ރާއްޖޭގައި އުޅޭ ބަންގްލަދޭޝް މީހުންގެ އަދަދާގުޅޭ ރެކޯޑްތައް ސަރުކާރުން ޑިލީޓްކުރުމާމެދު އިޤްތިޞާދީ ވަޒީރު މުޙައްމަދު ސައީދު އާއި ސަލާމަތާއި ފަންނިއްޔަތާބެހޭ ވަޒީރު ޢަލީ އިޙުސާންގެ ވާހަކަފުޅު ދިމާނުވާކަން ހާމަވެއްޖެއެވެ.

މި މަހުގެ 17 ވަނަ ދުވަހު މި ސަރުކާރުން ވަނީ ބަންގްލަދޭޝްގެ އަންސްކިލްޑް ލޭބަރުން ރާއްޖެ އަށް އެތެރެވުން ހުއްޓާލާފައި އޮތްއޮތުން ނިމުމަކަށް ގެނެސްފައެވެ. އަދި އެހެން ޤައުމުތަކުން ރާއްޖެ އަށް ބިދޭސީން ގެނައުމުގެ މަސައްކަތް ވަނީ މެދުކަނޑާލާފައެވެ. އެކަމަކީ ޤަވާއިދާއި ޚިލާފަށް ކުރާ ކަމެއް ކަމަށް ފާހަގަކޮށް އިދިކޮޅު ފަރާތްތަކާއި އާއްމުންގެ ފާޑުކިޔުން މި ސަރުކާރަށް ވަރަށް ބޮޑަށް އަމާޒުވެފައި ވަނިކޮށް، ސަރުކާރުން އިކޮނޮމިކް މިނިސްޓްރީން ކުރިން ބިދޭސީންނާއި ގުޅޭގޮތުން އާއްމުކޮށްފައިވާ މައުލޫމާތުތައް ޑިލީޓްކުރަން ފަށާފައިވާކަން ވަނީ ހާމަވެފައެވެ.

އިކޮނޮމިކް މިނިސްޓްރީން މި އަހަރު ނެރުނު ފޮރިން ލޭބަރ ސްޓެސްޓިކްސް އެންޑް އެކްސްޕެޓް ސިސްޓަމް ރިޕޯޓުގައި ވާގޮތުން، ޑިސެމްބަރު މަހުގެ 12 ވަނަ ދުވަހާ ހަމައަށް 139،220 ބަންގްލަދޭޝް މީހުން ރާއްޖޭގައި މަސައްކަތް ކުރަމުން އެބަދެއެވެ. އިކޮނޮމިކް މިނިސްޓްރީގެ ވެބްސައިޓުން ކުރިން އެ މައުލޫމާތު ފެންނަން ހުއްޓެވެ. އެ މައުލޫމާތު ޑިލީޓްކުރުމާއި ގުޅިގެން އާއްމުންގެ ފާޑުކިޔުން ސަރުކާރަށް އިންތިހާ އަށް އަމާޒުވަމުން ދަނިކޮށް އިކޮނޮމިކް މިނިސްޓްރީގެ ފޮރިން ލޭބަރ ސްޓެސްޓިކްސް އެންޑް އެކްސްޕެޓް ސިސްޓަމް ރިޕޯޓެއް ފުހެލާފައިވަނީ އަންގަވައިގެން ނޫންކަމަށް އިކޮނޮމިކް މިނިސްޓަރު މުޙައްމަދު ސައީދު ވަނީ ވިދާޅުވެފައެވެ.

އެކްސް މެދުވެރިކޮށް ސައީދު ވިދާޅުވީ މިނިސްޓްރީގެ ރަސްމީ އެއްވެސް ޕޯސްޓެއް އޭނާ އަންގަވައިގެން ޑިލީޓްކޮށްފައި ނުވާނެ ކަމަށެވެ. އަދި އެކަންކުރި ސަބަބު ތަޙްޤީޤްކުރަން މިހާރު އަންގަވާފައިވާނެކަމަށް ވެސް ސައީދު ވަނީ ވިދާޅުވެފައެވެ.

އެ މައުލޫމާތުތައް އިކޮނޮމިކް މިނިސްޓްރީގެ ރަސްމީ އެކްސް އެކައުންޓާއި ވެބްސައިޓުން އުނިކުރީ މިނިސްޓަރުގެ އިރުޝާދާއި އެކުގައި ނޫންކަން ސާފުކޮށް ސައީދުގެ ވާހަކަފުޅުތަކުން އެނގެއެވެ. އަދި އެކަން ކުރި ސަބަބު ތަހުގީގުކުރަން އެމަނިކުފާނު އަންގަވާފައިވާނެކަން ސައީދު ހާމަކުރައްވާފައިވާތީ، މި މައްސަލައިގައި ކަން ހިނގި ގޮތް އޭނާއަށް ވެސް އެންމެ ރަނގަޅަށް ސާފުވެވަޑައިގަންނަވާކަމާ މެދު ސުވާލު އުފެދެއެވެ.

