ދަތުރުތެރޭގައި އެލަސްކާ އެއަރލައިންސްގެ ބޯޓަކުން ބައެއް ވަކިވުމާ ގުޅިގެން، ބޮއިންގެ ބޯޓުތަކެއް އުދުހުން މަނާކޮށްފި

އެލަސްކާ އެއާލައިންސްގެ މަތިންދާބޯޓަކުން ބައެއް، ބޯޓު ދަތުރުކުރަމުން ދަނިކޮށް ވަކިވެގެން ވެއްޓުމާ ގުޅިގެން، ބޮއިންގެ 737 މެކްސް9 މަރުކާގެ ބޯޓުތަކެއް ވަގުތީގޮތުން އުދުހުން މަނާކޮށްފިއެވެ.

އެމެރިކާގެ ވައިގެ ދަތުރުފަތުރާބެހޭ ކަންކަން ބަލަހައްޓާ އިދާރާ ފެޑަރަލް އެވިއޭޝަން އެޑްމިނިސްޓްރޭޝަން (އެފްއޭއޭ)އިން ބުނެފައިވަނީ މި ނިންމުމުގެ ދަށުން 171 ބޯޓު އިންސްޕެކްޝަނަށްޓަކައި ހިފެހެއްޓިފައި ވާކަމުގައެވެ.

ހުކުރު ދުވަހު ހިނގި ހާދިސާގައި އެލަސްކާ އެއަރލައިންސްގެ ބޯޓެއް އެމެރިކާގެ އޮރެގަންއިން ފުރައިގެން ކެލިފޯނިޔާއަށް ކުރި ދަތުރެއްގައި، ބޯޓު 16،000 ފޫޓު މައްޗަށް އަރާފައިވަނިކޮށް، ބޯޓުގެ ބޭރު އޮނިގަނޑުން ބޮޑު ބައެއް ވަކިވެގެން ވެއްޓިފައިވެއެވެ. އަދި ބޯޓުގައި ހުރީ ބޮޑު ބާގަނޑެއް ހެދިފައެވެ. މިއާއެކު ވަގުތުން ބޯޓު ތިރިކޮށް، އަނބުރާ އޮރެގަންގައި ޖައްސާފައި ވެއެވެ.

މިހާދިސާގައި ބޯޓުން ދަތުރުކުރި 177މީހުންނާއި ފަޅުވެރިންނަށް ކަމެއްނުވެ އެންމެން ސަލާމަތްވެފައި ވެއެވެ.

އެފްއޭއޭއިން ބުނެފައިވާގޮތުގައި، މި ހާދިސާއާއި ގުޅިގެން 171 ބޯޓެއް އިންސްޕެކްޝަނަށްޓަކައި ހިފެހެއްޓޭނެއެވެ.

އެލަސްކާ އެއަރލައިންސްއިން ވެސް ވަނީ، އެ އެއަރލައިނުން ބޭނުންކުރާ އެ މަރުކާގެ 65 ބޯޓުވެސް ދެން ބޭނުންކުރާނީ ސޭފްޓީ އިންސްޕެކްޝަންތައް ނިމި، ފުރިހަމަ މެއިންޓެނަންސްއަކަށްފަހު ކަމަށެވެ.