ރައްޔިތުންގެ މަޖިލީހުގެ މަރަދޫ ދާއިރާގެ މެންބަރު އިބްރާހިމް ޝަރީފް މަޖިލީހުގެ މާވަށު ދާއިރާގެ މެންބަރު މުހައްމަދު ސައީދަށް ހޫނު ބަހުގެ ހަމަލާތަކެއް އަމާޒުކުރައްވައިފިއެވެ.
ޝަރީފް މި މޭރުމުން ވާހަކަދައްކަވާފައި ވަނީ މަޖިލީހުގެ ބުދަ ދުވަހުގެ ބަހުސް މަރުހަލާގައި ވާހަކަދައްކަވަމުންނެވެ. މެންބަރު ސައީދު ވަނީ ތިލަފުށީގެ ބިން އެކަށީގެން ނުވާ ވަރަށް ހެޔޮ އަގުގައި ވިއްކަމުންދާ ކަމަށާއި އެކަން ކުރަނީ ބައެއް ވަޒީރުންގެ ބައިވެރުމާއި އެކުގައި ކަމަށް ތުހުމަތުކުރައްވާފައެވެ. މީގެ އިތުރުން ސައީދު ވަނީ ތިލަފުށިން ބިން ވިއްކަމުން ދަނީ އިންޑިއާގެ ކުންފުނިތަކަށް ކަމަށާއި މުޅި ރާއްޖެ ވިއްކަމުންދާ ކަމަށް ސައީދު ވަނީ ވިދާޅުވެފައެވެ. މީގެ އިތުރުން އިންޑިއާގައި ބިމާއި ގުޅޭ ކޮރަޕްޝަންތައް ހިނގާ ފަދައިން ރާއްޖޭގައި ވެސް އެކަންކަން ކުރަން އުޅޭކަމަށް އޭނާ ތުހުމަތުކުރެއްވިއެވެ. ރާއްޖެއިން އެތައް ފަޅަކާއި ބިމެއް ވިއްކާލާފައިވާ ކަމަށް ތުހުމަތުކުރައްވާ އެކަމަށް ސައީދު ވަނީ ވަރަށް ބޮޑަށް ފާޑު ވިދާޅުވެފައެވެ.
އެ ވާހަކަތަކަށް ރައްދުދެއްވާ ޝަރީފް ވިދާޅުވި ސައީދުގެ އެ ވާހަކަތަކަކީ އެއްވެސް އަސާސެއް ނެތް ދޮގު ވާހަކަތަކެއް ކަމަށެވެ. ރާއްޖޭގެ ވަޒީރުކަން ކުރެއްވި ބޭފުޅަކު އެފަދަ ހަގީގަތެއް ނެތް ވާހަކަތަކެއް ދެއްކުމަކީ ޒިންމާދާރު ކަމެއް ނޫން ކަމަށް ޝަރީފް ވިދާޅުވިއެވެ. 99 އަހަރަށް ރިސޯޓް ކުއްޔަށް ދޭ ގޮތަށް ޤާނޫނަށް ބަދަލު ގެނައީ ކުރީގެ ރައީސް އަބްދުﷲ ޔާމިންގެ ސަރުކާރުން ކަމަށާއި އެމްއެމްޕީއާރުސީގެ ދަށުން އެ ސަރުކާރުން ގިނަ ފަޅުތަކަކާއި ރަށްތައް ވިއްކާލާފައިވާ ކަމަށް ވެސް ޝަރީފް ވިދާޅުވިއެވެ. މިހާރު އެ ބޭފުޅުން ދައްކަމުން ދަނީ ރާއްޖޭގައި އޮތް މިނިވަން ވިޔަފާރި އަށް ހުރަސް އަޅާ ވާހަކަ އާއި ގައުމު ސުންނާފަތި ކުރުމާއި އިންވެސްޓަރުންނަށް މަރުޚަބާ ނުކިޔުމުގެ ވާހަކަ ކަމަށް ޝަރީފް ވިދާޅުވިއެވެ. ޝަރީފް ވަނީ ސައީދުގެ ގާބިލްކަމާމެދު ސުވާލު އުފައްދަވާ އޭނާ އަށް ރައްދުދެއްވާފައެވެ.
އަޅުގަނޑު ލަދުގަނޭ މި ރާއްޖޭގެ ކުރީގެ އިކޮނޮމިކް މިނިސްޓަރުކަން ކުރެއްވި ބޭފުޅެއްގެ ލަދުހަޔާތް ކުޑަކަމުން. ލަދެއް ހަޔާތެއް ނެތޭ އެ ދައްކާ ވާހަކަ ދައްކާ އިރުގަ. ގައުމު ސުންނާފަތި ކުރާ ވަހަކަ ދައްކާ އިރު. މި ބޭފުޅުން ގައުމު ދެކެ ލޯބި ވަނިއްޔޯ. ވެރިކަމަށް ދަހިވެތިކަން މިހާ ބިޑު ވިޔަސް މި ޒާތުގެ ތާކުންތާކު ނުޖެހޭ ދިއުޅި އެއްނުވާ ވާހަކަ ދެއްކުމަކީ ހަގީގަތުގައި ރައްޔިތުންގެ މަޖިލިސް މެމްބަރަކާއި އެކަށީގެންވާ ވާހަކަ އެއް ނޫން. ކުރީގެ އިކޮނޮމިކް މިނިސްޓަރުކަން ކުރި މީހަކު ސީދާ ސޯޓު ބޭލޭ ޒާތުގެ ވާހަކަ. ތިމާ އާއި މިނިސްޓްރީ އާއި އެކަށީގެން ނުވާ ވާހަކަ. ގައުމާއި ދޭތެރޭގައި ދުޝްމަނުވިޔަސް ހަސަދަވެރިވިޔަސް މި މިންވަރަށް ދާކަށް ނުވާނެ.މެންބަރު ޝަރީފް
ރާއްޖޭގެ ބިންތައް ވިއްކާލަމުންދާ ކަމަށް އިދިކޮޅު ފަރާތްތަކުން ތުހުމަތުކުރި ނަމަވެސް އެއީ ހަގީގަތާއި ޚިލާފު ވާހަކަތަކެއް ކަމަށް ސަރުކާރުން ވަނީ ބުނެފައެވެ. ރާއްޖެއިން ޤާނޫނާއި ޤަވާއިދާއި ޚިލާފަށް އެއްވެސް ބިމެއް ދޫކޮށްފައި ނުވާނެ ކަމުގެ ޔަގީންކަން ސަރުކާރުން ވަނީ ތަކުރާރުކޮށް ދީފައެވެ.
