ގައުމުގެ މަސައްކަތްތައް ކުރުމުގައި ވެސް ގައުމީ ވިސްނުން އިސްކުރަންޖެހޭ
ދިއްގަރު ދާއިރާގެ މެމްބަރު އިކްރާމް ހަސަން
ވެރިކަން ކުރަންޖެހޭނީ ގާނޫނާއި ގަވާއިދުގެ ތެރެއިން ކަމަށާއި، އެކަންކަން އެއްފަރާތްކުރުމަށްފަހު ގައުމުގެ މަސައްކަތްތައް ކުރިއަށް ނުގެންދެވޭނެ ކަމަށް ދިއްގަރު ދާއިރާގެ މެމްބަރު އިކްރާމް ހަސަން ވިދާޅުވެއްޖެއެވެ.
ރާއްޖެޓީވީގައި ވާހަކަދައްކަވަމުން އިކްރާމް ވިދާޅުވީ ރާއްޖެއަކީ ވަކި މީހެއްގެ ގައުމެއް ނޫން ކަމަށާއި، މިއީ ދިވެހިންގެ ގައުމު ކަމަށެވެ. މިހާރުގެ ރައީސް ޑރ.މުހައްމަދު މުއިއްޒަކީ ވަރަށް ބޮޑަށް ގައުމިއްޔަތު އިސްކުރައްވައި ވާހަކަދައްކަވާ ބޭފުޅެއްކަން ފާހަގަކުރައްވައި އިކްރާމް ވިދާޅުވީ ގައުމުގެ ހިންގެވުމާއި، ގައުމުގެ މަސައްކަތްތައް ކުރުމުގައި ވެސް ގައުމީ ވިސްނުން އިސްކުރަންޖެހޭ ކަމަށެވެ.
އިކްރާމް ވިދާޅުވީ ގައުމު ހިންގާއިރު، ގާނޫނުތައް އެއްފަރާތްކޮށް، ކަންކަން ސާފުނުވާ ގޮތަށް ކަންކަން ކުރުމަކީ ގައުމިއްޔަތު އިސްކުރުން ނޫން ކަމަށެވެ.
ފުށިދިއްގަރުފަޅުގެ މަޝްރޫއަށް އިޝާރާތް ކުރައްވައި އިކްރާމް ވިދާޅުވީ އެ މަޝްރޫއު ބަޖެޓުން އުނިކުރީ މިހާރުގެ ގައުމުގެ ހާލަތަށް ބެލުމަށްފަހު ކަމަށެވެ. މި ހާލަ nu lolތުގައި ފުށިދިއްގަރުފަޅުގެ މަޝްރޫއުއަކީ ކުރިއަށް ގެންދަން އެންމެ ރަނގަޅު ވަގުތު ނޫން ކަމަށެވެ. ނަމަވެސް މަޖިލީހުގެ ނިންމުމަށް ގޮންޖެހުމަށްފަހު މަޝްރޫއު ފަށާފައިވާކަން އިކްރާމް ފާހަގަކުރެއްވިއެވެ.
ފުށިދިއްގަރުފަޅު ހިއްކުމުގެ މަޝްރޫއުއަކީ އެންމެ ފުރަތަމަ މި އަންނަ އަހަރަށް ލަފާކޮށް ހުށަހެޅި ބަޖެޓުގައި ހިމެނި ކަމެކެވެ. އެގޮތުން އެ ފަޅު ހިއްކުމަށް 400 މިލިއަން ރުފިޔާ ބަޖެޓުގައި ހިމެނިއެވެ. ނަމަވެސް އެކަމާއި ގުޅޭ މާލީ އެއްވެސް ތަފްސީލެއް ސަރުކާރުން ހާމަކޮށްފައި ނުވާތީ އެ މަސައްކަތް ބަޖެޓުން ވަނީ އުނިކޮށްފައެވެ. ބަޖެޓުން ފުށިދިއްގަރުފަޅު ހިއްކުމުގެ މަސައްކަތް އުނިކޮށްފައި ވަނިކޮށް، 18 ޑިސެންބަރު 2023ގައި މިމަޝްރޫއުގެ އަމަލީ މަސައްކަތް ވަނީ ފަށާފައެވެ. އެ މަސައްކަތް ހަވާލުކޮށްފައިވަނީ އިންޓަނޭޝަނަލް ބިޑިންއަކަށް ނުގޮސް ސްރީލަންކާގެ ކެޕިޓަލް މެރިން އެންޑް ސިވިލް ކޮންސްޓްރަކްޝަން ކޮމްޕެނީ (ސީއެމްސީސީ)އާއި އެވެ. އަދި ފުށިދިއްގަރުފަޅު ހިއްކަނީ ހުޅުމާލެއިން 10 ހެކްޓަރު، އަދި ރަސްމާލެއިން 60 ހެކްޓަރުގެ ބިން ސީއެމްސީއަށް ދޭގޮތަށެވެ.
މިސަރުކާރުން ބުނެފައިވަނީ ރަސްމާލެ ތަރައްގީ ކުރެވުމާއެކު، ބޯހިޔާވަހިކަން ނުލިބޭ ރައްޔިތެއް މާލޭގައި ނުހުންނާނެ ކަމަށާއި، 65000 ހައުސިން ޔުނިޓް ގާއިމްވެގެންދާނެ ކަމަށެވެ.
