ޝަރީފްއާ ދެކޮޅަށް ނަޝީދު ހުށަހެޅުއްވި އަބުރުގެ ދައުވާ ކޯޓުން ބަލައިގެންފި
ދައުވާ ހުށަހަޅާފައިވަނީ ސިވިލް ކޯޓަށް
މުހައްމަދު ނަޝީދު - ރައްޔިތުންގެ މަޖިލީހުގެ ރައީސް
ރައްޔިތުންގެ މަޖިލީހުގެ އައްޑޫ މަރަދޫ ދާއިރާގެ މެމްބަރު އިބްރާހިމް ޝަރީފްއާ ދެކޮޅަށް ރައްޔިތުންގެ މަޖިލީހުގެ ރައީސް, ރައީސް މުހައްމަދު ނަޝީދު ސިވިލް ކޯޓަށް ހުށަހެޅުއްވި އަބުރުގެ ދައުވާ ބަލައިގަތުމަށް އެ ކޯޓުން ނިންމައިފިއެވެ.
ޝަރީީފްއާ ދެކޮޅަށް ނަޝީދު އަބުރުގެ ދައުވާ ކުރައްވަނީ ރައީސް މައުމޫން އަބްދުލްގައްޔޫމްގެ ވެރިކަމުގައި އެމްޑީޕީގެ މުޒާހަރާއެއްގެ ތެރެއިން އެމަނިކުފާނު 50 މީހަކު މަރާލަން ރޭއްވެވި ކަމަށް ބުނެ ކުރި ޓްވީޓަކާ ގުޅިގެންނެވެ. އެކަމާ ގުޅިގެން އަބުރަށް އަރައިގަތުމުގެ ބަދަލެއްގެ ގޮތުގައި 10 މިލިއަން ރުފިޔާ ނަގައިދިނުމަށް ނަޝީދުގެ ފަރާތުން ވަނީ ކޯޓުގައި އެދިވަޑައިގެންފައެވެ.
އެ ދައުވާ އެ ކޯޓުގައި ރަޖިސްޓްރީކުރިކަން އަންގައި ސިވިލް ކޯޓުން ނަޝީދަށް ލިޔުން ފޮނުވީ އަންގާރަ ދުވަހުއެވެ.
ޝަރީފްގެ ޓުވީޓުގައި ވިދާޅުވީ، ކުރީގެ ރައީސް މައުމޫން އަބްދުލްގައްޔޫމްގެ ވެރިކަން ވައްޓާލަން 50 މީހަކު މަރާލައި މަރުގެ ތުހުމަތު މައުމޫންގެ އިސްތަށިފުޅުގައި އަޅުވަން ނަޝީދު ރޭއްވެވި ކަމަށެވެ. އެ އަނިޔާވެރި އަމަލު ހުއްޓުވުމަށް އެމްޑީޕީގެ ގައުމީ މަޖިލީހުން ގަރާރެއް ފާސްކުރި ކަމަށް ވެސް އެ ޓްވީޓުގައި ޝަރީފު ވިދާޅުވިއެވެ.
