ޣައްޒާއަށް އެހީވުމަށްޓަކައި އިރާގުން މިސްރަށް ތެޔޮ ފޮނުވަނީ
21 ޑިސެމްބަރު 2023 | ބުރާސްފަތި 14:48ކުރިއަށް އޮތް ތަނުގައި އިތުރު އެހީތައްވެސް ފޯރުކޮށްދޭނެކަމަށް އެ ގައުމުގެ ސަރުކާރުން ބުނޭ
ޣައްޒާއަށް އެހީވުމަށްޓަކައި އިރާގުން މިސްރަށް ތެޔޮ ފޮނުވަނީ
ޣައްޒާއަށް އެހީވުމަށް، އިރާގުގެ ސަރުކާރުން ތެޔޮ ޓޭންކަރެއް ފޮނުވައިފިއެވެ.
އިރާގުގެ ސަރުކާރުން ވަނީ ޣައްޒާއަށް ބޭނުންވެފައިވާ ތެޔޮ ފޯރުކޮށްދިނުމަށް އެހީވުމަށް، މިސްރަށް ތެޔޮ ޓޭންކެއް ފޮނުވާފައެވެ.
އިރާގުގެ ބޮޑުވަޒީރުގެ އެޑްވައިޒަރ ފޮރ ހިއުމެނިޓޭރިއަން އެފެއަރޒް، ޒިދާން ޚަލަފް ވަނީ، އެގައުމުން ޣައްޒާއަށް ފޯރުކޮށްދޭން ބޭނުންވާ ތެޔޮ މިހާރު ބަސަރާއިން ސުއެޒް ކެނަލަށް ފުރާފައިވާކަން ހާމަކުރައްވާފައެވެ.
އިރާގު ސަރުކާރުން ވަނީ 10 މިލިއަން ލީޓަރުގެ ތެޔޮ ޣައްޒާއަށް ފޮނުވަން ނިންމާފައެވެ. އަދި ކުރިއަށް އޮތް ތަނުގައި އިތުރު އެހީތައްވެސް ފޯރުކޮށްދޭނެ ކަމަށް އެގައުމުގެ ސަރުކާރުން ބުނެއެވެ.
ހަމާސްއާ ދެކޮޅަށް ހަނގުރާމަ އިއުލާނުކޮށް މުޅި ޣައްޒާ ބަންދުކުރުމަށްފަހު، އިސްރާއިލުން ޣައްޒާއަށް އެތެރެކުރުން އެންމެ ފުރަތަމަ ހުއްޓުވި އެކައްޗަކީ ތެލެވެ. ތެޔޮ ނުލިބުމުގެ ސަބަބުން ޣައްޒާގެ ހޮސްޕިޓަލްތަކާއި އެމްބިއުލާންސްތަކުގެ ޚިދުމަތަށްވެސް ވަނީ ބުރޫއަރާފައެވެ.
ޣައްޒާއަށް ބޭނުންވާ އެހީ ފޯރުކޮށްދިނުމަށް ގިނަ މަސައްކަތްތަކެއް ކުރެވުމުން ދިޔަނަމަވެސް، ޣައްޒާގެ ރައްޔިތުންނަށް ބޭނުންވާ އެހީ ފޯރުކޮށްދިނުމަށް އިސްރާއީލުން ދަނީ ގިނަ ހުރަސްތަކެއް އަޅަމުންނެވެ. ފަހުގެ ތާރީޚެއްގައި ދުނިޔެ ދެކެމުންދާ އެންމެ ބޮޑު އިންސާނީ ކާރިސާ ޣައްޒާއާ ކުރިމަތިވެފައިވާއިރު، ޣައްޒާގެ ރައްޔިތުން ވަނީ އަސާސީ އެތައް ޚިދުމަތްތަކަކުން މަހުރޫމުވެފައެވެ.
