ޑި ބްރޭނާ އެނބުރި އައިސް ކެޕްޓަންކަމާ ހަވާލުވެއްޖެ، ސިޓީ އެފްއޭކަޕް 4 ވަނަ ބުރަށް!

އޮގަސްޓް މަހަށްފަހު ކެވިން ޑި ބްރޭނާ އެނބުރި އައި މެޗުގައި, ބޮޑު މޮޅަކާއެކު މެންޗެސްޓަރ ސިޓީ އިނގިރޭސި އެފްއޭކަޕް ހަތަރު ވަނަ ބުރަށް ދަތުރުކޮށްފި އެވެ.

މެންޗެސްޓަރ ސިޓީ އެފްއޭކަޕް ހަތަރު ވަނަ ބުރަށް ދަތުރުކުރީ 5-0 ން ހަޑާސް ފީލްޑް ޓައުން ބަލިކޮށްގެންނެވެ. މެޗުގައި އެންމެ ޚާއްސަވީ އަނިޔާގެ ސަބަބުން ކުޅުމާ ދުރުގައި ހުރި މިޑްފީލްޑަރ ކެވިން ޑި ބުރޭނާ އަނބުރި އައުމެވެ. 57 ވަނަ މިނިޓްގައި ޑި ބުރޭނާ ކުޅެން ނިކުތުމާއެކު ރުބެން ޑިއާޒް ވަނީ ކެޕްޓަން ބޭންޑް ޑި ބުރޭނާއާ ހަވާލުކޮށްފައެވެ. މެޗުގެ ދެވަނަ ހާފްގެ ކުރީކޮޅު ނިކުމެ ޑި ބުރޭނާ މޮޅަށް ކުޅުނެވެ. އޭނާ ކުޅެން ނިކުއިންއިރު ސިޓީ ކުރީގައި އޮތީ 2-0 ނެވެ. އެއީ ފުރަތަމަ ހާފްގައި ފޮޑެން އާއި އަލްވަރޭޒް ޖެހި ލަނޑުންނެވެ. ދެވަނަ ހާފްގައި ސިޓީގެ ފުރަތަމަ ލަނޑަކީ ހަޑާސް ފީލްޑް ޓައުންގެ ޖެކްސަން އަތުން ބައިކޮޅަށް ވަން ލަނޑެކެވެ. ހަތަރުވަނަ ލަނޑު ޖެހީ ފޮޑެން އެވެ. ފަހު ލަނޑު ޖެހީ އަނިޔާއަށް ފަހު އެނބުރި އައި ޑޮކޫ އެވެ. މިސިޒީންގައި މޮޅަށް ކުޅެ ފުރަތަމަ އެގާރައިގެ ޖާގަ ޔަޤީންކޮށްފައި ވަނިކޮށް އަނިޔާވި ޑޮކޫ ކުޅެން ނިކުތީ 57 ވަނަ މިނިޓްގައި ގްރީލިޝްގެ ބަދަލުގައެވެ. އޭނާ ލަނޑު ޖަހަން ފުރުޞަތު ތަނަވަސްކޮށްދިނީ ޑި ބުރޭނާ އެވެ.

މެޗު ކުޅެމުންދިޔަ އިރު ސިޓީގެ ބައެއް ސަޕޯޓަރުން ވަނީ 10 ލަނޑު ބޭނުންވާ ކަމަށް ގޮވާފައެވެ. އެއީ 1987 ވަނަ އަހަރު ސިޓީން 10-1 ން ހަޑާސް ފީލްޑް ޓައުން އަތުން މޮޅުވެފައި ވާތީއެވެ. އަދި ޑި ބުރޭނާ އެނބުރި އައުމުން ސިޓީގެ ސަޕޯޓަރުން ވަނީ އޭނާއަށް ބޮޑު ތަރުހީބެއް ދީފައެވެ.