ކެޕިޓަލް އަށް ދިން ހަމަލާގެ ކުށް ސާބިތުވެ ޕްރައުޑް ބޯއީސްގެ ކުރީގެ ލީޑަރު ތިން އަހަރަށް ޖަލަށްލާން ހުކުމްކޮށްފި

އެމެރިކާގެ ހައްދުފަހަނައަޅާފައިވާ ޕްރައުޑް ބޯއީސް ހަރުކަށި ފިކުރުގެ ޖަމާއަތުގެ ކުރީގެ ލީޑަރަކު މީގެ ތިން އަހަރު ކުރިން އެމެރިކާގެ ކެޕިޓަލް އިމާރާތަށް ހަމަލާ ދިނުމުގެ ރޭވުމުގައި ބައިވެރިވި ކަމަށް ބުނެ ތިން އަހަރުހެ ޖަލު ހުކުމެއް އިއްވައިފިއެވެ. 

ޗާލްސް ޑޮނޯހޯ އަކީ 2021 ވަނަ އަހަރުގެ ޖެނުއަރީ މަހުގެ ހަވަނަ ދުވަހު ކޮންގްރެސްގެ ޖޮއިންޓް ސެޝަންގައި ރައީސް ޖޯ ބައިޑަން ހޯއްދެވި ކާމިޔާބީ ފާހަގަކުރުމަށް ބޭއްވި ޖަލްސާއަށް ހުރަސް އެޅުމަށް އެ ޖަމާއަތުގެ އެހެން މެންބަރުންނާ ގުޅިގެން ރޭވިކަމުގެ ކުށަށް އިއުތިރާފުވި އެ ޖަމާޢަތުގެ ދެވަނަ މެންބަރެވެ.

ނޯތު ކެރޮލައިނާގެ ކެނަރސްވިލްއަށް ނިސްބަތްވާ ޑޮނޯހޯ، 35، އާއި އޭނާގެ އާއިލާއިން ވަނީ ޖެނުއަރީ ހަވަނަ ދުވަހު އޭނާ ކުރި އަމަލުތަކަށް ގާނޫނު ތަންފީޒުކުރާ އޮފިސަރުންނާއި މުޅި އެމެރިކާގެ ކިބައިން މައާފަށް އެދިފައެވެ. 

އެމެރިކާގެ ޑިސްޓްރިކްޓް ގާޒީ ޓިމޮތީ ކެލީ ވަނީ އޭނާ ތިން އަހަރާއި ހަތަރު މަހަށް ޖަލަށް ލުމަށް އަންގާރަ ދުވަހު ހުކުމްކޮށްފަ އެވެ.

2021 ވަނަ އަހަރުގެ މާޗް މަހުގެ ތެރޭގައި ޑޮނޯހޯ ހައްޔަރުކުރި ފަހުން އޭނާ މިހާރު ވެސް ޖަލުގައި ހޭދަކޮށްފައިވާތީ އޭނާގެ ހުކުމުން ކެނޑޭނެތީ މަހެއް ނުވަތަ ދެ މަހެއްހާ ދުވަހުގެ ތެރޭގައި އޭނާ ދޫކޮށްލުމުގެ ހައްގު ލިބިދާނެއެވެ.

ގާޒީ ވިދާޅުވީ ޑޮނޯހޯ އޭނާގެ ކުށްތަކަށް އިސްލާހު ގެނައުމަށް ކުރެވެން ހުރި ހުރިހާ މަސައްކަތެއް ކުރަމުން އަންނަ ތަން ފެންނަ ކަމަށެވެ. 

ޑޮނޯހޯ އަކީ ނޯތު ކެރޮލައިނާގެ ލޯކަލް ޕްރައުޑް ބޯއީސް ޗެޕްޓަރުގެ ރައީސެވެ. އޭނާ އަކީ ޕްރައުޑް ބޯއީސްގެ ކުރީގެ ގައުމީ ޗެއާމަން އެންރީކޭ ޓަރިއޯގެ ލެފްޓިނެންޓެކެވެ. 

އެމެރިކާގެ ރިޔާސީ ބާރުތައް ޑޮނަލްޑް ޓްރަމްޕްގެ އަތްޕުޅުން ބައިޑަންއަށް ސުލްހަވެރިކަމާއެކު ބަދަލުކުރުން ހުއްޓުވަން ރޭވި ކަމުގެ ކުށް ސާބިތުވެ، ޓެރިއޯ އާއި ޕްރައުޑް ބޯއީސްގެ ކުރީގެ ތިން ލީޑަރުންގެ މައްޗަށް މިދިޔަ މެއި މަހު ޖޫރީއަކުން ވަނީ ގައުމިއްޔަތާ ހިލާފު ރޭވުމެއް ރޭވި ކަމުގެ ކުށް ސާބިތުވެފައެވެ.

2022 ވަނަ އަހަރުގެ އޭޕްރީލް މަހުގެ ތެރޭގައި ފެޑެރަލް އޮތޯރިޓީތަކަށް އެއްބާރުލުން ދޭން ޑޮނޯހޯ އެއްބަސްވީ، ރަސްމީ މަރުހަލާއަކަށް ހުރަސް އެޅުމަށް ރޭވުމާއި، ފުލުހުންނަށް ހަމަލާދިނުމާއި، ދެކޮޅު ހެދުމާއި، ހުރަސް އެޅުމުގެ ކުށުގެ ދެ ދައުވާއަށް އިއުތިރާފުވުމުންނެވެ. ނަމަވެސް މި އަހަރުގެ ކުރީކޮޅު ޓަރިއޯ އާއި އެހެނިހެން ޕްރައުޑް ބޯއީސްގެ ޝަރީއަތުގައި ހެކިބަސް ދިނުމަށް އޭނާ ހާޒިރުކޮށްފައެއް ނުވެއެވެ.

ޕްރޮސެކިއުޓަރުން ލަފާ ދިނީ ޑޮނޯހޯއަށް 35 މަހާއި 43 މަހާ ދެމެދުގެ ޖަލު ހުކުމެއް އިއްވުމަށެވެ. ހުކުމް އިއްވުމުގެ ގައިޑްލައިންގައި ލަފާދީފައި ވަނީ 70 މަހާއި 87 މަހާ ދެމެދުގެ މުއްދަތަކަށް ޖަލަށް ލުމަށެވެ.