ޝަހީބުގެ ޖަވާބު؛ މަށެން ނޫން، އޭނާ ގާތު އަހާ!
ޝަހީބުގެ ނޫސްވެރިންގެ ބައްދަލުވުމަކީ ސަރުކާރަށް ލިބޭ ލުޔަކަށްވުރެ ބޮޑަށް، އިތުރު ބޮލުގެ ރިހުމަކަށް ވާނެ
ރައީސުލްޖުމްހޫރިއްޔާ އޮފީހުގެ އިސް ތަރުޖަމާނު، މުޙައްމަދު ޝަހީބު
އައު ސަރުކާރަށް ގިނަ ދުވަސްތަކެއް ވެގެން ދިޔައިރުވެސް، ސަރުކާރުގެ ތަރުޖަމާނަކު ހަމަޖެއްސުން ލަސްވެގެން ގިނަ ބައެއްގެ ނުރުހުން އަމާޒުވީއިރު، އެތައް ބަޔަކު ވަނީ އެކަމަށް ފާޑުވެސް ކިޔާފައެވެ. ދުވަސް ގަނޑެއް ފަހުން، އެންމެ ފަހުން ސަރުކާރުން ވަނީ ތަރުޖަމާނަކުވެސް ހަމަޖައްސާފައެވެ. ނޫސްވެރިންނަށް އަދި އާންމު ރައްޔިތުންނަށްވެސް އައު ނަމެއް ނޫނެވެ. އައު މޫނެއްވެސް ނޫނެވެ. ދެކެފަރިތަ، އަދި އެހާމެ ދަންނަ މޫނެކެވެ. ޗީފް ސްޕޯކްސްޕަރސަންގެ މަގާމަށް ހަމަޖެއްސީ، ކުރީގެ ނޫސްވެރިޔާ މުޙައްމަދު ޝަހީބެވެ.
ސަރުކާރުގެ ތަރުޖަމާނުގެ މަގާމަށް ޝަހީބު ހަމަޖެއްސުމުންވެސް އާންމުންގެ ފާޑުކިޔުން އަމާޒުވިއެވެ. މީގެ ކުރިން ނޫސްވެރިންނާއި އަދި މީޑިއާތަކާމެދު އޭނާ ކަންތައް ކުރައްވާފައި ވާގޮތުންނެވެ. މީގެ ކުރިން ޝަހީބު ވަނީ މޯލްޑިވްސް ބްރޯޑްކާސްޓިންގ ކޮމިޝަނުގެ ރައީސްކަން ކުރައްވާފައެވެ. އެ މަގާމުގައި ހުންނަވައިގެން ޝަހީބު ވަނީ އޭރު އޮތް ސަރުކާރަށް ފާޑު ކިޔަމުން އައި މީޑިއާތަކަށް ފިޔަވަޅުއަޅުއްވާފައެވެ. މީޑިއާތައް ބޮޑެތި އަދަދުތަކުން ޖޫރިމަނާ ކުރެއްވިއިރު، މީޑިއާތައް ބަންދުކޮށް، ނޫސްވެރިންގެ އަޑު ކަނޑުވާލުމަށް ޝަހީބު ވަނީ މަސައްކަތް ކުރައްވާފައެވެ. އެފަދަ ތާރީޚެއް އޮތް ބޭފުޅަކު، ސަރުކާރުގެ ތަރުޖަމަނާކަށް ހަމަޖެއްސެވުމުން، ފާޑުނުކިޔަންވީ ހަމަ އެއްވެސް ސަބަބެއް ނެތެވެ. އާދައިގެ ބަހުރުވައިން ދަންނަވާނަމަ، އެއީ ސަރުކާރުން ނޫސްވެރިންގެ މޫނުމަތީގައި ޖެހި ތަފާލެކެވެ!
