ޢާއިލާއާ ދުރުގަ، ޑައެލަސިސް ހަދަމުން އަންނަ 10 އަހަރުގެ ނަސީމުގެ ވާހަކަ އަޑުއަހާނެ ހިތްވަރު އެބަ ހުރިތަ؟

ނަސީމު މަހްރާއަކީ ޢުމުރުން އެންމެ 10 އަހަރުގެ ކިޑްނީ ޕޭޝަންޓްއެކެވެ. މިހާރުވެސް ޑައެލަސިސް ހަދަމުން އަންނަ ނަސީމްގެ ދިރިއުޅުމުގައި އޭނާއަށް އުފުލަންޖެހިފައި އޮތް ހަމަ އެކަނި ހިތްދަތި ކަމަކީ އެއީއެއް ނޫނެވެ. ނަސީމު ނިސްބަތް ވަނީ، ނިރުބަވެރި އިޒްރޭލުގެ މުށްދަށުލާފައި އޮތް ޣައްޒާއަށެވެ. މިހެން ބުންޏަސް، އެ ހިތުގައި އަޅާ ވޭން އެހެން މީހަކަށް ވަޒަނެއް ނުކުރެވޭނެއެވެ. ކުއްލި ގޮތަކަށް ޑައެލަސިސް ހަދަން ޖެހިގެން ޣައްޒާގެ ދެކުނުގެ ހޮސްޕިޓަލަކަށް ނަސީމު ގޮވައިގެން ކުރި ދަތުރު މަތީގައި، ޔަހޫދީ އަސްކަރިއްޔާއިން ވަނީ ނަސީމުގެ ބައްޕަ ހައްޔަރު ކޮށްފައެވެ. އޭނާގެ ޢާއިލާއާ އަލުން ބައްދަލު ވެދާނެ ކަމުގެ އުންމީދެއް މިއަދު އެ ކުޑަކުޑަ ނަސީމުގެ ހިތަކު ނެތެވެ.

ރަފަޙުގައި ހިންގާ އަބޫ ޔޫސފް އަލް ނައްޖާރު ހޮސްޕިޓަލަށް ނަސީމު ގެނެސްދިނީ އޭނާގެ އަވަށްޓެރިއެކެވެ. ނަސީމުއަކީ ޤަވައިދުން ޑައެލަސިސް ހަދަން މަޖުބޫރުވެފައިވާ ކުއްޖެކެވެ. އެޔެއް މިއެއް ބެލުމެއް ނެތި ޔަހޫދީ އިޒްރޭލުން ޣައްޒާއަށް ދެމުންދާ ނިރުބަވެރި ޙަމަލާތަކުގައި ނަސީމު ވަނީ އޭނާގެ ޢާއިލާގެ އެހެން މެންބަރުންނާ ދެތަން ވެފައެވެ. ނަސީމުގެ ދުލުން ބޭރުވި ބަސްތަކަކީ އެ އަޑު އަހަން ބޮޑު މީހެއްގެ ހިތަށްވެސް ކުޅަދާނަ ވާނެ ފަދަ ބަސްތަކެއް ނޫނެވެ.

ހޮސްޕިޓަލާ ހިސާބަށް ނަސީމު ގެނެސްދިން އަވަށްޓެރިޔާ، އާދިލް ހަނިއްޔާ ކިޔައިދިން ގޮތުގައި އޭނާވެސް އޭރު ދިޔައީ ދަރިންކޮޅު ގޮވައިގެން ޣައްޒާގެ ދެކުނަށް ދަތުރު ކުރަމުންނެވެ. ނަސީމު ފެނި، އޭނާގެ ކަންކަން ބަލެހެއްޓުމާ ޙަވާލުވާން އެ ޢާއިލާއިން އެއްބަސްވުމަކަށް އައެވެ. ނަސީމުގެ ބައްޕަ ހައްޔަރު ކޮށްފައި ވަނީ އިޒްރޭލު އަސްކަރިއްޔާގެ ޗެކްޕޮއިންޓަކުންނެވެ.

ރެޑް ކްރެސެންޓްގެ ފަލަސްޠީނު ގޮފިން ޚަބަރު ދޭ ގޮތުގައި ޣައްޒާގެ މައި މަގުތައް މިހާރު ވަނީ، އިޒްރޭލުގެ ޢުދުވާންތަކުގައި މުޅިންހެން ސުންނާފަތިވެފައެވެ. އެމްބިއުލާންސްތަކާއި، ކުއްލި ނުރައްކަލުގެ ޙާލަތުގައި އޮޕަރޭޓް ކުރާ އެހެން އުޅަނދުތަކަށްވެސް އެ ސަރަޙައްދުތަކުން މިހާރު ދަތުރު ނުކުރެވެއޭވެސް ދެންނެވިދާނެއެވެ. ވައްޓާލާފައިވާ ބައެއް ޢިމާރާތްތަކާއި ސުންނާފަތިކޮށްފައި ވާ ބައެއް އަވަށްތަކާ ހިސާބަށް ކައިރިވެސްވެވެން ނެތެވެ. ނަސީމު ފަރުވާ ހޯދަމުން ދާ ހޮސްޕިޓަލުގެ ޙާލަތުވެސް ވަކި ރަނގަޅެއް ނޫނެވެ.

