މަޖިލީހުގެ ހިނގަމުންދާ ދައުރުގެ މަސައްކަތް އަންނަ މަހުގެ 7 ވަނަ ދުވަހުގެ ފަހުން ވެސް ދިގުދައްމާލަން ޖެހިދާނެކަމަށް ދިއްގަރު ދާއިރާގެ މެންބަރު އިކްރާމް ހަސަން ވިދާޅުވެއްޖެއެވެ.

ރާއްޖެ ޓީވީގެ ފަލަސުރުޚީ ޕްރޮގްރާމުގައި ވާހަކަފުޅު ދައްކަވަމުން އިކްރާމް ވިދާޅުވީ މަޖިލީހުގެ މަސައްކަތްތައް މިހާރު ވަރަށް ބާރަށް ކުރިއަށްދާ ކަމަށާއި، މަޖިލީހުގެ ރައީސަކީ މެޖޯރިޓީގެ ތާއިދާއެކު އިންނެވި ރައީސެއްކަމުން، ރައީސްގެ އެއްބާރުލުމާއެކު މަސައްކަތްތައް ބާރަށް ކުރިއަށްދާ ކަމަށެވެ.

އިކްރާމް ވިދާޅުވީ މަޖިލީހުގެ ދައުރު ދިގުދައްމާލަން ޖެހުނު އެންމެ ބޮޑު އެއް ސަބަބަކީ ލަސްވެފައި ހުރި މަސައްކަތް ނިންމުމަށްފަހު ރިސެސްއަށްދާން ބޭނުންވާތީ ކަމަށެވެ. އަދި މެޖޯރިޓީ ވެސް ބޭނުންވަނީ އެގޮތަށް ކަމަށް އޭނާ ވިދާޅުވިއެވެ. އިކްރާމް ވިދާޅުވީ އަންނަ މަހުގެ 7 ވަނަ ދުވަހާ ހަމައަށް މަޖިލީހުގެ ދައުރު ދިގުދައްމާލާފައިވީނަމަވެސް، އެއަށްވުރެ ވެސް ދިގުލައިގެން ހިނގައިދާނެ ކަމަށެވެ.

ހޯމަ ދުވަހުގެ މަޖިލީހުގެ ޖަލްސާ ފައްޓަވަމުން މަޖިލީހުގެ ރައީސް މުހައްމަދު އަސްލަމް ވަނީ އަންނަ މަހުގެ 7 އާ ހަމައަށް މި ދައުރުގެ ޖަލްސާތައް ކުރިޔަށް ގެންދަވަން ނިންމަވާކަން އިއުލާނުކުރައްވާފައެވެ. މަޖިލީހުގެ މި ދައުރު ދިގުދަންމާލަން ނިންމާފައި ވަނީ 2024ގެ ބަޖެޓު ފާސްކުރުމާއި އަދި އެ ނޫންވެސް މުހިންމު މަސައްކަތްތައް ނުނިމި ހުރުމުން މަޖިލީހުގެ މަސައްކަތްތަކަށް ފުރުސަތު ދިނުމުގެ ގޮތުންނެވެ.

ހޯމަ ދުވަހު ނެގި ވޯޓުގައި މަޖިލީހުގެ ދައުރު ދިގުދައްމާލަން ނިންމާފައި ވަނީ ވޯޓުގައި ބައިވެރިވެވަޑައިގަތް 51 މެންބަރުންގެ ވޯޓާއި އެކުގައެވެ. ދައުރު ދިގުދަންމާލުމާއި މެދު ވަކި ގޮތަކަށް ވޯޓު ނުދެއްވާ 6 މެންބަރަކު ތިއްބެވިއެވެ. އަދި ނުފެންނަ ކަމަށް އެއް މެންބަރަކު ވޯޓު ދެއްވިއެވެ.

މަޖިލީހުގެ ކުރީގެ ރައީސް މުހައްމަދު ނަޝީދުގެ އިތުބާރު ނެތް މައްސަލަ ކުރިޔަށް ނުގެންދެވި މަޖިލީހުގެ މަސައްކަތްތައް ނުކުރެވި ދައުރުގެ ބޮޑުބައެއް ހޭދަކުރަން ޖެހުނެވެ. އެކަމުގެ ސަބަބުން މިނިވަން މުއައްސަސާތަކާއި ސަފީރުންނަށް މީހުން އައްޔަން ކުރުން ފަދަ މުހިންމު މަސައްކަތްތައް ކުރިއަށް ނުގޮސް ހުއްޓެވެ. އަލުން މަޖިލިސް ހިނގައިގަތީ މަޖިލީހުގެ ކުރީގެ ރައީސް ނަޝީދުގެ އިތުބާރު ނެތްކަމަށް ފާސްކޮށް، މަޖިލީހުގެ ރައީސްކަމަށް ހިތަދޫ އުތުރު ދާއިރާގެ މެންބަރު މުޙައްމަދު އަސްލަމް އައްޔަން ކުރި ހިސާބުންނެވެ.