މުޅި ގައުމު ނަޖިސްކޮށްފައިވާ ވެރިކަމަށް ނޫނެކޭ ބުނާނެ ފުރަތަމަ ފުރުސަތުގައި ރައްޔިތުން އެކަންކޮށްދިނުމަށް އާޒިމް އެދިވަޑައިގެންފި

މުޅި ގައުމު ނަޖިސްކޮށްފައިވާ ވެރިކަމަށް ނޫނެކޭ ބުނާނެ ފުރަތަމަ ފުރުސަތުގައި ރައްޔިތުން އެކަންކޮށްދިނުމަށް މާލެ ސިޓީގެ މޭޔަރުކަމަށް ކުރިމަތިލައްވާފައިވާ އެމްޑީޕީގެ ކެންޑިޑޭޓް އާދަމް އާޒިމް ވިދާޅުވެއްޖެއެވެ.

އާޒިމްގެ ކެމްޕޭން ހަރަކާތްތަކުގެ ތެރެއިން ހޯމަ ދުވަހުގެރޭ ބޭއްވި ގަލޮޅު ކަންމަތީ ޖަލްސާގައި ވާހަކަފުޅު ދައްކަވަމުން އާޒިމް ވިދާޅުވީ މިއަދު ތިބެން މިޖެހެނީ ވަރަށް ލަދުން ކަމަށެވެ. ދުވަހަކުވެސް މިހާ ލަދުގަންނަންޖެހިދާނެކަމަށް ހިތަކަށް ނާރާ ކަމަށާއި، ގައުމު ދެކެ ލޯބިވާ އެއްވެސް ރައްޔިތަކު ދުނިޔޭގެ ކުރިމަތީގައި މިހާ ލަދުގަންނަންޖެހިދާނެ ކަމަށް ހިތަކަށް ނާރާނެ ކަމަށެވެ.

އާޒިމް ވިދާޅުވީ މިއަދު ބުނަން ޖެހޭނީ އެ މީހުން ބުނި އައުޓެއް ނޫން ކަމަށާއި، މިއަދު ބުނަންޖެހޭނީ މުއިއްޒު އައުޓް ކަމަށެވެ. ރައްޔިތުން ވެސް މިއަދު މުއިއްޒު އައުޓް ބުނަން ޖެހޭ ކަމަށާއި، އެއީ ގައުމުގެ އިގްތިސާދު ހަލާކުކުރަމުންދާތީ ކަމަށެވެ.

އާޒިމް ވިދާޅުވީ އިންޑިއާ މީހުން ރާއްޖެ ނާންނަން އެ ނިންމަނީ ހަޑިމުޑުދާރު ވެރިކަމެއް އޮތުމުގެ ސަބަބުން ކަމަށެވެ. ދޮގު ހަދައިގެން ވެރިކަމަށް އައިސް އެއިން ނުނެޓިގެން އުޅެ، ދުވަހަކަށްވުރެ ދުވަހެއް ގައުމަށް ދެރަ ނިކަމެތިކަން ދެމުން އަންނަ ކަމަށެވެ.

އާޒިމް ވިދާޅުވީ މިއީ މަޖާ ކަމެއް ނޫން ކަމަށާއި، މިއީ ހިތާމަކުރަންޖެހޭ މައްސަލައެއް ކަމަށެވެ. އަދި އެތައް މިލިއަން ޑޮލަރެއް ދީގެން މާކެޓްކޮށްގެން އިންޑިއާ ރައްޔިތުން ގެނައި އިރު އެ ހުރިހާކަމެއް އިސްރާފްކޮށްލާފައިވާ ކަމަށެވެ.

އާޒިމް ވަނީ މި ސަރުކާރުން ފުށިދިއްގަރު ފަޅު ހިއްކަނީ މާލޭގެ ރައްޔިތުން ހާލުގައި ޖެއްސުމަށް ކަމަށް ވިދާޅުވެ އެ މަޝްރޫއަށް ވެސް ފާޑުވިދާޅުވެފައެވެ. އެގޮތުން ފުށިދިއްގަރުފަޅު ހިއްކައިގެން ގޯތި ދިނުމުގެ ބޭނުމަކީ މާލެ ކައިރިން ހިއްކާފައި ހުރި ބިންތައް ބޮޑު އަގުގައި ވިއްކައިގެން އޭގެ ފައިދާ ނެގުމަށް ކަމަށް އާޒިމް ވިދާޅުވިއެވެ.

އާޒިމް ވިދާޅުވީ އެތަނުގައި 50 އަހަރު ވެސް މީހުންނަށް ނޫޅެވޭނެ ކަމަށެވެ. އަދި ސަރުކާރުގެ ޕްލޭނާ އެއްގޮތަށް 30 އަހަރުން މީހުން އާބާދުވީ ނަމަވެސް އުޅެން ޖެހޭނީ ދަތި ހާލުގައި ކަމަށް އާޒިމް ވިދާޅުވިއެވެ.