ކުރީގެ ސަރުކާރުތަކަކީ ވެސް ގާނޫނީގޮތުން ހޮވިފައިވާ ސަރުކާރުތަކެއް ކަމަށާއި، އެ ސަރުކާރުތަކުން ކުރާ މަސައްކަތްތަކަށް، އަލަށް އިންތިޚާބުވާ ސަރުކާރުތަކުން އިހުތިރާމުކުރަންވާނެ ކަމަށް، ރައްޔިތުންގެ މަޖިލީހުގެ ދިއްގަރު ދާއިރާގެ މެންބަރު އިކްރާމް ހަސަން ވިދާޅުވެއްޖެއެވެ.

ރާއްޖެޓީވީގެ ފަލަސުރުޚީ ޕްރޮގްރާމުގައި، ނިމިދިޔަ ސަރުކާރުން ހިންގި ގެދޮރުވެރިޔާ އަދި ބިންވެރިޔާ ސްކީމުގެ ވާހަކަ ދައްކަވަމުން އިކްރާމް ވިދާޅުވީ، ހޯމަ ދުވަހު މަޖިލީހުގެ ކޮމިޓީގައި ބިމާބެހޭ ވަޒީރު ޑރ. އަލީ ހައިދަރު ދެއްކެވި ވާހަކަފުޅުތަކުން، ބިންވެރިޔާ ސްކީމުގެ ދަށުން ލިބެންޖެހޭ ގޯއްޗާއި އަދި ގެދޮރުވެރިޔާ ސްކީމުގެ ދަށުން ލިބެންޖެހޭ ފްލެޓުތައް، އެތަންތަނަށް ކުރިމަތިލީ މީހުންނަށް ލިބުނު ތަނުން، ލިބޭނެކަމުގެ ޔަގީންކަން ލިބިއްޖެ ކަމަށެވެ.

އެގޮތުން އެންޓި-ކޮރަޕްޝަން ކޮމިޝަން (އޭސީސީ)ން އެ މަސައްކަތްތައް މަޑުޖައްސާލަން އެންގީ، އެ މަޝްރޫއުތަކާ ގުޅޭގޮތުން އާންމުންގެ ޝަކުވާތަކެއް ހުށަހެޅުމުގެ ސަބަބުންކަން ފާހަގަކުރައްވަމުން އިކްރާމް ވިދާޅުވީ، ކުރީ ސަރުކާރުގެ ހައުސިންގ މިނިސްޓަރުކަމުގައި ހުންނެވި އަސްލަމް އެފަދައިން އަމަލުކުރެއްވި ކަމުގެ ލިޔުންވެސް އެބަހުރި ކަމަށެވެ.

އިކްރާމް ވިދާޅުވީ އެ މައްސަލަ ބެލުމަށްފަހު ކުރިއަށްގެންދިޔުމަށް އޭސީސީން އެދުމުން، ބައެއް ފަރާތްތަކަށް ފްލެޓް ލިބުނުކަމުގެ ލިޔުންވެސް ދޫކޮށްފައި އެބަހުރި ކަމަށެވެ.

އެހެންނަމަވެސް މި ސަރުކާރު އިންތިޚާބުވިފަހުން އޭސީސީން އަނެއްކާވެސް ފްލެޓްތައް ހުއްޓުވާލި ހުއްޓުވާލުމަށް އިޝާރާތް ކުރައްވަމުން އިކްރާމް ވިދާޅުވީ، ކުރީގެ ރައީސް އިބްރާހީމް މުހައްމަދު ސާލިހުގެ ސަރުކާރަކީވެސް ގާނޫނީގޮތުން ހޮވިފައިވާ ސަރުކާރެއް ކަމަށާއި، އެ ސަރުކާރުން ކުރިއަށްގެންދިޔަ މަޝްރޫއުތަކަށް އައު ސަރުކާރުން އިހުތިރާމު ކުރަންވާނެ ކަމަށެވެ.

އިކްރާމް ވިދާޅުވީ ކޮންމެ ސަރުކާރެއް ވެސް އުފެދިގެން އަންނަނީ ރައްޔިތުންނަށް ޚިދުމަތް ދިނުމަށް ކަމަށެވެ. އެހެންކަމުން އަލަށް އަންނަ ސަރުކާރަކުން، ކުރީ ސަރުކާރުން ކުރި ހުރިހާ މަސައްކަތެއް އަލުން ފެށުމަކީ ކޮށްގެންވާނެ ކަމެއް ނޫންކަމަށެވެ.

އިކްރާމް ވިދާޅުވީ އެހެންކަމުން ކުރީގެ ސަރުކާރުން ގެދޮރުވެރިޔާ އަދި ބިންވެރިޔާ މަޝްރޫއުގައި އާންމުންނަށް ދީފައިހުރި ލިޔުންތައް ބަދަލުކޮށް ހެދުމަކީ އެންމެ ރަނގަޅު ގޮތް ނޫންކަމަށެވެ.