އާއްމުން ދަނީ އެ މައުލޫމާތުތައް އިކޮނޮމިކް މިނިސްޓްރީގެ ވެބްސައިޓުން ޑިލީޓްކޮށްލުމުން އެކަމާ މެދު ކަންބޮޑުވުން ފާޅުކުރަމުންނެވެ. މި މައްސަލައިގައި މިނިސްޓަރު އިހުސާންގެ ވާހަކަފުޅާއި މިނިސްޓަރު ސައީދުގެ ވާހަކަފުޅު އެއްވެސް ވަރަކަށް ދިމާނުވާކަން ފާހަގަކުރެވެއެވެ. ހޯމަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި އިހުސާން ވިދާޅުވީ އެއްވެސް މައުލޫމާތެއް ގެއްލިގެން އުޅޭކަން އެނގިވަޑައިނުގަންނަވާކަމަށެވެ. އަދި އިކޮނޮމިކް މިނިސްޓްރީގެ ވެބްސައިޓުގައި ކުރިން ޝާއިއުކޮށްފައިވާ ރިޕޯޓް އިންގޮތަށް ހޯމްލޭންޑް ސެކިއުރިޓީގެ ވެބްސައިޓުން ލިބޭނެ ގޮތް ހަމަޖައްސަވާނެ ކަމަށް އިހުސާން ވަނީ ވިދާޅުވެފައެވެ. އެހެންކަމުން އެ މައުލޫމާތު އެ މިނިސްޓްރީގެ ބެލުމުގެ ދަށަށް ގެނައިކަމަށް އިހުސާންގެ ވާހަކަފުޅުތަކުން ދޭހަވެއެވެ.

އިހުސާން ވަނީ ކުރިން ބިދޭސީ މަސައްކަތްތެރިންނާއި ގުޅުން ހުރި މަސައްކަތްތައް ކުރަމުން އައީ އިކޮނޮމިކް މިނިސްޓްރީގެ ބެލުމުގެ ދަށުން ކަމަށާއި އެ މަސައްކަތްތައް މިހާރު ކުރަމުންދަނީ ސަލާމަތާއި ފަންނިއްޔަތާބެހޭ ވުޒާރާގެ ދަށުންކަމަށް ވިދާޅުވެފައެވެ. އަދި ޑިލީޓްކޮށްފައިވާ މައުލޫމާތުތަކުގެ ތެރޭގައި ހިމެނޭ ރިޕޯޓު އިކޮނޮމިކް މިނިސްޓްރީގެ ވެބްސައިޓުން އުނިކޮށްފައިވީ ނަމަވެސް، ސަލާމަތާއި ފަންނިއްޔަތާބެހޭ ވުޒާރާގެ ވެބްސައިޓުގައި އެ މައުލޫމާތު ހިމަނުއްވާނެ ކަަމަށް އިހުސާން ވިދާޅުވިއެވެ. އެކަން އެގޮތަށް ކުރެއްވީ އެ ވުޒާރާއެއްގެ ވެބްސައިޓުގައި ލިޔެފައިވާ މައުލޫމާތަކަށް އެ ވުޒާރާއަކުން ޖަވާބުދާރީވާން ޖެހޭތީ ކަމަށް އިހުސާން ވިދާޅުވިއެވެ. ހަމައެހެންމެ މިހާރު އެ މަސައްކަތާއި ގުޅޭ ފަންނީ މުވައްޒަފުން ވެސް ތިބީ ފަންނިއްޔަތާބެހޭ ވުޒާރާގައި ކަމަށާއި އެ ރިޕޯޓު ވެސް މިނިސްޓްރީން ޝާއިއުކޮށްދޭނެ ކަމަށް އިހުސާން ވިދާޅުވިއެވެ.

އެ ރިޕޯޓުގައި ދައްކާ 139،220ގެ އަދަދަކީ އެެއީ އެކްޓިވް ވަރކް ޕަރމިޓުގެ އަދަދު ކަަމަށް ވެސް އިހުސާން ވަނީ ވިދާޅުވެފައެވެ. އިހުސާން މިހެން ވިދާޅުވުމާ އެކު ސައީދު ކުރިން އެ މައްސަލަ ތަހުގީގުކުރަން އެންގެވި ސަބަބާ މެދު ވަނީ ސުވާލު އުފެދިފައެވެ. އެ މައުލޫމާތު އުނިކުރިކަން އިހުސާން އަށް އެނގިވަޑައިނުގަންނަވާއިރު އެ މައުލޫމާތު އުނިކުރީ ސައީދަށް އެނގުމަކާއި ނުލާތޯ ވެސް ވަނީ ސުވާލު އުފެދިފައެވެ. އަދި އެއްވެސް މައުލޫމާތެއް ހާމަކުރުމަކާއި ނުލާ ރަސްމީ އިދާރާއެއް ލިޔުންތައް ޑިލީޓްކުރެއްވުމަށް ފަހު އޭގެ ދެ ދުވަސް ފަހުން އިހުސާން އެފަދައިން ވިދާޅުވެފައިވާތީ، މައުލޫމާތުތައް ޑިލީޓްކުރުމުގެ ކުރިން އެކަން ސާފުކޮށް ހިއްސާނުކުރެއްވީ ކީއްވެތޯ ވެސް ސުވާލު އުފެދެއެވެ.