ރައްޔިތުން މަޖުލީސް ގެ ރައީސް އަބްދުއްރަހީމް އަބްދުﷲ މަޖުލީސް ގެ ރައީސް ކަމުން ވަކިކޮށް، އިސްލާމިކް މިނިސްޓަރ ޑރ.މުޙައްމަދު ސަހީމް އަލީ ސައީދު މިނިސްޓަރ ކަމުން ވަކި ކުރައްވައިފިނަމަ ރައީސް ޑރ. މުހައްމަދު މުއިއްޒުގެ ވެރިކަން ނިމުމުގެ ކޮޅުމަތި ފެންމަތިވެގެން ދާނެ ކަމީ ސައްތައިންސައްތަ ޔަޤީންކަމެއް ކަމަށް ރައްޔިތުންގެ މަޖިލީހުގެ ވެލިދޫ ދާއިރާގެ މެންބަރު މުހައްމަދު އައްބާސް ވިދާޅުވެއްޖެ އެވެ.

އައްބާސް މިފަދައިން ވިދާޅުވެފައި ވަނީ މަޖިލީހުގެ ރައީސް އަބްދުއްރަހީމް އާއި އިސްލާމިކް މިނިސްޓަރ ޑރ. ޝަހީމް މަގާމުން ވަކިކުރަން އުޅޭކަމަށް ރާއްޖޭގެ ބައެއް މީޑިއާތަކުން ބުނަމުން އަންނަ އައުމަށް އިޝާރާތް ކުރައްވާ އެކްސްގައި ކުރެއްވި ޕޯސްޓެއްގަ އެވެ.

އަންނަ އަހަރުގެ ލޯކަލް ކައުންސިލް އިންތިޚާބަށް ފަހު މަޖިލީހުގެ ރައީސް އަބްދުއްރަހީމް އާއި އިސްލާމިކް މިނިސްޓަރ ޝަހީމް މަގާމުން ވަކިކުރަން އުޅޭ ކަމަށް ބުނެ ރާއްޖޭގެ ބައެއް އޮންލައިން ނޫސްތަކުގައި ވަނީ ރިޕޯޓު ކޮށްފަ އެވެ.

އެކަމަށް އިޝާރާތް ކުރައްވައި އައްބާސް އެކްސްގައި ކުރެއްވި ޕޯސްޓުގައި ވިދާޅުވީ ރައްޔިތުން މަޖިލީހުގެ ރައީސް އަބްދުއްރަހީމް އަދި އިސްލާމިކް މިނިސްޓަރ ޝަހީމް މަގާމުން ވަކި ކުރައްވައިފިނަމަ ރައީސް މުއިއްޒުގެ ވެރިކަން ނިމުމުގެ ކޮޅުމަތި ފެންމަތިވެގެން ދާނެ ކަމީ ސައްތައިންސައްތަ ޔަޤީންކަމެއް ކަމަށެވެ.

އައްބާސް ވިދާޅުވީ ރައްޔިތުންގެ މަޖިލީސްގެ ރައީސް އަބްދުއްރަހީމް މަޖިލީސް ގެ ރައީސް ކަމުން ވަކިކުރުން ވެގެންދާނީ ރައީސް މުއިއްޒު ވެރިކަމަށް ގެންނަވަން އެންމެ ބޮޑު ޤުރުބާނީއެއް ވީ ބޭފުޅަކު ކޮށާފާ ކާޅައް ދިނުން ކަހަލަ ކަމެއް ކަމަކަށެވެ.

އަދި އަބްދުއްރަހީމް މަގާމުން ވަކިކޮށްފި ނަމަ ރައީސް މުއިއްޒު ގެ މަކަރުވެރި ސިޔާސަތު ރައްޔިތުންނަށް ބޮޑުތަނުން ހާމަވެގެންދާނެ ކަމަކަށް ވެސް އައްބާސް ވިދާޅުވި އެވެ.

އައްބާސް ވިދާޅުވީ ޑރ. ސަހީމް އަކީ ވެސް ރައީސް ޑރ.މުއިއްޒުގެ ސަރުކާރު ގެންނަވަން ވަރަށް ބުރަކޮށް މަސައްކަތް ކުރެއްވި ބޭފުޅެއްގެ އިތުރުން އެމަނިކުފާނުގެ ސަރުކާރު ކެބިނެޓުގައި ތިއްބެވި މިނިސްޓަރުންގެ ތެރެއިން އެންމެ ޤާބިލު އެއް މިނިސްޓަރު ކަމަށެވެ.

އަދި މާތްވެގެންވާ އިސްލާމްދިނާއި ޤައުމާއި ރައްޔިތުން ގެ އެންމެ މަތީ މަސްލަހަތަށް އިސްކަން ދެއްވައިގެން ނަފުސުގެ ތޯހިރުކަމުގައި ހުންނަވައިގެން އިހުލާސްތެރި ހިދުމަތްތަކެއް ކޮށްދެއްވަމުންދާ މިނިސްޓަރެއްކަން ދިވެހި ކޮންމެ ރައްޔިތަކު ގަބޫލު ކުރައްވާ ބޭފުޅެއްކަން ފާހަގަކުރާކަމަށް ވެސް އައްބާސް ވިދާޅުވި އެވެ.

އެހެން ކަމުން ރައީސް މުއިއްޒު ހަމަހޭގައި ހުންނަވާފައި އެ ދެބޭފުޅުންނާ މެދު ނުރަގަޅުކޮށް ކަންކަން ނުކުރެއްވުމަށް އެދޭ ކަމަށާއި އަދި މިކަން ކޮށްފި ނަމަ ރައީސް މުއިއްޒު ގެ މަކަރުވެރި ސިޔާސަތު ރައްޔިތުންނަށް ބޮޑުތަނުން ހާމަވެގެންދާނެ ކަމަކަށް ވެސް އަސްބާސް ވިދާޅުވި އެވެ. އަދި އަމިއްލަފުޅައް ސަންދޯއް ނުޖެހުމަށް ރައީސް މުއިއްޒަށް ނަސޭހަތްތެރިވާ ކަމަށް ވެސް އައްބާސް ވިދާޅުވި އެވެ.