ބަންގްލާދޭޝްގެ އާންމު އިންތިޚާބުގެ ވޯޓުލުން އާދިއްތަ ދުވަހު ފެށިގެން ކުރިއަށް ދާއިރު މަސްރަހު ހޫނުވެ، ތަންތަން ރޯކުރުމާއި ހަލާކު ކުރަން ފަށާފައިވާކަމަށް ޚަބަރު ލިބިއްޖެއެވެ.

ވޯޓަށް އެއްދުވަހަށް ވެފައިވަނިކޮށް ހޮނިހިރު ދުވަހު މަދުވެގެން 14 ވޯޓުލާ މަރުކަޒެއްގައި ރޯކޮށްލާފައިވެއެވެ. އޭގެ ކުރިން ހުކުރު ދުވަހު ވެސް ކޮމިއުޓަރ ރޭލެއްގައި ރޯކޮށްލުމުގެ ސަބަބުން 4 މީހުން މަރުވެފައިވެއެވެ.

މިފަހަރުގެ އިންތިޚާބު އިދިކޮޅު ގިނަ ޕާޓީތަކުން ވަނީ ބޮއިކޮޓް ކޮށްފައެވެ.

އިދިކޮޅު ފަރާތްތަކުން ބުނާގޮތުގައި މި އިންތިޚާބަކީ ހަމައެކަނި ދައްކާލުމަށް ބާއްވާ އިންތިޚާބެކެވެ. އަދި ނަތީޖާ މިހާރު ވެސް އެނގޭ ކަމަށާއި ކާމިޔާބު ކުރައްވާނީ މިހާރުގެ ބޮޑުވަޒީރު ޝައިޚު ހަސީނާ ކަމަށް އިދިކޮޅު ފަރާތްތަކުން ބުނެފައިވެއެވެ.

އެ ޤައުމުގެ ފުލުހުން ބުނެފައިވާ ގޮތުގައި ބީއެންޕީއަށް ނިސްބަތްވާ އިދިކޮޅު ލީޑަރެއްކަމަށްވާ ނަބީއުﷲ ނަބީ އާއި ޕާޓީގެ ހަ އެކްޓިވިސްޓުން، ހުކުރުދުވަހު ރޭލުގައި ރޯކުރުމުގައި ބައިވެރިވާކަމުގެ ތުހުމަތުގައި ވަނީ ހައްޔަރުކޮށްފައެވެ.

ޑާކާ ހޮސްޕިޓަލުގެ އިސް އޮފިޝަލެއް ހާމަކޮށްފައިވާގޮތުގައި ހިނގި ހަމަނުޖެހުންތަކުގައި ހޮނިހިރު ދުވަހުގެ ރެއާ ހަމައަށް ބޮޑެތި އަނިޔާތައް ލިބިގެން މަދުވެގެން 8 މީހުންނަށް އެ ހޮސްޕިޓަލުގައި އަންނަނީ ފަރުވާދެމުންނެވެ.

ބަންގްލާދޭޝްގެ މީޑިޔާ ރިޕޯޓްތައް ބުނާގޮތުން ޗިޓަގޮންގގައި ހުންނަ މުހިންމު ފައްޅިއެއްގައި ވެސް ވަނީ ރޯކޮށްލާފައެވެ. މީގެ އިތުރުން ވެރިކަންކުރާ އަވާމީލީގްގެ ޕާޓީ އޮފީހަކަށް ވަނީ ގެއްލުންތައް ދީފައެވެ.

އިދިކޮޅު ބީއެންޕީން ވަނީ މި އިންތިޚާބުގައި ވޯޓުލާން ނުނިކުތުމަށް ސަޕޯޓަރުންނަށް ގޮވާލާފައެވެ. އަދި ދެ ދުވަހުގެ އާންމު ހަޅުތާލެއް ކުރިއަށް ގެންދިއުމަށް ވެސް ވަނީ ގޮވާލާފައެވެ.

ވެރިކަން ކުރާ އަވާމީ ލީގުން ބުނެފައިވަނީ ބީއެންޕީން އާންމުންގެ ހިތުގައި ބިރުވެރިކަން އުފެއްދުމަށް މަސައްކަތް ކުރަމުންދާ ކަމުގައެވެ.

އދ.ގެ ސްޕެޝަލް ރެޕޮޓުއޯ ވެސް ވަނީ ބަންގްލާދޭޝްގެ އިންތިޚާބުގެ ވަށާލާފައިވާ ހަމަނުޖެހުން ބޮޑު މާހައުލާމެދު ކަންބޮޑުވުން ފާޅުކުރައްވާފައެވެ.