ތެލުގެ ދަތިކަން ކުރިމަތިވެ، ކަރަންޓު މައްސަލަ ޖެހޭ ކަމަށާއި، އެކަށީގެންވާ ގޮތެއްގައި ފަރުވާ ދޭނެ ޞިއްޙީ ޢާލާތްތައްވެސް ނެތް ކަމުގެ ޝަކުވާ، އެ ހޮސްޕިޓަލުގެ ޑޮކްޓަރުން ކުރެއެވެ.

ޞިއްޙީ ޚިދުމަތްތެރިންނަށް މަސައްކަތް ކުރަން ޖެހިފައި އޮތް މާޙައުލަކީ، އެފަދަ ކަމަކަށް އެންމެ އެކަށީގެންވާ ވަރަށް ވުރެ ތަކުލީފު ބޮޑު ވެއްޓެކެވެ. މުޅި ޣައްޒާ އެއްކޮށްގެން ދެކުނުގެ ސަރަޙައްދުތަކަށް ބަދަލުވެފައި ވާ އިރު، ޕޭޝަންޓުންގެ ޢަދަދުވެސް އިތުރު ވެފައި ވަނީ އިންތިހާއަށެވެ. ކޮންމެ ދުވަހަކުވެސް ކެޕޭސިޓީއަށް ނުކަތާ ވަރަށް ޑައެލިސިސް މެޝިންތައް ބޭނުން ކުރަން ޖެހިފައި އޮތުމުގެ ސަބަބުން، މެޝިންތަކުގައިވެސް ވަނީ މައްސަލަ ޖެހެން ފަށާފައެވެ. ކަން މިހެން އޮތް އިރު، ނަސީމުގެ ޙާލުވެސް ގޯހެވެ.

ޣައްޒާ ކޮންޓްރޯލް ކުރާ ޙަމާސް ޖަމާއަތަށް ނިމުން ގެންނާނެ ކަމަށް ބުނެ ޔަހޫދީން ޤަތުލުޢާންމު ފެށި އޮކްޓޯބަރ 7 ވަނަ ދުވަހުއެވެ. ޢުދުވާންތަކަށް 3 މަސް ވާން ގާތްވެފައި ވާ އިރު، ޣައްޒާއިން މަރުވި މީހުންގެ ރަސްމީ ރެކޯޑްތައް އުޅެނީ 20000 އަށް ވުރެ މަތީގައެވެ. އެއީ ކާކުކަން ކަށަވަރު ވެފައިވާ މީހުން އެކަންޏެވެ. ބިމާހަމަކޮށްފައި ވާ ޢިމާރާތްތަކުގެ ދަށުވެ މަރުވެފައިވެސް އަދި އެތައް ހާސް ބަޔަކު ވާނެ ކަމަށް ޣައްޒާގެ ކަމާ ބެހޭ ފަރާތްތަކުން ބުނެއެވެ. ޒަޚަމްވީ މީހުންގެ ޢަދަދު ބައި ލައްކައަށް ވުރެ މައްޗަށް އަރައެވެ. އެއް ރެއަށް ވުރެ އަނެއް ރޭގެ ޙަމަލާތައް ވަރުގަދަ ކުރަމުން ދާއިރު، ޢުދުވާންތަކުގައި މަރުވި މީހުންނާއި ޒަޚަމްވީ މީހުންގެ 70 ޕަސެންޓަށް ވުރެ ބޮޑު ޕަސެންޓެއް ހިއްސާ ކުރަނީ އަންހެނުންނާއި ކުޑަކުދިންނެވެ.

2.3 މިލިއަން މީހުންގެ އާބާދީއެއް އޮތް ޣައްޒާގެ އާބާދީގެ 90 ޕަސެންޓް މީހުންނަކީ މިއަދު ގެދޮރު ނެތް މީހުންނެވެ. އާބާދީގެ 2 ބައިކުޅަ 1 ބައި މީހުން ތިބީ ބަނޑަށްޖެހިފައެވެ. މުޅި ޣައްޒާގައި އެކި ކަހަލަތައް ބަލުތައްވެސް ހަލުވި ދުވެލީގައި ދަނީ ފެތުރެމުންނެވެ. ނަމަވެސް ހޮސްޕިޓަލުތައްވެސް ހަފުސްކޮށް، ޛަރޫރީ ޚިދުމަތްތަކުން ޣައްޒާ މަހުރޫމުކޮށްފައި އޮތުމުގެ ސަބަބުން، ބަލިވާ މީހުންނަށްވެސް އެކަށީގެންވާ ގޮތެއްގައި ފަރުވާ ދެވޭކަށް ނެތެވެ.