ދަ ޑިމޮކްރެޓްސް އުފައްދާފައިވަނީ ޒާތީ މަގުސަދެއްގައި، ސިޔާސީ މަގުސަދެއްގައެއް ނޫން: މެންބަރު އިކްރާމް
ރޫޅާލުމަކީ ފަނާކުރަނިވި ވިސްނުމެއް، އެވިސްނުން ރާއްޖޭގެ ރައްޔިތުން ބޭނުމެއްނުވޭ
ދިއްގަރު ދާއިރާގެ ރައްޔިތުންގެ މަޖިލީހުގެ މެމްބަރު، އިކްރާމް ހަސަން
"ދަ ޑިމޮކްރެޓްސް"ގެ ނަމުގައި ސިޔާސީ ޕާޓީއެއް އުފައްދާފައިވަނީ ޒާތީ މަގުސަދެއްގައި ކަމަށާއި، ސިޔާސީ މަގުސަދެއްގައި ނޫން ކަމަށް ދިއްގަރު ދާއިރާގެ ރައްޔިތުންގެ މަޖިލީހުގެ މެމްބަރު އިކްރާމް ހަސަން ވިދާޅުވެއްޖެއެވެ.
މ. މަޑުއްވަރީގައި އޮތް ކެމްޕޭން ޖަލްސާގައި ވާހަކަފުޅުދައްކަވަމުން އިކްރާމް ވިދާޅުވީ، ދަ ޑިމޮކްރެޓްސް ނަމުގައި ޕާޓީއެއް އުފައްދައި، އެހެން ޕާޓީތައް ރޫޅާލާނާމޭ ކިޔަމުންދާ ކަމަށެވެ. ނަމަވެސް ރޫޅާލުމަކީ ފަނާކުރަނިވި ވިސްނުމެއް ކަމަށާއި، އެވިސްނުން ރާއްޖޭގެ ރައްޔިތުން ބޭނުން ނުވާކަމަށެވެ. އަދި މިއަދު ދަރިންނަށް ވެސް ވިސްނައިދެމުންދަނީ ބިނާކުރަނިވި ވިސްނުން ކަމަށް އިކްރާމް ވިދާޅުވިއެވެ.
އިކްރާމް ވިދާޅުވީ ރާއްޖޭގައި ދިރިއުޅެނީ މާ ވިސްނުންތެރި ރައްޔިތުން ކަމަށާއި، ޒާތީ ހަސަދަވެރިކަމެއް ހިފައިގެން ނުކުމެގެން ލިބޭނެ އެއްވެސް ކާމިޔާބީއެއް ނޯންނާނެ ކަމަށެވެ.
މީގެ އިތުރުން އިކްރާމް ވަނީ މަޑުއްވަރީގެ ތަރައްގީއަށް އަލިއަޅުއްވާލައްވައި ވާހަކަފުޅުދައްކަވާފައެވެ. އިކްރާމް ވިދާޅުވީ ޒުވާނުން ބޭނުންވި ފުޓްސަލްދަނޑު އަޅާދީފައިވަނީ މިސަރުކާރުން ކަމަށެވެ. އަދި ޒުވާނުން ބޭނުންވި ޔޫތު ސެންޓަރު އެޅުމަށްވެސް ތައްޔާރުވެފައިވާ ކަމަށް މެންބަރު އިކްރާމް ވިދާޅުވިއެވެ.
އިކްރާމް ވިދާޅުވީ މަޑުއްވަރީ ކައިރިން ހަ ހެކްޓަރުގެ ބިމެއް ހިކި، އެހެން ރަށެއް ހެދެމުންދާ ކަމަށެވެ. މިއީ އިގްތިސާދަށް ފަހި ރަށަކަށް ވާނެކަމަށް އިކްރާމް ވިދާޅުވިއެވެ. އަދި ވިދާޅުވީ އެރަށުގައި ލޯކަލް ޓޫރިޒަމް ކުރިއަރުވަން ބޭނުންވާނަމަ އެފުރުސަތު ވެސް ރައްޔިތުންނަށް ލިބޭނެ ކަމަށެވެ.
އިކްރާމް ވިދާޅުވީ މިސަރުކާރަކީ ވަރަށް ގިނަ ކާމިޔާބީތައް ހޯދާފައިވާ ސަރުކާރެއް ކަމަށެވެ. މިސަރުކާރުގައި ޓީޗަރުންނާއި، ސިއްހީ ދާއިރާގެ މަސައްކަތް ކުރާ މުވައްޒަފުންގެ މުސާރަކޮށް ބޮޑު، މިދާއިރާތަކަށް ދިވެހިން ނެރުމަށް ޚާއްސަ މަސައްކަތްތަކެއް ކުރާކަން މެންބަރު ފާހަގަކުރެއްވިއެވެ. އަދި ވިދާޅުވީ އޯގާތެރި ވެރިއެއް ގެންނަން ބޭނުންވާ ނަމަ ރައީސް ސާލިހަށް އިތުރު ދައުރެއް ދޭން ޖެހޭ ކަމަށެވެ.