މަގާމަށް ހަވާލުވެ ވަޑައިގެންފަހުން، ޝަހީބު އަންނަނީ ރައީސުލްޖުމްހޫރިއްޔާގެ އޮފީހުގައި ނޫސްވެރިންގެ ބައްދަލުވުންތައް ބާއްވަމުންނެވެ. ހަފުތާއަކު އެއްފަހަރު ސަރުކާރުން ބާއްވާ އެ ނޫސްވެރިންގެ ބައްދަލުވުމަށް، ނޫސްވެރިން ދަނީ ގިނަ ސުވާލުތަކާ އެކުއެވެ. ޚާއްސަކޮށް ސަރުކާރުގެ ވައުދުތަކާއި، ސިޔާސަތުތަކާ ގުޅޭ ސުވާލުތައް ހިފަައިގެންނެވެ. ބައެއްފަހަރު ހަވާސާގެ ބޭރުން ސަރުކާރުން ކުރައްވާ ކަންކަމާ ގުޅިގެން، ނޫސްވެރިން ސުވާލުވެސް ކުރެއެވެ. ނޫސްވެރިންގެ ބައްދަލުވުމެއް ބާއްވާކަން އަންގައި ސަރުކާރުން ފޮނުވާ މެސެޖުގައި ދާދިވފަހުން އަދި މާ ފައްކާ ކަމެއް ކޮށްފައި އެބައޮތެވެ. ނޫސްވެރިން ކުރަން ބޭނުންވާ ސުވާލުތަކުގެ ދާއިރާތައް، ވަކި ވަގުތެއްގެ ކުރިން އަންގަވައިދެއްވުމަށް އެދެއެވެ. ނޫސްވެރިން އެ ދާއިރާތައް އަންގައެވެ. އެހެންކަމަށް ވެއްޖިއްޔާ، ތަންކޮޅެއް ހަރުދަނާ ނުވަތަ ތާކުންތާކުޖެހޭ ޖަވާބެއްވެސް ލިބެންވާނެތާއެވެ!
ޝަހީބުގެ ނޫސްވެރިންގެ ބައްދަލުވުމަކީ، ސަރުކާރަށް ލިބޭ ލުޔަކަށްވުރެ ބޮޑަށް. އިތުރު ބޮލުގެ ރިހުމަކަށް ވާނެކަން ކަށަވަރެވެ. އެއީ ޝަހީބު ދެއްވާ ޖަވާބުތަކުންނެވެ. މިސާލެއް ދަންނަވާނަމެވެ. ދާދި ފަހުން، ސަރުކާރަށް ފާޑުކިޔާ ދެ ނޫހެއް ބުލޮކުކޮށްފައިވަނީ، އެއީ ރަޖިސްޓްރީކޮށްގެން ހިންގާ ތަންތަނަށް ނުވާތީ ކަމަށް ބުނެއެވެ. މިދިޔަ ބުރާސްފަތި ދުވަހު ރައީސުލްޖުމްހޫރިއްޔާގެ އޮފީހުގައި އޮތް ނޫސްވެރިންގެ ބައްދަލުވުމުގައި އެކަމާ ގުޅޭގޮތުން ސުވާލު ދެންނެވުމުން ޝަހީބު ވިދާޅުވީ، މިނިސްޓަރ އޮފް ސިޓީސް، ލޯކަލް ގަވަރންމަންޓް އެންޑް ޕަބްލިކް ވޯރކްސް، އާދަމް ޝަރީފް އުމަރާ އެކަމާގުޅޭ ސުވާލު ކުރެއްވުމަށެވެ. އެއްގޮތަކަށްވެސް އެކަން ކުރެއްވީ، ކޮން ވުޒާރާއެއް ނުވަތަ އިދާރާއަކުން އަންގަވައިގެން ކަމެއް، ޝަހީބަށް އެނގިވަޑައެއްނުގަންނަވައެވެ. ޝަހީބުގެ ހަަމައެކަނި ޖަވާބަކީ، "އެކަން ކުރީ ރައީސް އޮފީހުން އަންގައިގެނެއް ނޫން" މިއެވެ.
