"ސަރުކާރުގެ ނުފޫޒުން ޝަރުއީ ދާއިރާ މިނިވަންވާ ހިސާބުން ރައީސް ޔާމީން މިނިވަންވާނެ"

ސަރުކާރުގެ ނުފޫޒުން ޝަރުއީ ދާއިރާ މިނިވަންވާ ހިސާބުން ކުރީގެ ރައީސް އަބްދުﷲ ޔާމީން މިނިވަންވާނެކަމަށް، ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވި ކަމަށާއި، އެހެންކަމުން ކުރީ ސަރުކާރުން ސިޔާސީ ހުކުމުގައި ތިބި ފަރާތްތައް މިނިވަންކުރިގޮތަށް މި ސަރުކާރުން އަމަލެއް ނުކުރާނެކަމަށް ބުނެ ސަރުކާރުން ރައީސް ޔާމީން މިނިވަން ނުކުރާނެކަމަށް މިވަނީ ވަކާލާތުކޮށްފައެވެ.

ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ނޫސްވެރިން ވަނީ ކުރީގެ ރައީސް އަބްދުﷲ ޔާމީން މިނިވަންކުރުމާ ގުޅޭގޮތުން އެތައް ފަހަރެއްގެ މަތިން ސުވާލު ދަންނަވާފައެވެ. ނަމަވެސް ރައީސް ޑރ. މުހައްމަދު މުއިއްޒު ކެމްޕޭންގެ ތެރޭގައި އެތައް ރަށަކަށް ވަޑައިގެން ވެވަޑައިގެންނެވި ވައުދުފުޅު ނުފުއްދަވަނީ ކީއްވެގެންތޯ ކުރާ ސުވާލުތަކަށް ސަރުކާރުން ދެނީ އެންމެ ޖަވާބެކެވެ. އެއީ ރައީސް ޔާމީން ހުންނަންޖެހޭނީ ޖަލުގައިހެން ވިދާޅުވާ ގޮތަކަށެވެ.

ރައީސް ޔާމީންގެ ހުކުމާ ދެކޮޅަށް މިހާރުގެ ސަރުކާރުގައި ތިބި ބޭފުޅުން އިހްތިޖާޖު ކުރައްވަފާނެތޯ ދެންނެވި ސުވާލުގައި ޝަހީބު ވިދާޅުވީ، އެއީ އޭނާ ޖަވާބު ދެއްވަންޖެހޭ ސުވާލެއް ނޫންކަމަށެވެ. ނޫސްވެރިޔާ ދެންނެވީވެސް މިފަދައަކުން ނޫންނެވެ. ނަމަވެސް ސުވާލު މުޅިން ބަދަލުކޮށްލައްވައި ޝަހީބު ވިދާޅުވީ، އެބޭފުޅުން ކުރައްވާނެ ކަމެއް އެނގިވަަޑައިގަންނަވާނީ އެބޭފުޅުންނަށް ކަމަށާއި، އެއީ އޭނާއަށް ދެއްވޭނެ ޖަވާބެއް ނޫންކަމަށެވެ. ކަމެއް ބޮލުން "ކަޓުވާލަން" މިއަށްވުރެ ފަސޭހަ ޖަވާބެއްވެސް ނޯންނާނެއެވެ.

ދެން އިސްތިއުނާފުގެ މަރުހަލާ ކޯޓުގައި ކުރިއަށްދާކަމަށާއި، ކޯޓާބެހޭ ވާހަކައެއް ޝަހީބުލައްވައި ދެއްކުވީމައި އޮޅުންއަރާގޮތް ވާނެކަމަށް ވިދާޅުވެ، އަނެއްކާވެސް ރައީސް ޔާމީން މިނިވަންކުރުމާގުޅޭ ސުވާލަށް ޖަވާބެއް ނުދެއްވިއެވެ. ވިދާޅުވީ ކޯޓުގެ ވާހަކައެއް އޭނާއަކަށް ނުދެއްކެވޭނެ ކަމަށެވެ. އަދި ކޯޓުގެ މަރުހަލާއެއްގެ ވާހަކަދައްކާނަމަ، ހައިކޯޓުގައި ހިނގަމުންދާ ކަމެއް ކަމުން، ހައިކޯޓުގައި އެ ސުވާލު ކޮށްލުން ރަނގަޅުވާނެ ކަމަށެވެ. ނުވަތަ އެގޮތް އެންމެ ރަނގަޅުވާނޭ ކަމަށެވެ. ޝަރުއީ ދާއިރާގެ ކަންކަން އެ ބޭފުޅުން މިނިވަންކަމާއެކު ކުރިއަށް ގެންދެވީމައި ރަނގަޅުވާނެ ކަމަށެވެ. ޖަވާބެއް ނުދެއްވައި، ޝަރުއީ ދާއިރާއަށް ހުރިހާ ކަމެއް "ކަނޑާލީ"އެވެ.

