ގދ. ތިނަދޫއަށް ސިޓީއެއްގެ ދަރަޖަ ދިނުމަށް ލާމަރުކަޒީ ގާނޫނަށް ބަދަލު ގެންނަން ކޮމިޓީން ނިންމައިފިއެވެ.

އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގެ ދަށުން ތިނަދޫއަކީ ސިޓީއެއް ކަމަށް މި އަހަރުގެ އޮގަސްޓު މަހުގެ 30 ވަނަ ދުވަހު ކަނޑައެޅުއްވީ ކުރީގެ ރައީސް އިބްރާހީމް މުޙައްމަދު ޞާލިޙެވެ.

ލާމަރުކަޒީ ކޮމެޓީން މި މަހުގެ 11 ވަނަ ދުވަހު ބޭއްވި ބައްދަލުވުމުގައި ތިނަދޫ ރަށު ކައުންސިލް، ސިޓީ ކައުންސިލަށް ބަދަލުކޮށް، ސިޓީ ކައުންސިލަކަށް ލިބިދޭ ބާރުތައް ދޭންޖެހޭ ކަމަށް ވަނީ ފާސްކޮށްފައެވެ.

ކޮމެޓީގެ ނިންމުމަށްފަހު، ލާމަރުކަޒީ ގާނޫނު މިހާރު އޮތް ގޮތުން ގާނޫނު މާނަ ކުރުމުގައި ތަފާތު މާނައެއް ނެގި ދާނެ ކަމަށް މަޖިލީހުގެ ކައުންސިލް ޖެނެރަލް ލަފާދެއްވާފައިވާ ކަމަށް ކޮމިޓީގެ މުގައްރިރު އަދި ހުޅުމާލެ ދާއިރާގެ މެންބަރު އަލީ ނިޔާޒް ވަނީ ވިދާޅުވެފައެވެ.

އެހެންކަމުން، އިތުރު އޮޅުމެއް ނާރާނެ ގޮތަށް ގާނޫނު މާނަކޮށް، މިހާރު ހުރި މައްސަލަތަކަށް ދާއިމީ ހައްލެއް ގެނައުމަށް، ކޮމެޓީއިން ފާސް ކުރި ރިޕޯޓު މަޖިލީހުގެ ތަޅުމަށް ފޮނުވުމުގެ ކުރިން، އިތުރު އިސްލާހެއް ގެނައުން މުހިންމު ކަމަށް ވިދާޅުވިއެވެ.

ކޮމިޓީން ނިންމާފައި ވަނީ އެ ގާނޫނަށް އިސްލާހެއް ގެނައުމަށެވެ.

ނަމަވެސް އެ ކައުންސިލެއް ސިޓީ ކައުންސިލަކަށް ބަދަލުވުމަށް ފަހު އެ ދައުރު ދެމި އޮންނާނީ ރަށު ކައުންސިލްގެ ދައުރު ހަމަވަންދެންނެވެ.

މީގެ އިތުރުން، ސިޓީ ކައުންސިލްގެ ބާރުތަކާއި މަސްއޫލިއްޔަތުތައް ލިބޭނެ ގޮތަށް މި އިސްލާހަށް ބަދަލު ގެނައުމަށް ކޮމިޓީން ނިންމާފައިވެއެވެ.