ކޮމިއުނިކޭޝަން އޮތޯރިޓީ އޮފް މޯލްޑިވްސް (ކޭމް)ގެ ބެލެނިވެރި ފަރާތަކީ، މިނިސްޓްރީ އޮފް ސިޓީސް، ލޯކަލް ގަވަރންމަންޓް އެންޑް ޕަބްލިކް ވޯރކްސް ކަމަށްވާއިރު، އެ މިނިސްޓްރީގެ މިނިސްޓަރަށް އެ ސުވާލު ދެންނެވުމުން ވިދާޅުވީ، "ނޮޓް މީ" ނުވަތަ "އަހަރެންނެއް ނޫން" މިހެންނެވެ. ދެންވެސް އެ ބައްދަލުވުމުގެ އިތުރުން، މީގެ ކުރިން ޝަހީބު ބާއްވަވާފައިވާ ނޫސްވެރިންގެ ބައްދަލުވުމުގައިވެސް، ގިނަ ސުވާލުތަކަށް ޝަހީބަށް ޖަވާބު ދެއްވިފައެއް ނުވެއެވެ. އަބަދުވެސް، ކޮންމެވެސް އެހެން ފަރާތެއްގެ ގާތު އެހުމަށް ޝަހީބު އެދިވަޑައިގަންނަަވައެވެ. ގައިމު ސަރުކާރުގެ ތަރުޖަމާނަށް މިކަންކަން ސާފުވެވަޑައިގެންފައި ނެތުމަކީވެސް މައްސަލައެއްތާއެވެ!
އިންޑިއާ ސިފައިންގެ މައްސަލައިގައި ސުވާލު ދެންނެވުމުންވެސް ޝަހީބު ދެއްވަނީ ހަމަ އެފަދަ ޖަވާބެކެވެ. ވިދާޅުވީ އަދިވެސް އަދަދު ކަށަވަރުނުވާ ކަމަށެވެ. "ޕްލަސްއެއް ނުވަތަ މައިނަަސްއެއް" އަތުވެދާނެ ކަމަށްވެސް ޝަހީބު ވިދާޅުވިއެވެ. އަދަދުގެ ކަންތަކާއި އަދި އެ މައްސަލައިގެ ކަންކަން، މިނިސްޓްރީ އޮފް ޑިފެންސްގައި އެހުމަށްވެސް ޝަހީބު ވަނީ އެދިވަޑައިގެންފައެވެ. ހަމަ އަޖައިބުވެއްޖެއެވެ. އެހެނީ، ނޫސްވެރިންގެ ބައްދަލުވުން އޮންނަ ދުވަހުގެ އެއް ދުވަސް ކުރިން ސުވާލުގެ ދާއިރާތައް ފޮނުވަން އެދިގެން، ނޫސްވެރިން އެ ދާއިރާތައް ވެސް ފޮނުވައެވެ. އެހެންކަމުން، ދުރާލައި ޝަހީބަށް ތައްޔާރުވެސް ވެވަޑައިގެންނެވެން ވާނެތާއެވެ. ކޮންމެވެސް ވަރަކަށް "ހޯމް ވޯރކް" ހައްދަވައިގެން ނޫސްވެރިންގެ ބައްދަލުވުމަށް ވަޑައިގަންނަވާ ނަމަތާއެވެ!
ޝަހީބުގެ ޖަވާބުތަކުން އަމިއްލަ ޚިޔާލެއްވެސް ހިއްސާކޮށްލެއްވިދާނެއެވެ. ކީއްކުރާ ތަރުޖަމާނެއްތޯއެވެ؟ ޝަހީބުގެ ޖަވާބަކީ، ކޮންމެވެސް އެހެން ތަނެއްގައި އެހުމަށެވެ. އެހެންވީއިރު، މިއީ ކީއްކުރާ ތަރުޖަމާނެއްތޯއެވެ؟ ސަރުކާރުން ކޮންމެ ހަފުތާއަކު ބާއްވާ ނޫސްވެރިންގެ ބައްދަލުވުމަށް މުޅި ވަޒީރުންގެ މަޖިލީހުގެ މެމްބަރުން ގެންދަވަންވީ ނޫންތޯއެވެ؟ ގައިމު އޭރުން، ސީދާ އެ ވަޒީރަކާ ސުވާލު އަމާޒުކުރެވޭނެއެވެ. މިހާރަށްވުރެ، ތަންކޮޅެއް ސާފު ޖަވާބެއްވެސް ލިބިދާނެއެވެ! އަޖައިބެކެވެ. ތަރުޖަމާނަށް އެނގިވަޑައިގަންނަވާ ހަމަ އެއްކަމެއްވެސް އޮތީއެއް ނޫނެވެ.
