ބަޔާންގެ އެއްބަސްވުން މުލާ އައުކޮށްފި

ބަޔާން މިއުނިކަށް ކުޅެމުން އަންނަ ޖަރުމަނުގެ ފޯވާޑް، ތޯމަސް މުލާ އެ ކުލަބާއެކު ސޮއިކޮށްފައިވާ އެއްބަސްވުން އައުކޮށްފި އެވެ.

އުމުރުން 34 އަހަރުގެ ތަޖުރިބާކާރު ކުޅުންތެރިޔާ ބަޔާނާއެކު ސޮއިކޮށްފައިވާ އެއްބަސްވުމުގެ މުއްދަތު ހަމަވާން އޮތީ އަންނަ އަހަރުގެ ޖޫން މަހުގެ ނިޔަލަށެވެ. ނަމަވެސް ބަޔާނުން ބޭނުންވީ އޭނާގެ އެއްބަސްވުން އައުކުރުމަށެވެ. އެކަމުގެ މަސައްކަތް މީގެ ދުވަސް ކޮޅެއް ކުރިން ބަޔާނުން ވަނީ ފަށައިފަ އެވެ.

ބަޔާނާއެކު މުލާ ވަނީ އިތުރު އެއް އަހަރު ދުވަހުގެ އެއްބަސްވުމެއްގައި ސޮއިކޮށްފަ އެވެ. އެ އެއްބަސްވުމުގެ މުއްދަތު ހަމަވާނީ 2025 ވަނަ އަހަރުގެ ޖޫން މަހުގެ ނިޔަލަށެވެ. އައު އެއްބަސްވުމުގައި ސޮއިކުރުމަށްފަހު ވާހަކަ ދައްކަމުން މުލާ ބުނީ، ބަޔާންގައި އޭނާގެ ދަތުރު ކުރިއަށް ގެންދެވޭތީ އުފާކުރާ ކަމަށެވެ. އޭނާ ބުނީ ބަޔާންގައި އޭނާގެ ދައުރު އެންމެ ފުރިހަމަ އަށް އަދާ ކުރަން ބޭނުންވާ ކަމަށާއި، ކުރިއަށް ދާން ބޭނުންވަނީ އެއް ޓީމެއް އަދި އެއް ކުލަބެއްގެ ގޮތުގައި ކަމަށެވެ.

މީގެ އިތުރުން އޭނާ ބުނީ ބޭނުންވަނީ ބަޔާންގެ އެންމެހާ ސަޕޯޓަރުންނަށް އުފާވެރިކަން ގެނެސްދޭން ކަމަށެވެ. އެގޮތުން ބަޔާންގައި ލަނޑު ޖަހައި، ލަނޑު ޖެހުމަށް އެހީތެރިވެދޭން އަދިވެސް ބޭނުންވާ ކަމުގައި އޭނާ ވަނީ ބުނެފަ އެވެ. މުލާ ބުނި ގޮތުގައި އޭނާގެ އުންމީދަކީ ކުރިއަށް އޮތް ތަނުގައި ބަޔާނާއެކު، އިތުރު ތަށިތަކެއް ކާމިޔާބުކޮށް، ކުރިއަށް ދިޔުމަށެވެ. އޭނާ ޤަބޫލު ކުރާ ގޮތުގައި ބަޔާންގެ ހުރިހާ ކުޅުންތެރިން އެކުވެގެން ކުރާ މަަސައްކަތުގައި ގިނަ ކާމިޔާބީތަކެއް ޙާސިލްކުރެވޭނެ އެވެ.

ބަޔާންގައި ހޭދަކުރާ 16 ސީޒަންގެ ތެރޭގައި މުލާ ވަނީ މިހާތަނަށް އެ ކުލަބަށް 684 މެޗު ކުޅެދީ، 237 ލަނޑު ޖަހައިފަ އެވެ. އެ ކުލަބާއެކު އޭނާ ވަނީ 32 ތަށި ކާމިޔާބުކޮށްފަ އެވެ. އޭގެ ތެރޭގައި ޖަރުމަނު ލީގު 12 ފަހަރު ކާމިޔާބު ކުރުން ހިމެނެ އެވެ. އޭގެ އިތުރުން، ޖަރުމަނު ކަޕް، ޖަރުމަނު ސުޕަ ކަޕް، ޔުއެފާ ޗެމްޕިއަންސް ލީގު، ޔުއެފާ ސުޕަ ކަޕް އަދި ފީފާ ކުލަބު ވޯލްޑް ކަޕް ވެސް ހިމެނެ އެވެ.