މަޖިލީހުގެ ބައެއް މެމްބަރުންނަކީ ސެކިއުރިޓީ ބޭނުންވާ މެމްބަރުން
ރައްޔިތުންގެ މަޖިލީހުގެ ދިއްގަރު ދާއިރާގެ މެމްބަރު އިކްރާމް ހަސަން
ރައްޔިތުންނާއެކު ކިޔޫ ހަދަން ޖެހުމުން ޝަކުވާ ކޮށްފައިނުވާނެ ކަމަށް ރައްޔިތުންގެ މަޖިލީހުގެ ދިއްގަރު ދާއިރާގެ މެމްބަރު އިކްރާމް ހަސަން ވިދާޅުވެއްޖެއެވެ.
ރައްޔިތުންގެ މަޖިލީހުގެ މެމްބަރުންނަށް ޓިކެޓު ގަތުމާއި ދަނޑަށް ވަދެ ނިކުތުމުގެ ކަންކަން ވީއައިޕީކޮށް ހަމަޖެހެން ޖެހޭކަމަށް އިކްރާމް ވިދާޅުވެފައިވާކަމަށް ބުނެ މި ފަހުން ސޯޝަލް މީޑިއާގައި އެކި ވާހަކަތައް ދަނީ ފެތުރެމުންނެވެ.
ރާއްޖެ އެމްވީއަށް ދެއްވި ޚާއްސަ އިންޓަރވިއުއެއްގައި އިކްރާމް ވިދާޅުވީ މަޖިލީހަށް ހޮވި، މަޖިލީހުގައި ދެމިތިބެވެނީ ރައްޔިތުންގެ ވޯޓާއެކު ރައްޔިތުންގެ ރުހުމުގައި ކަމަށެވެ. އެހެންކަމުން ރައްޔިތުންނާއެކު ކިޔޫއެއް ހަދަން ޖެހުމަކީ ޝަކުވާ ކުރައްވާ ކަމެއް ނޫން ކަމަށެވެ. މިކަމުގައި ވާހަކަދައްކަވަން ޖެހިވަޑައިގަތީ މަޖިލީހުގެ ޕްރޮޓޮކޯލް ޑިޕާޓްމެންޓެއް އޮވެ، ދަނޑަށް ވަދެ ނިކުތުމުގައި ފަސޭހަ އިންތިޒާމުތަކެއް ނެތުމުން ކަމަށް އިކްރާމް ވިދާޅުވިއެވެ.
އިކްރާމް ވިދާޅުވީ މިކަމުގެ ކަންބޮޑުވުން ފާޅުކުރެއްވީ ރައްޔިތުންގެ މަޖިލީހުގެ ކްލޯސްޑް ގްރޫޕެއްގައި ކަމަށެވެ. އެ ގްރޫޕްގައި އަމީންއާންމު ވެސް އިންނަވާނެ ކަމަށާއި، ބޭނުންފުޅުވީ ކަމާގުޅޭ ބޭފުޅުންނާ ހަމައަށް އެކަން ދިއުން ކަމަށެވެ. އަދި މަޖިލީހުގެ މެމްބަރުންނަށް ވަކި ހިސާބެއްގައި ތިބެވޭނެ އިންތިޒާމު ހަމަޖައްސައިދެއްވައި، ތަންކޮޅެއް ފަސޭހައިން ވަދެވޭނެ އިންތިޒާމު ހަމަޖައްސަވައިދެއްވުމަށް އެދިވަޑައިގެންނެވި ކަމަށް އިކްރާމް ވިދާޅުވިއެވެ.
އެ ކަންބޮޑުވުން ފާޅުކުރެއްވީ މަޖިލީހުގެ ފަރާތުން އެކަން ރަނގަޅުކުރެވިދާނެ ކަމަށް ގަބޫލުކުރެވޭތީއާއި، މަޖިލީހުގެ ބައެއް މެމްބަރުންނަކީ ނުރައްކަލެއް ކުރިމަތިވެދާނެކަމުގެ އިންޒާރު ލިބިލިބި ތިއްބަވާ މެމްބަރުން ކަމަށް ވާތީ ކަމަށް އިކްރާމް ވިދާޅުވިއެވެ. އެއީ ރައްޔިތުންނާއެކު ކިޔޫ އަކަށް އަރަން ޖެހިގެން، ނުވަތަ ހައިސިއްޔަތު މަތިވެގެންނެއް ފާޅުކުރި ކަންބޮޑުވުމެއް ނޫން ކަމަށް އިކްރާމް ވަނީ ވިދާޅުވެފައެވެ.
މީޑިއާއިން ވެސް މިކަން ނަގާފައިވަނީ ރަނގަޅަށް ނޫންކަން އިކްރާމް ފާހަގަކުރެއްވިއެވެ. މީޑިއާއިން ފަތުރާ ޚަބަރުތަކުން އިތުރަށް ލޭބަލްވެގެންދާކަމަށް އިކްރާމް ވިދާޅުވިއެވެ. މިވަގުތަކީ އޭނާއަށް ދަތި ވަގުތެއް ކަމަށާއި، މި ވަގުތު ދޮގު ވާހަކަތައް ނުފެތުރުމަށް އިކްރާމް ވަނީ އެދިލައްވާފައެވެ.
މި މޭރުމުން އިކްރާމް ދެއްކެވި ވާހަކަތަކަށް ރައްޔިތުންގެ ގިނަ ފާޑުކިޔުންތަކެއް ދަނީ އަމާޒުވަމުންނެވެ. އެގޮތުން އާންމު ރައްޔިތު މީހާ ޓިކެޓު ނަގަން އެތައް ގަޑިއިރެއް ވަންދެން ކިޔޫގައި އިންނަންޖެހޭތީ އެކަން ގިނަ ބަޔަކު ގެންދަނީ ފާހަގަކުރަމުންނެވެ.
