ކުރިއަށް އޮތް ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ އިންތިޚާބުގައި ވާދަނުކުރެއްވުމަށް އެ އެސޯސިއޭޝަންގެ މިހާރުގެ ރައީސް ބައްސާމް އަދީލް ޖަލީލް ނިންމެވުމަކީ ފުޓުބޯޅަ އަށް ލިބުނު ވަރަށް ބޮޑު ކާމިޔާބެއްގެ ގޮތުގައި އަލީ އާޒިމް ސިފަކުރައްވައިފި އެވެ.

އަންނަ އަހަރުގެ މެދު ތެރޭގައި މިހާރު ހިނގަމުންދާ ބައްސާމްގެ ދައުރުގެ މުއްދަތު ހަމަވާނެ އެވެ. ނަމަވެސް އޭގެ އެތައް ދުވަހެއް ކުރިން، އަންނަ ޖަނަވަރީ މަހު އެފްއޭއެމްގެ އިންތިޚާބު ބާއްވަން ބައްސާމް ވަނީ ނިންމަވާފަ އެވެ. އިންތިޚާބުގައި ވާދަކުރަން ބޭނުންވާ ފަރާތްތަކަށް އެފްއޭއެމުން އެ ފުރުސަތު ހުޅުވާލާފައިވާއިރު، ބައްސާމް ނިންމެވީ އިންތިޚާބުގައި ވާދަނުކުރެއްވުމަށެވެ. 2016 ވަނަ އަހަރު އެފްއޭއެމްގެ ރައީސްކަމަށް އިންތިޚާބުވި ބައްސާމް މިހާރު ފުރުއްވަމުން އެ ގެންދަވަނީ ދެ ވަނަ ދައުރެވެ.

ރާއްޖެ ޓީވީގެ ކުޅިވަރު ފައިލް ޕްރޮގްރާމްގައި ވާހަކަފުޅު ދައްކަވަމުން އެފްއޭއެމްގެ ފުރަތަމަ އިންތިޚާބީ ރައީސް އާޒިމް ވިދާޅުވީ، އެފްއޭއެމްގެ ހިންގާ ކޮމެޓީގައި ތިއްބެވި ބައެއް މެންބަރުން އިސްތިއުފާ ވެސް ދެއްވާފައިވާ ކަމަށެވެ. އެހެންކަމުން، ކުރިއަށް އޮތް އިންތިޚާބުގައި ވާދަ ނުކުރައްވަން ބައްސާމް ނިންމެވީ މަޖުބޫރުވެގެން އަދި އެ ނޫން އެހެން ގޮތެއް ނެތިގެން ކަމަށް ވެސް އާޒިމް ވަނީ ވިދާޅުވެފަ އެވެ. ނުބައި ހިސާބެއްގައި ދިވެހި ފުޓުބޯޅައިގެ ޙާލަތު އޮތްއިރު، އިންތިޚާބުގައި ވާދަނުކުރައްވަން ބައްސާމް ނިންމެވި ނިންމެވުމަކީ، ދިވެހި ފުޓުބޯޅަ އަށް ލިބުނު ކާމިޔާބީއެއް ކަމަށް ވެސް އާޒިމް ވިދާޅުވި އެވެ. އިތުރަށް އާޒިމް ވިދާޅުވި ގޮތުގައި ފުޓުބޯޅަ ދެން ފަށަން ޖެހޭނީ ކޮން ހިސާބަކުން ކަމެއް ވެސް ނޭންގޭ ކަމަށެވެ.

ބައްސާމާއި އޭނާގެ ޓީމުން އެފްއޭއެމުގެ އަސާސީ ގަވާއިދާ ހިލާފަށް ކަންތައްތައް ކުރަމުންދާތީވެ، ދިވެހި ފުޓުބޯޅަ އަށް ދެން ރަނގަޅު ވާނީ ސަސްޕެންޝަނެއް އައުން ކަމަށް މީގެ ކުރިން އާޒިމް އޮތީ ވިދާޅުވެފަ އެވެ. އާޒިމް ވިދާޅުވީ އެފްއޭއެމްގެ ހިންގުމުގައި ޤަވާއިދާ ޚިލާފަށް އެތައް ކަމެއް ހިންގަން ފުރުސަތު ލިބުނީ އެކަން ހުއްޓުވަން ޖެހޭ ބެލެނިވެރި ފަރާތްތަކަށް ވެސް ފަރުވާކުޑަކޮށްލުމުން ކަމަށެވެ.

އާޒިމް ވިދާޅުވީ މިކަންކަން މިހާރު ދެން ރަނގަޅު ކުރެވޭނީ ފުޓުބޯޅަ ކުލަބުތަކަށް ކަމަށެވެ.

ބައްސާމް ދުރަށް ވަޑައިގަންނަވަމުން ނިންމެވިއިރު އެފްއޭއެމްގެ ހިންގުމުގައި ގިނަގުނަ މައްސަލަތަކެއް ދިމާވެ، އެ އިދާރާ އޮތީ ބަނގުރޫޓުވުމާ ކައިރީގަ އެވެ. އެގޮތުން އެފްއޭއެމްގެ އިސްވެރިންނާ ދެކޮޅަށް ވަނީ މަނީ ލޯންޑަރިންގެ ތުހުމަތުކޮށްފަ އެވެ. އެ މައްސަލަ ދިވެހި ފުލުހުންނާއި، ޕްރޮސެކިއުޓާ ޖެނަރަލް (ޕީޖީ) ތަހުގީގު ކުރަމުން އަންނައިރު، އެ މައްސަލަ މިހާރު އޮތީ ދައުވާ ކުރާ ހިސާބުގަ އެވެ. ޕީޖީ ޙުސެއިން ޝަމީމް ވިދާޅުވީ، އެ މައްސަލައިގެ މައިގަނޑު ސަސްޕެކްޓަކީ އެފްއޭއެމްގެ ރައީސް ބައްސާމް ކަމަށެވެ.