ވަޒީރުންނަށް ރުހުން ދިނުމުގައި ރައްޔިތުންގެ ޚިޔާލާއި މަޝްވަރާ ވަރަށް ބޮޑަށް ހޯދާނަން: މެންބަރު ޔާސިރު
އެމްޑީޕީގެ ތެރޭގައިވެސް މަޝްވަރާތައް ކުރިއަށްދޭ
ކުޅުދުއްފުށީ އުތުރު ދާއިރާގެ މެންބަރު، ޔާސިރު އަބްދުއްލަތީފު
ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ކެބިނެޓަށް ރުހުން ދިނުމާ ގުޅޭގޮތުން ރައްޔިތުންގެ ޚިޔާލު ވަރަށް ބޮޑަށް ހޯދަމުންދާ ކަމަށް ކުޅުދުއްފުށީ އުތުރު ދާއިރާގެ މެންބަރު ޔާސިރު އަބްދުއްލަތީފު ވިދާޅުވެއްޖެއެވެ.
ރާއްޖެޓީވީގައި ވާހަކަދައްކަވަމުން ޔާސިރު ވިދާޅުވީ، މި ސަރުކާރުގެ ވަޒީރުންނަށް ރުހުން ދިނުމަށް މަޝްވަރާ ކުރަމުންދާ ކަމަށާއި، އެމްޑީޕީގެ ތެރޭގައިވެސް މަޝްވަރާތައް ކުރިއަށްދާކަމަށެވެ. އަދި މަޖިލީހުގެ މެންބަރުން ވަކި ސްޓޭންޑެއް ނުނަންގަވާކަމަށް ޔާސިރު ވިދާޅުވިއެވެ. ޕާޓީގެ ރައީސް އަދި ކުރީގެ ރައީސް އިބްރާހީމް މުހައްމަދު ސާލިހު ދެއްވާ އިރުޝާދަށް އިޝާރަތް ކުރައްވައި ޔާސިރު ވިދާޅުވީ، ދިވެހި ގައުމަށް އެންމެ ރަނގަޅު ގޮތަށް ކަންކަން ނިންމުމަށް އަންގަވާފައިވާކަމަށެވެ.
ޔާސިރު ވިދާޅުވީ ވަޒީރުންނަށް ރުހުން ދިނުމާ ގުޅޭގޮތުން ގާތް ރައްޓެހިންނާއި، ދާއިރާގެ ރައްޔިތުންނާވެސް މަޝްވަރާ ކުރަމުންދާކަމަށާއި، ޚިޔާލުތައް ހޯދަމުންދާކަމަށެވެ. މި ކެބިނެޓުގައި ތިއްބެވި ބައެއް ވަޒީރުންނަކީ ގާބިލް ބޭފުޅުން ނޫންކަމަށާއި، ކޮލިޓީ ނެތް ބޭފުޅުންނަށް ރުހުންދިނުމަކީ މަޖިލިސް މެންބަރުން ކުރައްވައިގެން ވާނެ ކަމެއް ނޫންކަމަށް ވަރަށް ފާޅުކަން ބޮޑު ގޮތެއްގައި ރައްޔިތުން ބުނަމުންދާ ކަމަށް ޔާސިރު ވިދާޅުވިއެވެ.
މީގެ އިތުރުން ކެބިނެޓްގެ ހުރިހާ ވަޒީރުންނަށް ރުހުން ދިނުމަށްފަހު، މައްސަލަތައް އުޅޭނަމަ މަޖިލީހުގެ ތެރެއިން މަގާމުން ދުރުކުރާ ގޮތަށްވެސް ޚިޔާލު ހުށަހަޅާފައިވާކަމަށް ޔާސިރު ވިދާޅުވިއެވެ. އަދި ވިދާޅުވީ މި މަސައްކަތުގައި ރައްޔިތުންނާއި ގައުމުގެ މަސްލަހަތު އިސްކުރައްވާނެ ކަމަށެވެ.
