ރާއީސުލްޖުމްހޫރިއްޔާ އާއި ނައިބު އަޒުލުކުރުމާއި ގުޅުން ހުރި މާއްދާތަކަށް ގެނައި އިސްލާހުތައް ފާސްކޮށްފި
މަޖިލީހުގެ ގަވާއިދުގެ 202 އަދި 203 ވަނަ މާއްދާއަށް ވަނީ އިސްލާހު ގެނެސްފައި
މަޖިލީހުގެ ވޯޓުގެ ތަފްސީލް
ރައްޔިތުންގެ މަޖިލީހުގެ ގަވާއިދުގެ 202 ވަނަ މާއްދާއާއި 203 ވަނަ މާއްދާ އަދި 49 ވަނަ މާއްދާ އިސްލާހުކުރުމަށް އާންމު ކޮމިޓީން ނިންމި ގޮތަށް އިތުރު އިސްލާހަކާ އެކު، މަޖިލީހުގެ ގަވާއިދު ފާސްކުރަން ފާސްކޮށްފިއެވެ.
އާއްމު ކޮމިޓީ އަށް ކޮމިޓީއަށް ހުށަހެޅީ 202 އަދި 203 ވަނަ މާއްދާ އިސްލާހުކުރުމަށާއި 49 ވަނަ މާއްދާއަށް ހުށަހެޅުމަށެވެ. ދަ ޑިމޮކްރެޓްސްގެ ޕާލިމަންޓްރީ ގްރޫޕުގެ ލީޑަރު އަލީ އާޒިމް ވަނީ މަޖިލީހުގެ ގަވާއިދުގެ 202 އަދި 203 ވަނަ މާއްދާއަށް ހުށަހަޅާފައެވެ. އިހަވަންދޫ ދާއިރާގެ އެމްޑީޕީ މެމްބަރު މުހައްމަދު ޝިފާއު ވަނީ މަޖިލީހުގެ ޖުމްލަ އަދަދު މާނަ ކުރާ ގޮތަށް އިސްލާހުގެނައުމަށް ހުށަހަޅުއްވާފައެވެ. އެގޮތުން، އޭނާ ހުށަހެޅުއްވި އިސްލާހުގައި ބުނަނީ މަޖިލީހުގެ ޖުމްލަ އަދަދު ގުނުމުގައި ބަލާނީ، އެ ވަގުތަކު މަޖިލީހުގެ މެމްބަރުންގެ ގޮތުގައިތިއްބެވި މެންބަރުންގެ އަދަދަށް ކަމަށެވެ. މިހާރު މަޖިލީހުގައި ތިއްބެވި މެންބަރުންގެ އަދަދަކީ 80އެވެ. އެހެންކަމުން ޝިފާއުގެ އިސްލާހާއި އެކު މަޖިލީހުގެ ތިން ބައިކުޅަ ދެ ބަޔަކަށް ވާނީ 54 މެންބަރުންގެ ވޯޓެވެ. ޝިފާއު ހުށަހެޅުއްވާފައި ވަނީ މަޖިލީހުގެ މެންބަރުންގެ އަދަދު ގުނާއިރުގައި އިސްތިއުފާ ދެއްވާފައިވާ މެންބަރުން ނުގުނައި ގޮތަށެވެ.
އެ މާއްދާތައް އިސްލާހުކޮށް ކޮމިޓީން ނިންމި ގޮތުގެ ރިޕޯޓަށް ވޯޓަށް އެހުމުގެ ކުރީގައި ތުޅާދޫ ދާއިރާގެ އެމްޑީޕީ މެންބަރު ހިސާން ހުސައިން އެ ރިޕޯޓަށް އިސްލާހެއް ހުށަހެޅުއްވިއެވެ. އެ އިސްލާހަކީ މައްސަލަ ތަހުގީގުކުރަމުންދާއިރު ރައީސާއި ނައިބު ރައީސަށް ދިފާއުގައި ވާހަކަދެއްކުމުގެ ފުރުސަތު ލިބޭގޮތަށް ހުށަހެޅި އިސްލާހެކެވެ. އެ އިސްލާހުގައި ބުނާގޮތުން ކޮމިޓީއަށް ހާޒިރުވެ، ރައީސާއި ނައިބު ރައީސަށް ދިފާއުގައި ވާހަކަދެއްކުމުގެ ފުރުސަތު ލިބޭނެއެވެ. އަދި، ކޮމިޓީއަށް ހާޒިރުކުރުމުގެ ކުރީގައި މަދުވެގެން ދެ ގަޑިއިރުގެ ނޯޓިސް އެއް ދޭންވާނެއެވެ. ހަމައެހެންމެ ކޮމިޓީން މައްސަލަ ދިރާސާކުރުމަށް ފަހު، ފަސް ދުވަހުގެ ތެރޭގައި ރިޕޯޓެއް އެކުލަވައިލާ މަޖިލީހުގެ ރައީސަށް ފޮނުވަންޖެހޭނެ ކަމަށާއި އެ ރިޕޯޓަށް ލިޔުމުން ޖަވާބުދާރީވާން ވެސް ރައީސާއި ނައިބު ރައީސަށް ދެ ދުވަހުގެ ފުރުސަތެއް ދޭން ހުށަހަޅާފައިވެއެވެ. އެހެންކަމުން އެ މައްސަލައިގައި އެކުލަވައިލާ ރިޕޯޓަށް ހަފުތާއެއް ތެރޭގައި ވޯޓަށް އަހަންވާނެ ކަމަށް އެ އިސްލާހުގައި ވަނީ ބުނެފައެވެ.
މަޖިލީހުގައި މިއަދު އެންމެ ފުރަތަމަ ވޯޓަށް އަހާފައި ވަނީ ހިސާން ހުށަހެޅުއްވި އިސްލާހުތައް ފާސްކުރުމާއި މެދު ގޮތެއް ނިންމުމަށެވެ. އެ އިސްލާހުތައް ފާސްވީ ވޯޓުގައި ބައިވެރިވެވަޑައިގެން 55 މެންބަރުންގެ ތެރެއިން 45 މެންބަރުންގެ ވޯޓާއި އެކުގައެވެ. އަދި އެއިސްލާހު ބަލައިގަތުމާ ދެކޮޅަށް 10 މެންބަރަކު ވޯޓުދެއްވިއެވެ.
ހިސާންގެ އިސްލާހާ އެކު މަޖިލީހުގެ ގަވާއިދަށް އިސްލާހު ގެނައުމާ މެދު ނެގި ވޯޓުގައި އެ އިސްލާހު ފާސްވެފައި ވަނީ ވޯޓުގެ ބައިވެރިވެވަޑައިގެން 55 މެންބަރުންގެ ތެރެއިން 44 މެންބަރުންގެ ވޯޓާއި އެކުގައެވެ. އެ އިސްލާހާ ދެކޮޅަށް ވޯޓުދެއްވީ 10 މެންބަރުންނެވެ. އެ އިސްލާހު ފާސްކުރުމާއި މެދު ވަކި ގޮތަކަށް ވޯޓު ނުދެއްވާ އެއް މެންބަރަކު އިންނެވިއެވެ. އެހެންވެ، މަޖިލީހުގެ ގަވާއިދުގެ 202 ވަނަ މާއްދާއާއި 203 ވަނަ މާއްދާއަށް އާންމު ކޮމިޓީން ގެނައި ބަދަލާ އެކު މަޖިލީހުން ހުށަހެޅި އިސްލާހު އިތުރުކުރުމަށް ފަހު ވަނީ ފާސްކޮށްފައެވެ.
