ސައުދީ ޕްރޯ ލީގުގައި އަލް ޚަލީޖާ ދެކޮޅަށް ކުޅުނު މެޗުން، އަލް އަހްލީ ސައުދީ އަށް ހަނި މޮޅެއް ލިބިއްޖެ އެވެ.
ލީގުގައި ހުކުރު ދުވަހުގެ ރޭ އަލް ޚަލީޖާ ދެކޮޅަށް ނިކުތްއިރު ވެސް އަލް އަހްލީ ސައުދީ އޮތީ ތިން ވަނައިގަ އެވެ. އެހެން ނަމަވެސް، އެ މެޗުން އެ ޓީމަށް ލިބުނީ އުނދަގޫ މޮޅެކެވެ.
މެޗުގައި ރަނގަޅަށް ކުޅުނު އަލް އަހްލީ ސައުދީން ވަނީ ލަނޑު ޖެހުމަށް ގިނަ މަސައްކަތްތަކެއް ކޮށްފަ އެވެ. އެ ޓީމަށް ލަނޑު ޖަހާނެ ފުރުސަތު ވެސް ލިބުނެވެ. މެޗުގެ ކުރީކޮޅު އެ ޓީމަށް ކުޅެމުން އަންނަ ރިޔާދް މާރޭޒް އަށް ލަނޑު ޖަހާނެ ފުރުސަތު ލިބި ވަނީ، ބޭކާރުވެފަ އެވެ. އޭގެ އިތުރުން ގެބްރީ ވެއިގާ އަށް ވެސް ވަނީ ފުރުސަތު ލިބިފަ އެވެ. މެޗު އެއްވަރުވާން ދަނިކޮށް، އަލް އަހްލީ ސައުދީ އަށް ވަނީ ޕެނަލްޓީއެއް ލިބިފަ އެވެ. މެޗުގެ ފުރިހަމަ ވަގުތު ހަމަވެ، އިތުރަށް ދެއްކި ވަގުތުގައި ލިބުނު ޕެނަލްޓީ ކާމިޔާބުކޮށް، އެ ޓީމު މޮޅު ކޮށްދިނީ ފްރޭންކް ކެސިއޭ އެވެ.
މޮޅާއެކު އަލް އަހްލީ ސައުދީ ތިން ވަނައިގައި އޮތީ މިހާތަނަށް ކުޅުނު 19 މެޗުން 40 ޕޮއިންޓު ހޯދައިގެންނެވެ. އެ ޓީމަށް ވުރެ އެއް މެޗު މަދުން ކުޅެގެން ހަތަރު ވަނައިގައި އަލް ތައާވޫނަށް ލިބެނީ 34 ޕޮއިންޓެވެ.