ރައީސް ޔާމީން މިނިވަންކުރުމަށްޓަކައި ޝަރުއީ ނިޒާމްގެ ތެރެއަށް އަތްނުބާނާނެ ކަަމަށް ސަރުކާރުން ބުނަމުންދެއެވެ. ޝަހީބު އަނެއްކާވެސް ތަކުރާކުރެއްވީ އެވާހަކައެވެ.

ރައީސް އިބްރާހީމް މުހައްމަދު ސާލިހު ވެރިކަމަށް ވަަޑައިގެން، ސިޔާސީ ގޮތުންނާއި ނުހައްގުން ޖަލަށްލާފައި ތިބި ފަރާތްތައް މިނިވަންކުރެއްވި ކަމަށާއި، ރައްޔިތުން އުއްމީދުކުރަނީ އެގޮތަށް ރައީސް ޔާމީންވެސް މިނިވަންވެވަޑައިގަތުން ކަމަށް ނޫސްވެރިޔާ ދެންނެވުމުން ތަރުޖަމާނު ޝަހީބު ވިދާޅުވީ، ކުށްކޮށްފައި ތިބި ސިޔާސީ ފަރާތްތަކެއް ކުރީ ސަރުކާރުން މިނިވަންކުރި ވާހަަކަ މީގެ ކުރިންވެސް ދެއްކިކަމަށާއި، އެ ވާހަކަ ތަކުރާރުކޮށް ދައްކަމުންދާ ކަމަށެވެ. ކުރީ ސަރުކާރުން ޖުޑިޝަރީ ތެރެއަށް އަތްބޭނިކަމަށާއި، ރައީސް މުއިއްޒުގެ ސަރުކާރުން އެކަން އެގޮތަކަށް ނުކުރާނެކަމަށެވެ.

އަދި ރައީސް ޔާމީންގެ އަނބިކަނބަލުން ފާތިމަތު އިބްރާހީމާއި ރައީސް މުއިއްޒު މަޝްވަރާކުރެއްވި ކަމެއްވެސް ޔަގީންކޮށެއް ނުދެއްވުނެވެ. ރައީސް ޔާމީނާ މަޝްވަރާ ނުކުރެވެނީ ހުކުމެއްގައި ހުންނެވުމުން ކަމަށް ވިދާޅުވުމުން، މެޑަމް ފާތިމަތާވެސް ވާހަކަ ދެއްކޭނެކަމަށާއި، އެކަން ކުރެއްވިތޯ ދެންނެވި ސުވާލަށް ޝަހީބު ދިނީ ފިނި ޖަވާބެކެވެ.

މީގެ އިތުރުން ރައީސް ސާލިހުގެ ސަރުކާރުން ޔާމީންގެ މައްޗަށް ކުރި ހުކުމަކީ ޝަރުއީ ނިޒާމުގެ ތެރެއަށް އަތްބާނައިގެން ކޮށްފައިވާ ސިޔާސީ ހުކުމެއް ކަމަށާއި، ވެރިކަން ލިބިވަޑައިގެންފިނަމަ ސަރުކާރުން ޝަރީއަތުގެ މައްޗަށް ނުފޫޒު ފޯރުވުން ހުއްޓާލާނެކަމަށް ރައީސް މުއިއްޒު ވިދާޅުވިކަމަށާއި، އެހެންކަމުން ރައީސް ޔާމީން ކޯޓުން މިނިވަން ވަންދެން ބަލަބަލައި ތިބޭނެކަމަށް ދޭހަވާފަދަ މޭރުމަކުން ޝަހީބު ޖަވާބުދެއްވިއެވެ.

ޝަހީބު ވިދާޅުވީ ރައީސް ޔާމީން މިނިވަންވުން އޮތީ ޖުޑިޝަރީގެ އަތްމަތީގައި ކަމަށެވެ. އެއީ ރައީސް މުއިއްޒު ކުރައްވާނެ ކަމެއް ނޫންކަމަށެވެ. އަދި ސަރުކާރާގުޅޭ ކަމެއްވެސް ނޫންކަމަށެވެ. އަދި އެކަމުގެ ތެރެއަށް ސަރުކާރުން ވަދެ ނުފޫޒު ނުފޯރުވާނެ ކަމަށްވެސް ޝަހީބު ވިދާޅުވިއެވެ.

