20 ވަނަ ރައްޔިތުންގެ މަޖިލިސް އިންތިޚާބުގައި އެމްޑީޕީގެ ފަރާތުން ކުރިމަތިލުމަށް ހުޅުވާލި ފުރުސަތުގައި 36 ދާއިރާއަކަށް ކުރިމަތިލި ފަރާތްތަކަށް، ޕްރައިމަރީއާނުލައި ޓިކެޓް ކަށަވަރުވިކަން ހާމަކުރިފަހުން ލިބުނު ޝަކުވާތަކާއެކު ލިސްޓަށް ބަދަލު ގެނެސްފިއެވެ.

އެމްޑީޕީން ބުނީ 2024 ވަނަ އަހަރު ބޭއްވުމަށް ހަމަޖެހިފައިވާ 20 ވަނަ ރައްޔިތުންގެ މަޖިލިސް އިންތިޚާބުގައި އެ ޕާޓީގެ ޓިކެޓުގައި ވާދަކުރަން ބޭނުންވާ އެމްޑީޕީގެ މެމްބަރުންނަށް ޝައުގުވެރިކަން ފާޅުކުރުމުގެ ފުރުސަތުގައި، އެއް ކެންޑިޑޭޓަކު ކުރިމަތިލާފައިވާ ދާއިރާތަކަށް ޕްރައިމަރީއަކާނުލައި ޕާޓީ ޓިކެޓް ކަށަވަރުކުރެވިފައި ވާކަމަށެވެ. 36 ދާއިރާއެއްގެ ޓިކެޓް ޕްރައިމަރީއަކާނުލައި ކަށަވަރުވެފައިވާކަން ހާމަކުރުމަށްފަހު، ދެ ދާއިރާއަކާ ގުޅިގެން ހުށަހެޅުނު ޝަކުވާއެކު މިހާރު 2 ދާއިރާއެއް ވަނީ ލިސްޓުން އުނިކޮށްފައެވެ. އަދި އެއް ދާއިރާ ވަނީ އިތުރުކޮށްފައެވެ.

ލިސްޓުން އުނިކޮށްފައިވަނީ ގައްދޫ ދާއިރާއާއި ގެމަނަފުށީ ދާއިރާއެވެ. އަދި އިތުރުކޮށްފައިވަނީ ފޭދޫ ދެކުނު ދާއިރާއެވެ. މީގެ އިތުރުން އެއް ކެންޑިޑޭޓަަކަށްވުރެ ގިނަ ކެންޑިޑޭޓުން ކުރިމަތިލާފައިވާ ދާއިރާތައް، ގައުމީ މަޖިލީހުގެ ނިންމުމާ އެއްގޮތަށް އެކަށައެޅިފައިވާ ވިލަރެސް ކޮމިޓީން ނިންމާގޮތެއް ފަހުގެ ތާރީޚެއްގައި އިއުލާންކުރާނެ ކަމަށް އެމްޑީޕީން ބުނެއެވެ.

ޕްރައިމަރީއަކާނުލައި ޓިކެޓް ކަށަވަރުވި މެންބަރުންގެ ތެރޭގައި މިހާރުވެސް މަޖިލީހުގައި އެކި ދާއިރާތައް ތަމްސީލުކުރައްވާ 14 މެންބަރުން ހިމެނިވަޑައިގަންނަވައެވެ.

20 ވަނަ ރައްޔިތުންގެ މަޖިލީހުގެ އިންތިހާބުގައި އެމްޑީޕީން ކުރިމަތިލާން ބޭނުންވާ ފަރާތްތަކަށް އެ ފުރުސަތު ހުޅުވާލީ މިދިޔަ މަހުގެ 16 ވަނަ ދުވަހުއެވެ. އެ މުއްދަތު ހަމަވީ ޑިސެމްބަރު މަހުގެ 30 ވަނަ ދުވަހަށެވެ.

އެމްޑީޕީން ބުނެފައިވަނީ ޖެނުއަރީ 26 އަދި 27ގައި ޕްރައިމަރީ ބާއްވަންޖެހޭ ދާއިރާތަކުގެ ޕްރައިމަރީ ބާއްވާނެކަމަށެވެ.