ގުޅުމެއް ކަމަށެވެ. އަދި އެފަދަ ކަންކަމަށް އަސަރުކުރުމަކީ ފަތުރުވެރިކަމުގެ މާކެޓަށް ވެސް އަސަރުކުރާނެ ކަމެއްކަން ޑރ.މައުސޫމް ފާހަގަކުރެއްވިއެވެ.
އިންޑިއާ އަކީ ނިމިދިޔަ 4 އަހަރު ރާއްޖޭގެ ފަތުރުވެރިކަމުގެ ލީޑް މާކެޓްކަން ފާހަގަކުރައްވާ އެނާ ވިދާޅުވީ އެ މާކެޓަކީ އަދިވެސް އިތުރަށް ކުރިއެރުމުގެ ފުރުސަތު އޮތް މާކެޓެއް ކަމަށެވެ. އަދި އިންޑިއާގެ މާކެޓަކީ ހޭދަކުރުމުގެ ހަކަތަ ވަަރަށް ބޮޑަށް އޮތް ޤައުމެއް ކަމަށް ވެސް ޑރ.މައުސޫމް ވިދާޅުވިއެވެ.
މީގެ އިތުރުން އިންޑިއާގެ ބޮޑުވަޒީރު ނަރެންދްރަ މޯދީގެ ފަތުރުވެރިކަމުގެ ވިޝަނަކީ ރާއްޖެ ހިމެނޭހެން ދެކުނު އޭޝިއާގެ ފަތުރުވެރިކަަމަށް ފައިދާވާނެ ވިޝަނެއް ކަމަށް ޑރ.މައުސޫމް ވިދާޅުވިއެވެ. އެހެންކަމުން ސަރުކާރުގެ ބައެއް ޑެޕިއުޓީ މިނިސްޓަރުން އިންޑިއާ އާއި އިންޑިއާގެ ބޮޑުވަޒީރަށް މަލާމަތްކޮށް ދަށު ދަރަޖައިގެ ވާހަކަތަކެއް ދެއްކުމަކީ އެއްގޮތަކަށް ވެސް ބަލައިގަނެވޭނެ ކަމެއް ނޫން ކަމަށް އޭނާ ވިދާޅުވިއެވެ.
އަދި މިހާރުގެ ސަރުކާރުން އެކަމާއި މާބޮޑު އިޖާބައެއް ދޭތަން ފެނިގެން ނުދާ ކަމަށާއި އެއީ ހިތާމަކުރައްވާ ކަމެއް ކަމަށް ވެސް ޑރ.މައުސޫމް ވިދާޅުވިއެވެ. ކުރީގެ ޓުއަރިޒަމް މިނިސްޓަރު އިތުރަށް ވިދާޅުވީ ސުލްހަވެރިކަމާއެކު ކުރިއަށް ގޮސް ރާއްޖޭގެ ފަތުރުވެރިކަމުގެ ގުޅުންތައް މިހާރަށް ވުރެ ރަނގަޅުވާ މަންޒަރު ފެނިގެންދާނެ ކަމަށް އުންމީދުކުރައްވާ ކަމަށެވެ.
