އަސްލަމް އިންޑިޔާގެ ސަފީރާ ބައްދަލުކުރެއްވި ކަމަށް ވިދާޅުވެ ރައީސް ހެއްދެވީ އިތުރުފުޅެއް

ރައްޔިތުންގެ މަޖިލީހުގެ ރައީސް މުޙައްމަދު އަސްލަމް، ބުރާސްފަތި ދުވަހުގެ ރޭ އިންޑިޔާގެ ސަފީރާ ބައްދަލުކުރެއްވި ކަމަށް ރައީސް މުއިއްޒު ކުރެއްވި ތުހުމަތަކީ އިތުރުފުޅެއްކަން ހާމަވެއްޖެއެވެ.

ބުރާސްފަތި ދުވަހުގެ ރޭ ޕްރޮގްރެސިވް ކޮންގްރެސިވް ކޯލިޝަނުން ބޭއްވި ޖަލްސާގައި ވާހަކަފުޅު ދައްކަވަމުން ރައީސް ޑރ. މުޙައްމަދު މުއިއްޒު ވަނީ މަޖިލީހުގެ ރައީސް އަސްލަމް އާއި ހެންވޭރު ދެކުނު ދާއިރާގެ މެންބަރު ހުސެއިން ޝަހީމާ ދެ ބޭފުޅުން ހުޅުމާލޭގައި ހުންނަ އަމީން އެވެނިއު އޯކް އިން ނުކުމެވަޑައިގަންނަވާ ފޮޓޯއަށް އިޝާރަތްކުރައްވައި ވާހަކަ ދައްކަވާފައެވެ.

އެގޮތުން ރައީސް މުއިއްޒުގެ އަރިސް ބޭފުޅަކު އެކްސްގައި ކުރެއްވި އެ ޕޯސްޓަށް އިޝާރަތްކުރައްވައި ރައީސް ވިދާޅުވީ މަޖިލީހުގެ ރައީސާއި ދެ މެންބަރަކު ބޭރުގެ ސަފީރަކާ ބައްދަލު ކުރެއްވުމަށް ފަހު ނުކުންނަ މަންޒަރު ފެންނަ ފޮޓޯއެއް ސޯޝަލް މީޑިއާގައި ދައުރުވަމުންދާ ކަމަށެވެ.

އަދި ވަރަށް ގިނައިރު ވަންދެން އަމީން އެވެނިއުގައި އެ ބައްދަލުވުން ކުރިއަށް ގެންގޮސްފައިވާ ކަމަށާއި، އެ ބައްދަލުވުމަކީ ގައުމު އިސްކުރައްވައި ބޭއްވެވި ބައްދަލުވުމެއް ކަމުގައި ގަބޫލުކުރައްވާ ކަމަށް އެމަނިކުފާނު ވިދާޅުވިއެވެ.

އެހެން ނަމަވެސް، "ރާއްޖެ ޓީވީ"ން ބެލިބެލުމުން އެނގުނު ގޮތުގައި، އިންޑިޔާގެ ސަފީރު ދިރިއުޅުއްވަނީ އަމީން އެވެނިއުގެ ޓީކްގައެވެ. އެގޮތުން ރައީސްގެ އެ ވާހަކަކޮޅު ދޮގުކޮށް، ރައްޔިތުންގެ މަޖިލީހުން ވެސް ވަނީ މަޖިލީހުގެ ރައީސް އެއްވެސް ސަފީރަކާ ރަސްމީކޮށް އަދި ނުރަސްމީކޮށް ވެސް ބައްދަލުކުރައްވައިފައިނުވާ ކަން ކަށަވަރުކޮށްދީފައެވެ.

އެކަމާ ގުޅިގެން މަޖިލީހުގެ ހުޅުމާލެ ދާއިރާގެ މެންބަރު އަލީ ނިޔާޒު "އެކްސް"ގައި ކުރެއްވި ޕޯސްޓެއްގައި ވިދާޅުވީ އަމީން އެވެނިއުގަ ސަފީރުން ތިއްބަވާ ޓަވަރުތައް ރައީސުލްޖުމްހޫރުއްޔާއަށް ސާފުވާންޖެހޭނެ ކަމަށާއި، އަސްލަމް ވަޑައިގެންނެވި ޓަވަރަކީ އިންޑިޔާގެ ސަފީރު ދިރިއުޅުއްވާ ޓަވަރުތޯ ޔަގީން ކުރެއްވުމަށްފަހު އޭގެ ތެދު މައުލޫމާތު ރައީސް މުއިއްޒުއަށް ދެއްވުމަށެވެ.

ރައީސް މުއިއްޒު އެފަދައިން ވިދާޅުވެފައިވަނީ އެމްޑީޕީ ދޫކުރައްވައި، ޕީއެންސީއަށް ގުޅިވަޑައިގެންނެވި 13 މަޖިލިސް މެންބަރުން އެ ޕާޓީއާ ގުޅިވަޑައިގެންނެވި ޖަލްސާގައި ވާހަކަދައްކަވަމުންނެވެ. އެހެން ކަމުން މަޖިލިސް ރައީސް އަސްލަމް އަދި އެމްޑީޕީގެ އެހެން މެންބަރުންތަކެއް އަމީން އެވެނިއު އިން ފެނުމަކީ، އޭގެ ސަބަބުން ހިނގި ކަމެއް ކަމުގައި ބައެއް ފަރާތްތަކުން ބުނަމުން ދިޔައެވެ.