އައްޑޫ ސިޓީގެ ކަރަންޓުގެ މައްސަލަ: އައްޑޫ ރައްޔިތުން ދެވަނަ ދަރަޖައިގެ ބަޔެއް ކަމަށް ބެއްލެވުމަކީ ބަލައި ގަނެވޭނެ ކަމެއް ނޫން ކަމަށް ނިޒާރު ވިދާޅުވެއްޖެ
21 ޖުލައި 2025 | ހޯމަ 17:47ސަރުކާރުން މީގެ ކުރިން ބުނީ މި އަހަރު ރޯދަ އަށް އައްޑޫގެ ކަރަންޓުގެ މައްސަލަ ހައްލުވާނެ ކަަމަށެ
އައްޑޫ ސިޓީގެ މޭޔަރު އަލީ ނިޒާރު ފަލަސުރުހީ ޕްރޮގްރާމުގެ ކުރީގެ ޕްރޮގްރާމެއްގައި ވާހަކަދައްކަވަނީ
އައްޑޫ ސިޓީގެ ރައްޔިތުން ކަރަންޓު ނެތި އަނެއްކާވެސް މިދަނީ މުސީބާތުގެ ހާލަތު ތަހައްމަލް ކުރަމުން ކަމަށާއި އައްޑޫ އަކީ ދެވަނަ ދަރަޖައިގެ ތަަނެއްގެ ގޮތުގައި ދުށުމަކީ ބަލައިގަނެވޭ ކަމެއް ނޫން ކަމަށް އައްޑޫގެ މޭޔަރ އަލީ ނިޒާރު ވިދާޅުވެއްޖެއެވެ.
ނިޒާރު އެކްސްގައި ކުރެއްވި ޕޯސްޓެއްގައި ވިދާޅުވީ ގަޑިއަކުން ގަޑިއަކުން އައްޑޫގެ އެކި ހިސާބުތަކުން ކަރަންޓް ކަނޑަމުންދާ ކަމަށެވެ. އެހެންކަމުން ވިޔަފާރިތަކާއި އަމިއްލަފަރުދުންގެ މުދަލަށް ބޮޑެތި ގެއްލުންތައް ދަނީ ލިބެމުން ކަމަށް ނިޒާރު ވިދާޅުވިއެވެ.
މީގެ އިތުރުން ކަރަންޓު ކެނޑުމުގެ ސަބަބުން އާންމު ޚިދުމަތްތަކަށް ދަނީ ހުރަސް އެޅެމުން ކަމަށާއި އައްޑޫ ސިޓީ ކައުންސިލް އިދާރާއިން ރަސްމީ ގަޑީގައި ދެފަހަރަށް މިއަދުވެސް ވަނީ ކަރަންޓް ކަނޑާލާފައި ކަމަށް ނިޒާރު ވިދާޅުވިއެވެ.
ރައީސް ޑރ.މުހައްމަދު މުއިއްޒު ވަނީ މާލެއިން 5 ގަޑި އިރަށް ކަރަންޓް ކެނޑުމަކީ ކާރިސާގެ ހާލަތުކަމަށް ނިންމަވައި އެކަން އަވަހަށް ހައްލު ހޯއްދަވައި ދެއްވުމުގެ ޔަގީންކަން ދެއްވާފައެވެ. އެހެންކަމުން އައްޑޫ ރައްޔިތުން ދެވަނަ ދަރަޖައިގައި ބެއްލެވުމަކީ ގަބޫލު ކުރެވޭނެ ކަމެއް ނޫން ކަމަށް ނިޒާރު ވިދާޅުވިއެވެ.
"އެއީ އިންސާފުވެރި ގޮތެއްވެސްނޫން. އައްޑޫ ސިޓީގެ ކަރަންޓްގެ ހާލަތު ރަގަޅު ނުވެވި 2 އަހަރު ވާންކައިރި ވެފައިވާއިރު މިމައްސަލަ ހައްލު ކުރުމަށް ސަރުކާރުގެ ހެޔޮނިޔަތެއް އޮތްކަމަށް ގަބޫލް ނުކުރެވޭ." ނިޒާރު ވިދާޅުވިއެވެ.
އައްޑޫގެ ޖަނަރޭޓަރަކަށް ދިމާވި މައްސަލަ ހައްލުކޮށް ބޮޑު ބަޔަކަށް ކަރަންޓު ދީފައިވާ ކަމަށް އެ ސިޓީގައި ކަރަންޓުގެ ޚިދުމަތް ދޭ ފެނަކަ ކޯޕަރޭޝަނުން ވަނީ ބުނެފައެވެ. މާލެ ފިޔަވައި ރާއްޖޭގެ އެންމެ އާބާދީ ބޮޑު އައްޑޫގައި ދޭތެރެއިން ކަރަންޓު ކެނޑުމުގެ މައްސަލަ ދިމާވާ އިރު މި މައްސަލަ އަށް ހައްލެއް ވަނީ ހޯދާނުދެވިފައެވެ. މި ސަރުކާރުން މީގެ ކުރިން ބުނީ މި އަހަރު ރޯދަ އަށް އައްޑޫގެ ކަރަންޓުގެ މައްސަލަ ހައްލުވާނެ ކަަމަށެވެ. ނަމަވެސް މި އަދާއި ހަމައަށް ވެސް އެކަން ކުރެވިފަ އެއް ނުވެއެވެ.
