މަސްރަހު ހޫނުވެފައި އޮއްވާ ނޫސްވެރިންނަށް ދައުވަތުދީގެން ގެނެސް ރައީސް ފިއްލަވައިފި

ރައީސުލްޖުމްހުރިއްޔާ ޑރ. މުހައްމަދު މުއިއްޒުގެ އަރިސް 3 ޑެޕިއުޓީއަކު، އިންޑިޔާގެ ބޮޑުވަޒީރު ނަރެންދުރަ މޯދީއަށް ފާޑުކިޔައި މަލާމާތްކޮށް ޕޯސްޓްކުރި މައްސަލަ ހޫނުވެފައިވަނިކޮށް، ނޫސްވެރިންނަށް ފިއްލަވާ ރައީސް ޗައިނާއަށް ފުރާ ވަޑައިގެންފިއެވެ.

ރައީސް ޗައިނާއަށް ކުރައްވާ ދަތުރުފުޅާއި ގުޅިގެން، އެއަރޕޯޓުން އެމަނިކުފާނު ފުރާވަޑައިގަތުމުގެ ކުރިން ނޫސްވެރިންނާއި ބައްދަލުކުރާނެކަން ހާމަކޮށް، ނޫސްވެރިން އެތަނަށް ގެންދިޔައެވެ. ރައީސް އޮފީހުން ނޫސްވެރިންނަށް ފޮނުވި މެސެޖުގައި ބުނެފައިވަނީ ރައީސުލްޖުމްހޫރިއްޔާ އާއި އެމަނިކުފާނުގެ އަނބިކަނބަލުން އާދީއްތަ ދުވަހުގެ ރޭ ޗައިނާއަށް ފުރާ ވަޑައިގަތުމަށް ހަމަޖެހިފައިވާތީ ވެލާނާ އިންޓަރނޭޝަނަލް އެއަރޕޯޓުގެ ވީއައިޕީ ލައުންޖަށް ދިއުމަށެވެ.

ރޭގަނޑު 10:45 ގައި ފުރާވަޑައިގަތުމަށް ހަމަޖެހިފައިވާތީ 10:00ށް ނޫސްވެރިންގެ މައުލޫމާތު ދިނުމަށް ރައީސް އޮފީހުން ފޮނުވި މެސެޖުގައިވެއެވެ. ނޫސްވެރިން އެތަނަށް ގޮސް ގަޑިއެއްހާ އިރު ފަހުން ރައީސް ވަޑައިގެން ނޫސްވެރިންނާއި ބައްދަލު ނުކުރައްވާ ފުރާވަޑައިގެންނެވިއެވެ.

މިއާއެކު ނޫސްވެރިންގެ ފާޑުކިއުން މިކަމަށް އަމާޒުވިއެވެ. ގަޑި އިރަކަށްވުރެ ގިނަ އިރު ވަންދެން އެތަނުގައި ކޮޅަށް ބައިތިއްބާފައި ރައީސް ނޫސްވެރިންނާއި ބައްދަލުނުކޮށް ވަޑައިގެންނެވި ސަބަބެއް ރައީސް އޮފީހުން ވެސް ހާމައެއް ނުކުރެއެވެ. އަދި ރައިސް މީޑިއާތަކާއި ބައްދަލު ނުކުރައްވާ ފުރާވަޑައިގަތީ ޒުވާނުންނާ ގުޅޭ ވުޒާރާގެ ނައިބު ވަޒީރުން ކަމުގައިވާ މަރިޔަމް ޝިއުނާ، މަލްޝާ ޝަރީފް އަދި މަހުޒޫމް މާޖިދު ކުރި ޓްވީޓުތަކާއި ގުޅިގެން އިންޑިއާ އަދި ރާއްޖެއާ ދެމެދު އޮތް ގުޅުމަށް ބުރޫ އަރާ މިވަގުތު މަސްރަހު ހޫނުވެފައިވާތީ ކަމަށް ބެލެވެއެވެ.

އާންމުކޮށް ރައީސަކު ރާއްޖެއިން ބޭރަށް ފުރާ ވަޑައިގަންނަވާނަމަ، ނޫސްވެރިންނަށް ދައުވަތުދީ ދަތުރުފުޅުގައި ކުރައްވާނެ ކަންކަން ހާމަކުރައްވާނެއެވެ. އަދި ދަތުރުފުޅާއި ގުޅޭ ހުލާސާއެއް ހިއްސާ ކުރައްވާނެއެވެ. ނަމަވެސް މި ސަރުކާރާއި އިންޑިއާއާއި އޮތް ގުޅުން ހީނަރުވެފައިވާ މި ދަނޑިވަޅުގައި ރައީސް ވަނީ އެ މައްސަލައިގައި އެއްޗެއް ވިދާޅުވުމުގެ ބަދަލުގައި ނޫސްވެރިންނަށް ފިއްލަވާ ފުރާވަޑައިގެންފައެވެ.