އާރަށަށް ވަޑައިގަންނަވާ ހަފްތާއަކު 7 ލައްކަވުރެ ގިނަ ފައިސާ ހަރަދު ކުރާ މައްސަލަ: ''އެއީ ރައީސްއަށް ލިބިވަޑައިގަންނަވާ އިހުތިޔާރެއް''

ރައީސުލްޖުމްހޫރިއްޔާ ޑރ.މުހައްމަދު މުއިއްޒު އާރަށަށް ވަޑައިގަންނަވާ ހަފްތާއަކު 7 ލައްކަ އަށްވުރެ ގިނަ ފައިސާ ޚަރަދު ކުރައްވާ ކަމަށް ދެކެވޭ ވާހަކަތަކަށް ސީދާ ޖަވާބެއް ނުދެއްވައި، އެއީ ރައީސްއަށް ލިބިވަޑައިގަންނަވާ އިހުތިޔާރެއް ކަމަށް ރައީސް އޮފީހުގެ ތަރުޖަމާން ހީނާ ވަލީދު ވިދާޅުވެއްޖެެއެވެ.

ބުދަ ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ރާއްޖެއެމްވީގެ ނޫސްވެރިޔާ ވަނީ ރައީސް އާ ރަށަށް ވަޒީރުންނާއެކު ވަޑައިގަންނަވާއިރު، ކޮންމެ ހަފްތާއަކު ވެސް މިކަމަށް 7 ލައްކައަށްވުރެ ބޮޑު އަދަދެއް ހަރަދުވާ ކަމަށް މައުލޫމާތު ލިބިފައިވާކަން ފާހަގަކޮށްފައެވެ. އަދި މިކަމުގެ ހަގީގަތް ހާމަ ކޮށްދިނުމަށް ސުވާލު ކޮށްފައިވެއެވެ.

މިސުވާލަށް ޖަވާބުދެއްވަމުން ހީނާ ވިދާޅުވީ ރައީސް މުއިއްޒު، ރައީސް ކަމުގައި ހުންނެވުމުގެ ސަބަބުން އެމަނިކުފާނަށް އާރަށަށް ވަޑައިގެންނެވުމުގެ އިޚްތިޔާރު ލިބޭ ކަމަށެވެ. އަދި އާރަށުގައި ވަޒީރުންނާއެކު ބައްދަލުވުންތައް ބޭއްވުމުގެ އިޚްތިޔާރު ވެސް ލިބިވަޑައިގަންނަވާ ކަމަށް ހީނާ ވިދާޅުވިއެވެ. ނަމަވެސް އެކަމަށް ހޭދަވާ ޚަރަދުގެ ތަފްސީލު ދެއްވާފައިނުވެއެވެ.

މައުލޫމާތު ލިބިފައިވާ ގޮތުގައި އާއްމު ގޮތެއްގައި ރައީސް މުއިއްޒު އާރަށަށް ހަފްތާއަކު ދެދުވަހު ވަޑައިގަންނަވައެވެ. އަދި އެމަނިކުފާނުގެ އަނބިކަނބަލުން ސާޖިދާ މުހައްމަދު ވަރަށް ގިނައިން އެރަށަށް ވަޑައިގަންނަވައެވެ.

ރާއްޖޭގެ މާލީ ހާލަތު ދަށް ކަމަށް ބުނެ، ޚަރަދު ކުޑަކުރުމުގެ ފިޔަވަޅުތަކެއް އަޅަމުންދާ ކަމަށް ސަރުކާރުން ބުނެއެވެ. ނަމަވެސް އާރަށަށް ބޮޑު ހޭދައެއް ކުރުމާއި، ސަރުކާރުގެ ދަތުރުތަކަށް ބޮޑު ހޭދައެއް ކުރާތީ ގިނަ ބައެއްގެ ފާޑު ކިޔުން ވެސް ސަރުކާރަށް ވަނީ އަމާޒުވެފައެވެ. އަދި ޚަރަދު ކުޑަ ކުރަންޖެހޭ ގޮތަށް ހަރުދަނާ ގޮތެއްގައި އެއްވެސް ފިޔަވަޅެއް އަޅާފައިނުވާ ކަމަށް ގިނަ ބަޔަކު ދަނީ ބުނަމުންނެވެ.

މީގެ އިތުރުން ރައީސް މުއިއްޒުގެ ވެރިކަމުގައި އާރަށުގައި 24 ގަޑީއިރު ސިފައިންގެ ޚާއްސަ ޔުނިޓްތަކުން ޑިއުޓީ ކުރާ ގޮތަށް ހަމަޖައްސަައި، ސެކިއުރިޓީ ވެސް ވަނީ ވަރުގަދަކޮށްފައެވެ.