ކުރީގެ ރައީސް ސާލިހު ކޮރަޕްޝަނުގެ އެއްވެސް އަމަލެއް ނުކުރައްވާނެކަމުގެ ޔަގީންކަން އެބައޮތް: މެންބަރު އިކްރާމް
ޒަމާނުއްސުރެ، ކޮރަޕްޝަނުގެ ތުހުމަތުތައް އެންމެ ބޮޑަށް އަމާޒުވެގެންދަނީ ސަރުކާރުގައި ތިއްބަވާ މަތީފަންތީގެ ސިޔާސީ ބޭފުޅުންނަށް
ދިއްގަރު ދާއިރާގެ މެންބަރު، އިކްރާމް ހަސަން
ކުރީގެ ރައީސް އިބްރާހީމް މުހައްމަދު ސާލިހު ކޮރަޕްޝަނުގެ އެއްވެސް އަމަލެއް ނުކުރައްވާނެކަމުގެ ޔަގީންކަން އެބައޮތް ކަމަށް، ދިއްގަރު ދާއިރާގެ މެންބަރު އިކްރާމް ހަސަން ވިދާޅުވެއްޖެއެވެ.
ރާއްޖެޓީވީގައި ވާހަކަދައްކަވަމުން އިކްރާމް ވިދާޅުވީ، ޒަމާނުއްސުރެ ކޮރަޕްޝަންގެ ތުހުމަތުތައް އެންމެ ބޮޑަށް އަމާޒުވެގެންދަނީ ސަރުކާރުގައި ތިއްބަވާ މަތީފަންތީގެ ސިޔާސީ ބޭފުޅުންނަށް ކަމަށެވެ. ނަމަވެސް ކުރީގެ ސަރުކާރުގައި މިފަދަ ކޮރަޕްޝަނަށް މަގުފަހިވާ ކަންކަން ކުރުމަށް ޖާގަ ދެއްވާފައި ނުވާކަމަށް އިކްރާމް ވިދާޅުވިއެވެ. ރައީސް ސާލިހާމެދު އިދިކޮޅު ފަރާތްތަކުން އެކިއެކި ތުހުމަތުތައް ކުރެއްވިނަމަވެސް އެމަނިކުފާނު ކޮރަޕްޝަންފަދަ އަމަލެއް ނުކުރައްވާނެ މކަމުގެ ޔަގީންކަން އެބައޮތްކަމަށް އިކްރާމް ވިދާޅުވިއެވެ.
ނިމިދިޔަ ސަރުކާރުގައި ރައްޔިތުން ދިރިއުޅުމަށް ހެޔޮ ބަދަލުތައް ގެނައުމަށް ކޮށްފައިވާ މަސައްކަތްތަކަށް އިޝާރާތް ކުރައްވައި އިކްރާމް ވިދާޅުވީ، ސިއްހީ ދާއިރާއާއި ތައުލީމީ ދާއިރާގެ މުސާރަ ބޮޑުކުރި ކަމަށެވެ. މި ދާއިރާތަކަކީ އެތައް ޒަމާނެއް ވަންދެން މުސާރައަށް ހެޔޮ ބަދަލުތަކެއް އައިސްފައިނުވާ ދާއިރާތައްކަން އޭނާ ފާހަގަކުރެއްވިއެވެ. އަދި ވިދާޅުވީ ކުރީ ސަރުކާރުން ކުރި މަސައްކަތުން، އަންނަ ޖެނުއަރީ މަހުން ފެށިގެން ސިވިލްސަރވިސްގައި މަސައްކަތްކުރާ މުވައްޒަފުންގެ މުސާރައަށްވެސް ހެޔޮ ބަދަލުތަކެއް އަންނާނެކަމަށް އުންމީދުކުރައްވާ ކަމަށެވެ.
އިކްރާމް ވިދާޅުވީ ރާއްޖެއަށް ލިބޭ ފައިސާއިން ރާއްޖެ ބިނާކުރަންޖެހޭ ކަމަށާއި، ހުރިހާ ދާއިރާއެއްގެ މުސާރަތައް ބޮޑުކުރަންޖެހޭ ކަމަށެވެ. ރައްޔިތުންގެ ދިރިއުޅުން ރަނގަޅުވެ، ލިބޭ އާމްދަނީ އިތުރުވާނެ ގޮތަށް ކަންކަން ބައްޓަން ކުރަންޖެހޭ ކަމަށާއި، ގައުމުގެ ކަންކަން ކުރިއަށްގެންދިއުމުގައި ދެފުށް ފެންނަ ނިޒާމަކުން މަސައްކަތްތައް ކުރިއަށް ގެންދަންޖެހޭ ކަމަށެވެ. އަދި މިފަދަ ގޮތަކަށް ގައުމުގެ ކަންކަން ބައްޓަން ކުރެވިއްޖެނަމަ މައްސަލަތައް މަދުވެ، ކޮރަޕްޝަން އޮންނަ ފުރުސަތު ކުޑަވާނެ ކަމަށްވެސް އޭނާ ވިދާޅުވިއެވެ.