މީގެ އިތުރުން، ރައީސް ޔާމީން ގެއަށް ބަދަލުކުރީ ރައީސް މުއިއްޒުގެ އެދިވަޑައިގަތުމަށް ކަމަށާއި، އެއީ ކުރީ ސަރުކާރުގެ "ހެޔޮފުޅު"ކަމުން ކުރި ކަމެއް ނޫންކަމަށެވެ.

ރިޔާސީ ބަހުސްގައި ރައީސް މުއިއްޒު ވިދާޅުވެފައިވަނީ، ޓިކެޓު ހަވާލުކުރެއްވީ ފުރިހަމަ އިތުބާރާއި ތާއީދާއެކުގައި ރައީސް ޔާމީންކަމަށެވެ. އަދި ރައްޔިތުން އިތުބާރުކޮށް، ވެރިކަން ހަވާލުކުރާ ދުވަހަކީ ރައީސުލްޖުމްހޫރިއްޔާގެ އޮފީހުން ކޯޓުތަކަށް އަތްބޭނުން ނިމުމަކަށް އަންނާނެ ދުވަސްކަމަށެވެ. އަދި އެ ދުވަހު ރައީސް ޔާމީން މިނިވަންވާނެ ކަމަށެވެ. ރައީސް ޔާމީން (ސިޔާސީ ނުފޫޒާއެކު) އެ ހުންނެވީ ނުހައްގު ހުކުމެއް ކޮށްފައިކަމަށާއި، އެ މަނިކުފާނަކީ މައުސޫމް ބޭފުޅެއް ކަމަށެވެ. އަދި އެ މަނިކުފާނު މިނިވަންވެވަޑައިގަންނަވާނެ ކަމަށާއި، އެއީ ސިޔާސީ ނުފޫޒު ނިމުމަކަށް އަންނާނެ ދުވަސް ކަމަށް ރައީސް މުއިއްޒު ވިދާޅުވެފައިވެއެވެ.

ޕީޕީއެމް/ޕީއެންސީގެ އޮފީހުގައި މުއިއްޒުގެ މައި ކެމްޕެއިން ޓީމާއެކު، ބޭއްވެވި ފުރަތަމަ ބައްދަލުވުމުގައި ވިދާޅުވީ، ވެރިކަން ލިބިވަޑައިގަތުމުން ފުރަތަމަ ދުވަހުގެ އެންމެ ޚާއްސަ އިސްކަމެއް އޮންނާނީ ޔާމީން ޖަލުން ގެއަށް ބަދަލުކުރެއްވުން ކަމަށެވެ. ދެވަނަ ބުރަކަށް ދަންޏާ، ދެވަނަ ބުރުގައި ކާމިޔާބުވެވަޑައިގެން، ފުރަތަމަ ޕޯޑިއަމަށް އަރުއްވައި، ފުރަތަމަ ދައްކަވާނެ ވާހަކައަކީވެސް، އޭރު ހުންނެވި ރައީސް (ރައީސް ސާލިހަށް) ޔާމީން ގެއަށް ބަދަލުކުރައްވަން ކަމަށް މުއިއްޒު ވިދާޅުވިއެވެ. އަދި ވެރިކަމާ ހަވާލުވެވަޑައިގަންނަވާ ފުރަތަމަ ދުވަހުވެސް، އެހާތަނަށްވެސް ރައީސް ޔާމީންބގެއަށް ނުގެނެސް ބަހައްޓަވައިފިނަމަ، ރައީސް ޔާމީން ފުރަތަމަ ގެއަށް ގެންނަވާނެ ކަމަށެވެ. މާނައަކީ މަސައްކަތުގެ ގިއަރު އިތުރަށް މަތިކުރަމުން ގޮސް، އެކަން ކާމިޔާބުކޮށް އެ މަނިކުފާނު މިނިވަން ކުރައްވާނެކަމަށެވެ.

މިއީ ހުސް ރައީސް މުއިއްޒު ދެއްކެވި ވާހަކަތަކެވެ. އެހެންކަމުގައި ވާނަމަ އަދިވެސް ރައީސް އޮފީހުންނާއި، ސަރުކާރުން ޝަރުއީ ދާއިރާއަށް އަތްބާނައިގެން ރައީސް ޔާމީންގެ މައްސަލަ ލަސްކުރުވަނީއެވެ. ރައީސް މުއިއްޒު ވިދާޅުވީ ސަރުކާރުން ޖުޑިޝަރީއަށް އަތްބޭނުން ހުއްޓުވާ ދުވަހަކީ ރައީސް ޔާމީން މިނިވަންވާނެ ދުވަސް ކަމެކެވެ. އެހެންވީމާ އަމިއްލަ އިއުތިރާފުގައި އެ ވިދާޅުވީ ރައީސް ޔާމީން މިނިވަން ނުވާނެ ވާހަކައެވެ.