ކުރިއަށް އޮތް ދެތިން އަހަރެއްގެ ތެރޭގައި ހައްޖާއި އުމްރާއަށް ދިއުމަށް ދައްކާ އަގު ކުޑަކުރާނަން: މިނިސްޓަރު ޝަހީމް
މިފާއިތުވެދިޔަ އަހަރުތަކުގައި މީހުން ހައްޖަށް ގެންދިއުމަށް އަމިއްލަ ކުންފުނިތަކުން ބޮޑު އަގު ނަގަމުންދިޔަ
އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު
ހައްޖު ކޯޕްރޭޝަނަށް ގެނެވޭ ބަދަލުތަކާއެކު، ކުރިއަށް އޮތް ދެތިން އަހަރެއްގެ ތެރޭގައި ހައްޖާއި އުމްރާއަށް ދިއުމަށް ދައްކާ އަގު ކުޑަކުރާނެ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
އަންގާރަ ދުވަހު ވަނީ ރާއްޖެއަށް ލިބޭ 1000 ހައްޖު ކޯޓާ، ހައްޖު ކޯޕަރޭޝަނާއި، ހަވާލުކޮށް އެއްބަސްވުމުގައި ސޮއިކޮށްފައެވެ. އިސްލާމިކް މިނިސްޓްރީގައި ބޭއްވި ޚާއްސަ ރަސްމިއްޔާތެއްގައި މިއެއްބަސްވުމުގައި އިސްލާމިކް މިނިސްޓްރީގެ ފަރާތުން ސޮއިކުރެއްވީ މިނިސްޓަރު ޝަހީމެވެ. އަދި ހައްޖު ކޯޕަރޭޝަންގެ ފަރާތުން ސޮއިކުރެއްވީ މެނޭޖިންގ ޑިރެކްޓަރ މުހައްމަދު ޝަކީލެވެ.
އެއްބަސްވުމުގައި ސޮއިކުރެއްވުމަށްފަހު މިނިސްޓަރު ޝަހީމް ވިދާޅުވީ ރާއްޖެއަށް ސައުދީން ދޭ ހުރިހާ ހައްޖު ކޯޓާއެއް ހައްޖު ކޯޕަރޭޝަނާ ހަވާލުކުރީ ރައްޔިތުންނަށް ލަބަޔާ މަންފާ ހޯދަދިނުމަށް ކަމަށާއި، މި ނިންމުން ނިންމީ ވަރަށް ގިނަ މަޝްވަރާތަކަށްފަހު ކަމަށެވެ.
މީގެ އިތުރުން މިނިސްޓަރ ޝަހީމް ވިދާޅުވީ މިފާއިތުވެދިޔަ އަހަރުތަކުގައި މީހުން ހައްޖަށް ގެންދިއުމަށް އަމިއްލަ ކުންފުނިތަކުން ބޮޑު އަގު ނަގަމުންދިޔަ ކަމަށާއި، ފައިސާ ދައްކާ ބައެއް މީހުންނަށް ހައްޖަށް ނުދެވި ހިތި ތަޖުރިބާތައް ކުރަންޖެހުނު ކަމަށެވެ. މި ނިންމުމާއެކު މިމައްސަލަތަކަށް ހައްލު ލިބޭނެ ކަމަށް މިނިސްޓަރު ޝަހީމް ވިދާޅުވިއެވެ.
މިނިސްޓަރު ޝަހީމް ވިދާޅުވީ ހައްޖު ކޯޕްރޭޝަން ރަނގަޅު ގޮތުގައި ތަރައްގީ ކުރެއްވިއްޖެނަމަ ކުރިއަށް އޮތްތަނުގައި އުމްރާއަށާއި، ހައްޖަށް މީހުން ގެންދިއުމުގައި އަގު ވަރަށް ބޮޑަށް ކުޑަ ކުރެވޭނެ ކަމަށެވެ. އަދި އަމާޒަކީ ކުރިއަށް މިއޮތް ދެތިން އަހަރެއްގެ ތެރޭގައި މިކަމަށް އަމަލީ ސިފައެއް ގެނައުން ކަމަށް މިނިސްޓަރު ޝަހީމް ވިދާޅުވިއެވެ.
ހައްޖަށް ދިޔުމަށް މިހާރު ވެސް ހައްޖު ކޯޕަރޭޝަނުގެ ކިޔުގައި 6018 މީހުން ރަޖިސްޓްރީވެފައި އެބަތިބި ކަމަށް ހައްޖު ކޯޕްރޭޝަނުން މައުލޫމާތުދެއެވެ.
