ގަމު ކެންސަރު ހޮސްޕިޓަލް މާލެއަށް ބަދަލުކުރަން ނިންމި ނިންމުން ބަދަލުކުރުމަށް ގޮވާލައިފި
މިއީ ހުރިހާ ބާރެއް މަރުކަޒު ކުރުމުގެ ސަގާފަތް އަލުން އިއާދަ ކުރުމަށް މި ސަރުކާރުން ކުރަމުންދާ މަސައްކަތެއް
ގަމު ރީޖަނަލް ހޮސްޕިޓަލުގެ ހިދުމަތެއް މެންބަރު ވިސާމް އިފްތިތާހުކޮށްދެއްވަނީ
ލ. ގަމުގައި އަޅަން ނިންމާފައިވާ ކެންސަރު ހޮސްޕިޓަލް މާލެ ސަރަހައްދަށް ބަދަލުކުރުމަށް ނިންމި ނިންމުން ކުށްވެރިކޮށް އެ ނިންމުން އަލުން ބަދަލުކުރުމަށް، ގަމު ދާއިރާގެ މެންބަރު މުހައްމަދު ވިސާމް ސަރުކާރަށް ގޮވާލައިފިއެވެ.
ކެންސަރު ހޮސްޕިޓަލް މާލެ ސަރަހައްދަށް ބަދަލުކުރާ މައްސަލަ ކުށްވެރިކޮށް، މެންބަރު ވިސާމް ނެރުނު ބަޔާނުގައި ވިދާޅުވެފައިވަނީ ރައީސް އިބްރާހިމް މުހައްމަދު ޞާލިހުގެ ސަރުކާރުން ލ. ގަމުގައި ގާއިމްކުރުމަށް ކަނޑައަޅައި ދިރާސާތައް ވެސް ނިންމާފައިވާ ކެންސަރު ހޮސްޕިޓަލް މާލެއަށް ބަދަލުކުރުމަށް ނިންމި ނިންމުން އެންމެ ހަރުކަށި އިބާރާ އިބާރާތުން ކުށްވެރިކުރާ ކަމަށެވެ.
އަދި ރައީސް ޞާލިހުގެ ސަރުކާރުން ކެންސަރު ހޮސްޕިޓަލް ލ. ގަމުގައި އަޅަން ނިންމީވެސް ސިޔާސީ ބޭފުޅުންނާއި ސިއްހީ ދާއިރާގައި ހަރަކާތްތެރިވާ ނުފޫޒު ގަދަ އެތަކެއް ބޭފުޅުންނެއް އެ ހޮސްޕިޓަލް މާލޭގައި އެޅުމަށް އެދެމުންދަނިކޮށް ކަމަށެވެ. އެ ނިންމުމާ އެކު އިންޑިއާގެ ޓާޓާ މެމޯރިއަލް ސެންޓަރު (ޓީއެމްސީ) ގެ މަންދޫބުން ލ. ގަމަށް ވަޑައިގެން ހޮސްޕިޓަލް ގާއިމްކުރުމަށް ހުރަހެއް އޮތްތޯ ބެލުމަށް ފީސިބިލިޓީ ރިޕޯޓާއި ޑީޕީއާރު ރިޕޯޓް ހަދައި އިންޑިއާގެ ފޮރިން މިނިސްޓްރީން ފާސްކޮށްފައިވާ ކަމަށެވެ.
އަދި އެ ރިޕޯޓްތަކާއި އެކު އިންޑިއާގެ އެގްޒިމް ބޭންކުން ވަނީ އެ ޕްރޮޖެކްޓް ކުރިއަށްގެންދިއުމަށް ބޭނުންވާ ހުރިހާ ފައިސާއެއް ވެސް ހަމަޖައްސައިދީފައި ކަމަށެވެ.
ކެންސަރު ހޮސްޕިޓަލް ބަދަލުކުރަން ނިންމީ ޓާޝަރީ ފަރުވާ ނުލިވޭ ސަރަހައްދެއްގައި ކެންސަރު ހޮސްޕިޓަލް އަޅަން ޖެހުމުން ކަމަށް ސަރުކާރުން ބުނާއިރު އެ ހޮސްޕިޓަލް ގަމުގައި އެޅުމުގެ ބޭނުމުގައި ނިމިދިޔަ ސަރުކާރުން ވަނީ 130 އެނދުގެ ޓާޝަރީ ހޮސްޕިޓަލެއް އެޅުމަށް 16 ޖުލައި 2023 ގައި އެމްޓީސީސީއާއި ހަވާލުކޮށްފަ ކަމަށް މެންބަރު ވިދާޅުވެފައިވެއެވެ.
