މަޖިލީހަށް ވަދެ ބައެއް ވިޔަފާރިވެރިން ސަރުކާރަށް ފާޑުކިޔަނީ ނާޖާއިޒް ފައިދާ ނުލިބިގެން: ޝަރީފް
ސިޔާސީ ގޮތުން ނުރުހޭތީ ނުވަތަ ސިޔާސީ ބަރުދަނެއް ނެތުމުން ސަރުކާރަށް ފާޑުކިޔާ: ޝަރީފް
މެމްބަރު ޝަރީފް
މަޖިލީހަށް ވަދެ ބައެއް ވިޔަފާރިވެރިން ސަރުކާރަށް ފާޑުކިޔަނީ ނާޖާއިޒް ފައިދާ ނުލިބިގެންކަމަށް ވިދާޅުވެ ރައްޔިތުންގެ މަޖިލީހުގެ މަރަދޫ ދާއިރާގެ މެމްބަރު އިބްރާހިމް ޝަރީފް ބައެއް މެމްބަރުންނަށް ވަރަށް ބޮޑަށް ފާޑުވިދާޅުވެއްޖެއެވެ.
މަޖިލީހުގައި ވާހަކަދައްކަވަމުން ޝަރީފް އެހެން ވިދާޅުވި ނަމަވެސް ވަކި މެމްބަރެއްގެ ނަން ޝަރީފް ފާހަގަކުރައްވާފައެއް ނުވެއެވެ. ސިޔާސީ ގޮތުން ނުރުހޭތީ ނުވަތަ ސިޔާސީ ބަރުދަނެއް ނެތުމުން ސަރުކާރަށް ފާޑުކިޔަމުންދާ މަންޒަރު މިހާރު މަޖިލީހުން އާއްމުކޮށް ފެންނަމުންދާ ކަމަށް ޝަރީފް ވަނީ ފާހަގަކުރައްވާފައެވެ. އެއިރެއްގައި އޮންނަ ސަރުކާރުގެ ބާރުގައި ސަރުކާރުގެ އެހީތެރިކަމާއި އެކު ރާއްޖޭގެ ފަޅުތަކާއި، ރަށްތަކާއި، ރިސޯޓްތައް ވިއްކައިގެން މުއްސަނދިވެފައި ތިބި ވިޔަފާރިވެރިން މަޖިލީހުގައި އެބަ ތިބި ކަމަށް ޝަރީފް ވިދާޅުވިއެވެ. އެފަދަ މެމްބަރުން މަސައްކަތްކުރަނީ އަނެއްކާވެސް ސަރުކާރަށް ފާޑުކިޔައިގެން ސަރުކާރު މެދުވެރިކޮށް އަމިއްލަ ފައިދާތަކެއް ހޯދަން ކަމަށް ޝަރީފް ވިދާޅުވިއެވެ.
މަޖިލީހުގައި މިފަދަ މޭރުމަކުން ޝަރީފް ވާހަކަދައްކަވާފައި ވާއިރު މަޖިލީހުގައި އެކި ދާއިރާތަކުން ވިޔަފާރިތައް ހިންގާ މެމްބަރުން އެބަ ތިއްބެވިއެވެ. އޭގެ ތެރޭގައި ރިސޯޓް ދާއިރާގެ ވިޔަފާރީގައި ހިއްސާވާ މެމްބަރުންގެ އަދަދު ނިސްބަތުން ގިނަކަން ފާހަގަކޮށްލެވެއެވެ.
