ރައީސް އެދިވަޑައިގަތީ ބޯހިޔާވަހިކަމަށް ސަރުކާރުން ފަހިކޮށްދޭ ފުރުސަތުތަކުގެ ބޭނުން ހިފުމަށް

ރައްޔިތުންނަށް ބޯހިޔާވަހިކަން ފަހިކޮށްދިނުމަށް ސަރުކާރުން ފަހިކޮށްދޭ ފުރުސަތުތަކުގެ ބޭނުން އޭގެ އެންމެ ރަނގަޅު ގޮތުގައި ހިފުމަށް ރައީސް ޑރ. މުޙައްމަދު މުއިއްޒު އެދިވަޑައިގެންފިއެވެ.

ތިލަދުންމަތީ އުތުރުބުރީގެ ރަށްތަކަށް ޒިޔާރާތްކުރެއްވުމަށް ރައީސް މުއިިއްޒު މިހާރު ކުރައްވަމުން ގެންދަވާ ދަތުރުފުޅުގެ ތެރެއިން ހއ. މޮޅަދުއަށް ވަޑައިގެން ރައްޔިތުންނާ ބައްދަލުކުރައްވައި ވިދާޅުވީ 'އެކްސެސް ޓު ހައުސިންގ އަކީ އެމަނިކުފާނުގެ ސިޔާސަތު ކަމަށެވެ. އޭގެ މާނައަކީ ގޯތި ނުލިބޭ އެއްވެސް ރައްޔިތަކު ނުބެހެއްޓުން ކަމަށް އެމަނިކުފާނު ވިދާޅުވިއެވެ.

ގެދޮރުގެ މައްސަލަ ހައްލުކުރުމަކީ އެމަނިކުފާނު އެންމެ ބޮޑު އިސްކަމެއް ދެއްވާ އެއް ކަންތައްކަން ފާހަގަކުރައްވައި ވިދާޅުވީ، އަމާޒަކީ އަމިއްލަ ގޯތީގައި ގެ އެޅުމުގެ ފުރުސަތު ފަހިކޮށްދީގެން ވިޔަސް، ނޫނީ ސަރުކާރުން ހިންގާ ހައުސިންގ ސްކީމަކުން ފުލެޓު ނޫނީ ރޯހައުސް ލިބިގެން ވެސް އެ މައްސަލަ ހައްލުކުރުން ކަމަށެވެ.

ރައީސް ވިދާޅުވީ މުޅި ރާއްޖެއަށް މިހާރު ހުޅުވާލާފައި އޮތް ފުރުސަތަކީ ލިބޭ ގޯތިތަކުގައި ނޫނިއްޔާ އަމިއްލަ ގޯތިތަކުގައި ގެ އަޅަން ލުއި ލޯނު ނެގުމުގެ ފުރުސަތު ކަމަށެވެ.

ރައީސް ވިދާޅުވީ ފަސް ޕަސެންޓް އިންޓްރެސްޓް ރޭޓުގައި އިސްލާމިކް ފައިނޭންސް ސްކީމެއް މިހާރު އެ އޮތީ ހުޅުވާލާފައިކަމަށާއި މިފަދަ ރަށްތަކަށް އެއް މިލިއަން ރުފިޔާ އާއި ހަމައަށް ލޯނު ނެގޭނެ ކަމަށެވެ. އަދި އަމިއްލަ ގޯތީގައި ގެއެއް އަޅަން އެ ލޯނު ނަގާކަށް، އިކުއިޓީއެއް ބަހައްޓާކަށް ނުޖެހޭނެކަމަށް އެމަނިކުފާނެ ވިދާޅުވިއެވެ. އަދި މިއަހަރުގެ ޖޫން، ޖުލައި ހިސާބަށް ލޯނުތައް ދޫކުރަން ފެށޭނެ ކަމަށް އުއްމީދުކުރައްވާ ކަމަށް ވެސް އެމަނިކުފާނު ވިދާޅުވިއެވެ.

މޮޅަދުއަށް އިޝާރާތްކުރައްވައި ރައީސް ވިދާޅުވީ ރަށުގެ ލޭންޑްޔޫސް ޕްލޭން މިހާރު އޮތީ ހަދާފައި ކަމަށާއި، އެއީ ޖާގަ ތަނަވަސް ރަށެއް ކަމަށެވެ. އެހެންކަމުން ކައުންސިލުން އުސޫލުގެ ތެރެއިން ރަށުން ގޯތި ބޭނުންވާ ހުރިހާ ފަރާތްތަކަށް އެކަން ހަމަޖައްސައިދިނުމަށް ރައީސް ވަނީ އެދިވަޑައިގެންފައެވެ.

ރަށަށް ދިމާވެފައި އޮތް އެންމެ ބޮޑު އެއް މައްސަލައަކީ ކަރަންޓާއި، ފެނާއި ނަރުދަމާގެ މައްސަލައެވެ. ރައީސް ވިދާޅުވީ ކަމާ ބެހޭ މުއައްސަސާތަކާއި ރަށުގެ ކައުންސިލާ ގުޅިގެން މަޝްވަރާތައް ކުރުމަށްފަހު، އެކަމަށް ވަރަށް އަވަސް ހައްލެއް ގެނެސްދެއްވާނެ ކަމަށެވެ.

ޚާއްސަގޮތެއްގައި ބިންތައް ނަގައިގެން ޓޫރިޒަމްގެ ދާއިރާގައި މަސައްކަތްކުރަން ބޭނުންވާ މީހުންނަށް އެ ޚިދުމަތް ރަނގަޅު ފެންވަރަކަށް ލިބޭނެ މަގުތައް ސަރުކާރުން ތަނަވަސްކޮށްދެއްވާނެ ކަމަށް ވިދާޅުވިއެވެ.

ރައީސްގެ މި ދަތުރުފުޅުގެ ތެރެއިން މޮޅަދޫގައި އޭޓީއެމްއެއް ބެހެއްޓުމަށް ގައުމީ ބޭންކު، ބީއެމްއެލްއާއި، ރަށު ކައުންސިލާ ދެމެދު ވަނީ އެއްބަސްވުމުގައި ސޮއިކޮށްފައެވެ.

ބޯހިޔާވަހިކަމަކީ ރާއްޖޭގައި ހައްލުނުވެ އޮތް ޒަމާންވީ މައްސަލައެކެވެ. މި ސަރުކާރު ވެރިކަމަށް އައީވެސް އެހެން ސަރުކާރުތަކެކޭ އެއްގޮތަށް އެ މައްސަލަ ހައްލުކޮށްދިނުމުގެ ވައުދާއެކުއެވެ.

ޚާއްސަގޮތެއްގައި، ފަސް އަހަރުގެ ދައުރު ނިންމާލާއިރު ރާއްޖޭގައި ބޯހިޔާވަހިކަން ނުލިބި އެއްވެސް ރައްޔިތަކު ނުހުންނާނެ ކަމަށް ރައީސް މުއިއްޒު ވަނީ މީގެ ކުރިން ވިދާޅުވެފައެވެ.