އަދި ގަމުގައި ޓާޝަރީ ހޮސްޕިޓަލެއް އެޅުމަށް ހަވާލުކޮށްފައި އޮއްވާ އެ ހިދުމަތް ނުލިބޭކަމަށް ބުނެ ކެންސަރު ހޮސްޕިޓަލް ބަދަލުކުރުމުން ސަރުކާރުން ދައްކާ ވާހަކަ ދެކޮޅު ނުޖެހޭކަން ހާމަވާ ކަމަށް މެންބަރު ވިސާމް ވިދާޅުވިއެވެ. އަދި މިކަމުގެ ސަބަބުން ގަމުގައި އެޅުމަށް ހަވާލުކޮށްފައިވާ ޓާޝަރީ ހޮސްޕިޓަލް ވެސް އެހެން ރަށަކަށް ބަދަލުކޮށްފާނެ ކަމުގެ ބިރު އެބައޮތް ކަމަށް ވެސް ވިދާޅު ވެފައިވެއެވެ.
އަދި ރައީސް ޑރ. މުހައްމަދު މުއިއްޒު ވެރިކަމަށް ވަޑައިގެންނެވީ މިދިޔަ ސަރުކާރުން ފަށާފައިވާ އެއްވެސް ތަރައްގީގެ މަޝްރޫއުއެއް ނުހުއްޓައި ރޭވިފައިވާ ގޮތަށް ކުރިއަށްގެންދާނެ ގޮތުގެ ވައުދާ އެކު ކަމަށްވާއިރު މިއީ ލ. ގަމުގައި ތަރައްގީއަށް ވަކިން ހާއްސަކޮށް ލ. އަތޮޅުގެ ކުރިއެރުމާ ނުހަނު ގުޅިފައިވާ އެންމެ ބޮޑު ޕްރޮޖެކްޓްކަމަށް ވިދާޅުވެފައިވެއެވެ.
ލ. އަތޮޅު ކައުންސިލާއި ލ. ގަމު ކައުންސިލާ މަޝްވަރާ ކުރުމެއް ނެތި މިފަދަ ނިންމުމެއް ސަރުކާރުން ނިންމުމަކީ ރައްޔިތުންގެ އެއްވެސް ބައިވެރިވުމެއް އަދި ހިޔާލެއް ހޯދަން ސަރުކާރުން ބޭނުން ނުވާ ކަމުގެ އަލިގަދަ ހެއްކެއް ކަމަށް މެންބަރު ވިދާޅުވިއެވެ. ހުރިހާ ކަމެއް ހަމެޖެހިފައިވާ މި ޕްރޮޖެކްޓް މާލެއަށް ބަދަލުކުރުމަކީ އަތޮޅުތަކާއި ރަށްތަކުގެ ތަަރައްގީއަށް މި ސަރުކާރުން އިސްކަން ނުދޭކަން ހާމަވާ ކަމެއް ކަމަށް ވިދާޅުވެފައިވެއެވެ.
އަދި ވެރިކަން ކުރާ ރަށަށް ހުރިހާ ބާރެއް މަރުކަޒު ކުރުމުގެ ސަގާފަތް އަލުން އިއާދަ ކުރުމަށް މި ސަރުކާރުން ކުރަމުންދާ މަސައްކަތްތަކުގައި ތޮއްޖެހިފައިވާ މާލެއަށް މި ޕްރޮޖެކްޓު ބަދަލުކުރީ މިފަދަ ބޮޑެތި ޕްރޮޖެކްޓްތައް ގަސްތުގައި ރޭވިގެން ހުއްޓުވުމުގެ ބޭނުމުގައި ކަމަށް ދެކޭ ކަމަށް މެންބަރު ވިދާޅުވިއެވެ. އަދި ލ. ގަމުގައި ގާއިމްކުރަން ނިންމާފައިވާ އޮތް ކެންސަރު ހޮސްޕިޓަލް މާލޭގައި އަޅަން ނިންމި ނިންމުން ބަދަލުކުރުމަށް ސަރުކާރަށް ގޮވާލައްވާފައިވެއެވެ.
