ނޭމާ ދިގު މުއްދަތަކަށް ބާސެލޯނާގައި މަޑުކުރާނެ ކަމަށް އުންމީދުކުރާ ކަމަށް އެޓީމުގެ ކެޕްޓަން އަންދްރޭސް އިނިއެސްޓާ ބުނެފި އެވެ.

ނޫސްވެރިންނަށް މައުލޫމާތު ދެމުން އިނިއެސްޓާ ބުނީ އޭނާ އެދެނީ ބާސާގައި ނޭމާ ދިގު މުއްދަތަކަށް މަޑުކުރަން ކަމަށާއި، އެކަމުން ނޭމާގެ އިތުރުން ކްލަބަށް ވެސް ފައިދާވާނެ ކަމަށް ދެކޭ ކަމަށެވެ.

އިނިއެސްޓާ ބުނީ ނޭމާއަކީ ދުނިޔޭގެ އެންމެ މޮޅު އެއް ކުޅުންތެރިޔާ ކަމަށާއި، ކްލަބަށް ނޭމާ ވަރަށް ބޮޑު އެއްބާރުލުމެއް އަބަދު ވެސް ދޭ ކަމަށެވެ. އެގޮތުން އޭނާ ބުނީ 200 ނުވަތަ 300 މިލިއަން ޔޫރޯ އަށް ނޭމާ ވިއްކާލައިގެން ޓީމަށްވާ ފައިދާ އަށް ވުރެ ނޭމާ ޓީމުގައި ހުރުމުން ލިބޭ ފައިދާ މާ ބޮޑުވާނެ ކަމަށެވެ.

ބާސާ އިން ހުކުރު ދުވަހު ކުރިޔަށް ގެންދިޔަ ފަރިތަކުރުންތަކުގައި ނޭމާ އާއި ބާސާ އަށް އަލަށް ގެނައި ބެންފީކާގެ ނެލްސަން ސެމެޑޯއާ ދެމެދު ވަނީ ކުރިމަތިލުންތަކެއް ހިނގާފައެވެ. އެ މަންޒަރުތައް ކެމެރާތަކަށް އަރާފައިވާއިރު، އެކަމާ ގުޅިގެން ބާސާ އިން ރަސްމީކޮށް އެއްވެސް އެއްޗެއް ބުނެފައެއް ނުވެއެވެ.

ރިޕޯޓްތައް ބުނާގޮތުން ނޭމާ ބޭނުންވަނީ ބާސާ ދޫކޮށްލުމަށް ފަހު ކުރިޔަށް އޮތް ސީޒަނަށް އެހެން ކްލަބަކަށް ބަދަލުވާށެވެ. އެގޮތުން ނޭމާ ހޯދުމަށް ޕެރިސް ސެއިންޓް ޖާމަން (ޕީއެސްޖީ) އިން 222 މިލިއަން ޔޫރޯ ހުށަހަޅާފައިވާ ކަމަށް ވެސް ރިޕޯޓްތައް އަންނަނީ ބުނަމުންނެވެ.

ބްރެޒިލްގައި ކާމިޔާބު ދުވަސްތަކެއް ހޭދަކުރުމަށް ފަހު ނޭމާ ބާސާ އަށް ބަދަލުވީ 2013 ވަނަ އަހަރެވެ. އެގޮތުން އޭނާ ވަނީ މިހާތަނަށް އެޓީމަށް ކުޅުނު 186 މެޗުގައި 105 ލަނޑު ކާމިޔާބުކޮށް އެޓީމާއެކު ސްޕެނިޝް ލީގު ދެފަހަރު، ކޮޕާ ޑެލްރޭ ދެފަހަރު، ސްޕެނިޝް ސުޕާކަޕް، ޔުއެފާ ޗެމްޕިއަންސް ލީގު އަދި ފީފާ ކްލަބް ވޯލްޑް ކަޕް ވެސް ކާމިޔާބުކޮށްފައެވެ.

ބްރެޒިލް ގައުމީ ޓީމާއެކު އޮލިމްޕިކްސް ރަން މެޑަލް މިދިޔަ އަހަރު ކާމިޔާބުކުރި ނޭމާ ވަނީ ގައުމީ ޓީމަށް ކުޅުނު 77 މެޗުގައި 52 ލަނޑު ކާމިޔާބުކޮށްފައެވެ. މީގެ އިތުރުން އޭނާ ވަނީ ފީފާ ކޮންފެޑެރޭޝަންސް ކަޕް 2013 ވަނަ އަހަރު އަދި ސައުތް އެމެރިކަން ޔޫތް ޗެމްޕިއަންޝިޕް 2011 ވަނަ އަހަރު ބްރެޒިލްއާއެކު ކާމިޔާބުކޮށްފައެވެ.