2023ގެ ފަހު ޓާމް ނިމޭނީ އެޕްރީލްގައި، މިއަހަރުގެ ދިރާސީ އަހަރު ފެށޭނީ މެއި މަހު

2023 ވަނަ އަހަރުގެ ފަހު ޓާމް ނިމޭނީ އެޕްރީލްގައި ކަމަށާއި، މިއަހަރުގެ ދިރާސީ އަހަރު ފެށޭނީ މެއި މަހުގެ ތެރޭގައި ކަމަށް އެޑިއުކޭޝަން މިނިސްޓްރީން ބުނެފިއެވެ.

އެޑިއުކޭޝަން މިނިސްޓްރީން އިސްލާހުކޮށް ނެރެފައިވާ 2023-2024 ވަނަ އަހަރުގެ ދިރާސީ އަހަރުގެ ކަލަންޑަރުގައި ބުނެފައިވަނީ ހިނގަމުން މިދާ ދިރާސީ އަހަރުގެ ދެވަނަ ޓާމުގެ ކިޔެވުން ނިމޭނީ އޭޕްރީލް 30 ވަނަ ދުވަހުއެވެ. ކުރިން ދެވަނަ ޓާމުގެ ކިޔެވުން ނިމޭގޮތަށް އޮތީ 13 ޖޫން 2024 ގައެވެ. މިހާރު ހިނގަމުންދާ 2023-2024 ގެ ދިރާސީ އައު އަހަރު ފެށީ 8 އޮގަސްޓް 2023 ގައެވެ.

2023/2024 ގެ ދެ ވަނަ ޓާމް 7 ޖެނުއަރީ 2024ން ފެށިގެން އޭޕްރީލް 30 ވަނަ ދުވަހަށް ނިންމުމަށް ވަނީ ބަދަލު ގެނެސްފައެވެ. އަދި 2024/2025 ގެ ދިރާސީ އައު އަހަރު 26 މެއި 2024ން ފެށިގެން 20 ފެބްރުއަރީ 2025ށް ކުރިއަށް ގެންދާގޮތަށް ވަނީ ހަމަޖައްސާފައެވެ.

2025 ގެ ދިރާސީ އައު އާހަރު 9 މާޗް 2025 އިން ފެށިގެން 18 ޑިސެމްބަރު 2025ށް ގެންދާގޮތަށް ވަނީ ބަދަލު ގެނެސްފައެވެ.

މީގެ އިތުރުން 2024/2025ގެ ދިރާސީ އައު އަހަރުގެ ކިޔެވުން ފެށުމަށް ޓީޗަރުން ސްކޫލްތަކަށް ރިޕޯޓްކުރަން ޖެހޭނީ 22 މެއި 2024 ގައެވެ. އަދި ދިރާސީ އައު އަހަރުގެ ކިޔެވުން ފެށޭނީ 26 މެއި 2024 ގައެވެ. ދިރާސީ އައު އަހަރުގެ ކިޔެވުން ކުރިން ފަށާގޮތަށް އޮތީ 31 ޖުލައި 2024 ގައެވެ.

ދިރާސީ އަހަރުގެ ކަލަންޑަރަށް ބަދަލު ގެނެސްފައި މިވަނީ 2026 ވަނަ އަހަރުން ފެށިގެން ދިރާސީ އަހަރުގެ ކިޔެވުން ކުރިން އޮތް ގޮތަށް ޖެނުއަރީގައި ފެށުމަށް ރައީސް ޑރ. މުހައްމަދު މުއިއްޒުގެ ސަރުކާރުން ނިންމާފައިވާތީ އެކަމަށް ތައްޔާރުވުމުގެ ގޮތުންނެވެ.

ކޮވިޑުގެ ސަބަބުން ރާއްޖޭގެ ތައުލީމީ ދިރާސީ އަހަރުގެ ފެށުން އޮގަސްޓަށް ބަދަލުކުރީ ކުރީގެ ރައީސް އިބްރާހީމް މުހައްމަދު ސާލިހުގެ ސަރުކާރުގައި، 2021 ވަނަ އަހަރުއެވެ. އެގޮތުން އޭރު އެގޮތަށް ނިންމީ ކޮވިޑުގެ ސަބަބުން ދަރިވަރުންގެ ކިޔެވުމާއި އިމްތިހާނުތަކަށް އައި ބަދަލުތަކާއެކު، ފަތުރުވެރިކަމުގެ ދާއިރާގެ ވަރަށް ގިނަ ބައެއް އެދުމުގެ މަތިންނެވެ.