ރައީސް ޞާލިހަކީ އަދީބު ދޭ ފައިސާ ދަބަހެއް ހިތްޕަވައިގެން ވަޑައިގަންނަވަން ޖެހޭވަރުގެ ބޭފުޅެއް ނޫން: ޝަރީފު
ރައީސް ޞާލިހުގެ ބޮލުގައި އެކަން އަޅުވަނީ ސިޔާސީ މަގުސަދެއްގައި ކަމަށް ޝަރީފް ވިދާޅުވި
މަރަދޫ ދާއިރާގެ އެމްޑީޕީ މެމްބަރު އިބްރާހީމް ޝަރީފް
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު އަކީ ކުރީގެ ނައިބު ރައީީސް އަހުމަދު އަދީބުގެ އަތުން ފައިސާ ހޯއްދަވާފަދަ ހާލަތެއްގައި ހުންނެވި ބޭފުޅެއް ނޫންކަމަށް މަރަދޫ ދާއިރާގެ އެމްޑީޕީ މެމްބަރު އިބްރާހީމް ޝަރީފް ވިދާޅުވެއްޖެއެވެ.
ރައީސް އިބްރާހީމް މުހައްމަދު ޞާލިހަށް އެމްއެމްޕީއާރުސީ ފައިސާއިން ބައެއް ލިބިވަޑައިގެންނެވިކަމަށް ދެކެވޭ ވާހަކައާ ގުޅޭގޮތުން ޝަރީފް ވިދާޅުވީ ރައީސް ޞާލިހަކީ އަދީބު އަތުން ދެމިލިއަނުން ނުވަތަ ތިން މިލިއަނުން ނުވަތަ އެއަށްވުރެ ގިނައިން ފަންސާސް މިލިއަނުންވިޔަސް ހޯއްދަވާނެ ބޭފުޅެއް ނޫންކަމަށެވެ. ޝަރީފު ވިދާޅުވީ ރައީސް ޞާލިހަކީ ރާއްޖޭގައި ތިބި މުއްސަނދި ތަނަވަސް އާއިލާއެއް ކަމުގައިވާ ސިއްކަ އާއިލާގެ ސިއްކަ އަހުމަދު އިސްމާއީލުގެ ދަނބިދަރިކަމަށެވެ.
ޝަރީފު ވިދާޅުވީ 2018 ވަނަ އަހަރުގެ ރިޔާސީ އިންތިޚާބުގައި ކެމްޕެއިންގެ ބޮޑު ޚަރަދެއް ކުރެއްވީ ރައީސް ޞާލިހު އަމިއްލަފުޅަށްކަމަށެވެ. އެކަން އެނގިވަޑައިގަންނަވާކަމަށާއި އެމްޑީޕީ އުފެދިގެން އައިއިރުވެސް އެންމެ ބޮޑު ޚަރަދެއް އެމްޑީޕީގެ އިދާރީ ހިންގުމަށް ކުރެއްވި އެއް ބޭފުޅަކީ ސިއްކަ އަހުމަދު އިސްމާއީލުގެ ފަރާތުން ރައީސް ޞާލިހުކަމަށެވެ.
ޝަރީފު ވިދާޅުވީ ސިޔާސީ ބޭނުމަށްޓަކައި ސިޔާސީ ހުރިހާ ވާދަވެރިން އެހުރިހާ ވާހަކައެއްވެސް ދައްކާނެކަމަށެވެ.
