އައްޑޫ ސިޓީގެ އަވަށްތަކުގައި ފެންބޮޑުވެ 51 ގެއަކަށް ގެއްލުންވެއްޖެ
ފޭދޫގެ 41 ގެއެއްގައި، އަދި ހުޅުދޫގެ 10 ގެއެއްގައި ފެންބޮޑުވެފައިވޭ
އައްޑޫ ސިޓީގެ ބައެއް ގެތަކަށް ފެން ވަދެފައި
އިރުވައި މޫސުމުގެ ވިއްސާރައިގައި އައްޑޫ ސިޓީގެ އަވަށްތަކުގައި ފެންބޮޑުވެ، 51 ގެއަކަށް ގެއްލުންވެއްޖެއެވެ.
ނެޝަނަލް ޑިޒާސްޓަރ މެނޭޖްމަންޓް އޮތޯރިޓީން ބުނީ، މިހާރު ކުރަމުންދާ ވިއްސާރައިގައި އައްޑޫ ސިޓީ ފޭދޫއާއި ހުޅުމީދޫގައި ފެންބޮޑުވެގެން ރިޕޯޓުކޮށްފައިވާކަމަށެވެ. އެގޮތުން އައްޑޫ ސިޓީ ފޭދޫގެ 41 ގެއެއްގައާއި ހުޅުދޫގެ 10 ގެއެއްގައި ފެންބޮޑުވެފައިވާކަމުގެ ރިޕޯޓް ލިބިފައިވާ ކަމަށެވެ. އަދި ފުރަަތަމަ އިޖާބަދޭ ފަރާތްތަކާއި އަވަށުއޮފީސް އަދި އެކި މުއައްސަސާތައް ގުޅިގެން އިޖާބަދިނުމުގައި ހަރަކާތްތެރިވަމުންދާ ކަމަށް ޑިޒާސްޓަރ މެނޭޖްމަންޓް އޮތޯރިޓީން ބުނެއެވެ.
ޑިޒާސްޓަރއިން ބުނީ އައްޑޫ ސިޓީ މީދޫގައި ފެންބޮޑުވެ 10 ގެއަކާއި ބައެއް ގެސްޓްހައުސްތަކާއި ފިހާރަތަކަށް އެކިވަރުގެ ގެއްލުން ލިބިފައިވާކަމަށެވެ. އަދި ސިފައިންނާއި އެެހެނިހެން ފަރާތްތައް ގުޅިގެން، ފެން ހިއްކުމާއި ވެލިބަސްތާ ޖެހުމުގައި ހަރަކާތްތެރިވަމުން އަންނަ ކަމަށެވެ.
ރާއްޖޭގެ ދެކުނަށް މޫސުން ގޯސްވެ ބުދަ ދުވަހުގެ މެންދުރު 1:30ން ފެށިގެން ހަވީރު 5:20އާ ހަމައަށް އޮރެންޖް އެލަރޓްވެސް ނެރުނެވެ.
މޫސުމާބެހޭ ގައުމީ އިދާރާއިން ބުނީ މި މަހުގެ 24 ވަނަ ދުވަހު ރާއްޖެއަށް އިރުވައި މޫސުން އައުމާގުޅިގެން ކުރިއަށް އޮތް 3 ދުވަހު، ޚާއްސަކޮށް އުތުރާއި މެދުރާއްޖެތެރޭގައި ގަދަވަޔާއެކު ކަނޑުތައް ވަރަށް ގަދަވާނެ ކަމަށް ލަފާކުރެވޭ ކަމަށެވެ. އަދި ބައެއް ރަށްތަކަށް ގުގުރުމާއެކު ބޯކޮށް ވާރޭވެހުން އެކަށީގެންވާ ކަމަށެވެ.
އެހެންކަމުން ކަނޑުދަތުރުކުރާ ފަރާތްތަކާއި، ބްރިޖާއި ހައިވޭގައި ދަތުރުކުރާއިރު މޫސުމަށް ވަރަށް ބޮޑަށް ސަމާލުވުމަށް ވަނީ އިލްތިމާސްކޮށްފައެވެ.
