ޗެލްސީގެ ނަތީޖާތައް ދަށްވެ، ޕޮޗެޓީނޯ އަށް ޕްރެޝަރު ބޮޑު ވަނީ!

ޗެލްސީގެ ނަތީޖާތައް އިންތިހާ އަށް ދަށްވުމުގެ ސަބަބުން، އެ ޓީމުގެ ކޯޗު އާޖެންޓީނާގެ މައުރީސިއޯ ޕޮޗެޓީނޯ އަށް ޕްރެޝަރު ބޮޑުވާން ފަށާފައިވާ ކަމަށް މީޑިއާ ރިޕޯޓުތައް ބުނެފި އެވެ.

ޗެލްސީގެ ކޯޗުކަމާ ޕޮޗެޓީނޯ ހަވާލުވީ ވެސް އެ ޓީމުގެ ނަތީޖާތައް ދަށްވެފައި ވަނިކޮށެވެ. ޗެލްސީގެ ކޯޗުކަމާ އޭނާ ހަވާލުވީ މިއަހަރުގެ ޖުލައި މަހުގެ ތެރޭގަ އެވެ. އެ ކުލަބާ އޭނާ ހަވާލުވީ ދެ އަހަރު ދުވަހުގެ އެއްބަސްވުމެއްގެ ދަށުންނެވެ. އެ އެއްބަސްވުމުގެ މުއްދަތު ހަމަވާނީ 2025 ވަނަ އަހަރުގެ ޖޫން މަހުގެ ނިޔަލަށެވެ. ޕޮޗެޓީނޯ އަށް ހަވާލުކޮށްފައި އޮތް އެންމެ ބޮޑު މަސައްކަތަކީ ނަތީޖާތައް ދަށްވެފައިވާ ޗެލްސީގެ ނަތީޖާ ރަނގަޅު ކުރުމެވެ.

އޭނާ ހަވާލުވި ފަހުން ޗެލްސީ އަށް ވަނީ ނަތީޖާ ނެރެވޭ ގޮތް ނުވެފަ އެވެ. އެގޮތުން މި ސީޒަންގެ އިނގިރޭސި ޕްރިމިއާ ލީގުގައި އެ ޓީމުގެ ނަތީޖާތައް ވަނީ އިންތިހާ އަށް ދަށްވެފަ އެވެ. މި ސީޒަންގެ ލީގުގައި މިހާތަނަށް ޗެލްސީން ވަނީ 18 މެޗެއް ކުޅެފަ އެވެ. އޭގެ ތެރެއިން އެ ޓީމަށް މޮޅުވެވިފައި ވަނީ އެންމެ ހަ މެޗުންނެވެ. ހަތަރު މެޗު އެއްވަރުވެފައިވާއިރު، އަށް މެޗުން ވަނީ ބަލިވެފަ އެވެ. ލީގުގައި އެ ޓީމު އޮތީ ވެސް ތާވަލްގެ 10 ވަނައިގަ އެވެ. ލީގުގައި އެންމެ ފަހުން ވުލްވްސްއާ ދެކޮޅަށް ކުޅުނު މެޗުން ވެސް ޗެލްސީ ބަލިވެފައިވާއިރު، ޕޮޗެޓީނޯ އަށް ޕްރެޝަރު ބޮޑުވެފައިވާ ކަމަށް މީޑިއާ ތަކުން ވަނީ ރިޕޯޓުކޮށްފަ އެވެ. އެގޮތުން ޗެލްސީގެ ނަތީޖާތައް ދަށްވެފައިވާ މައްސަލައިގައި އެ ކުލަބުގެ އިސްވެރިންގެ ކަންބޮޑުވުން އޮތް ކަމަށާއި، އެކަމުގެ ޕްރެޝަރު ޕޮޗެޓީނޯ އަށް ކުރާނެ ކަމަށް މީޑިއާ ތަކުން ބުނެ އެވެ.

ޗެލްސީގެ ނަތީޖާތައް ދަށްވާ މައްސަލައިގައި ޕޮޗެޓީނޯ ބުނީ، ކޮންމެ ކަމެއް ވެސް ކުރެވޭނީ އެކަށީގެންވާ ވަގުތު ލިބިގެން ކަމަށެވެ. އެގޮތުން ޗެލްސީ އާއެކު ކުރިއަށް ދިޔުމަށް، އޭނާ އަށް އެކަށީގެންވާ މިންވަރަށް ވަގުތު ބޭނުންވާނެ ކަމަށް އޭނާ ވަނީ ބުނެފަ އެވެ. އެންމެ ފަހުންް ކުޅުނު މެޗަށްފަހު ޕޮޗެޓީނޯ ބުނީ، އެއީ ޗެލްސީ އަށް ހައްގު މިންވަރު ނޫން ކަމަށެވެ. އޭނާ ބުނެފައިވާ ގޮތުގައި ޗެލްސީގައި އޮތީ ޒުވާން ކުޅުންތެރިންގެ މައްޗަށް އެކުލެވިގެންވާ ސްކޮޑެކެވެ. އެހެންކަމުން، އެ ކުޅުންތެރިންނަށް ތަޖުރިބާ ބޭނުންވާނެ ކަމަށާއި، މިހާރު ވެސް އެ ކުޅުންތެރިން އަންނަނީ ކަންތައްތައް ދަސްކޮށް، ކުރިއަށް ދާން މަސައްކަތް ކުރަމުން ކަމަށް އޭނާ ވަނީ ބުނެފަ އެވެ. ހަމައެހެންމެ، ޗެލްސީގެ ޓީމާމެދު ފުރިހަމަ އިތުބާރާއި، އުންމީދު އޮތް ކަމަށް ވެސް އޭނާ ވަނީ ބުނެފަ އެވެ.