ވަޒީރުންނަށް ރުހުން ދިނުމަށް ވޯޓަށް އެހުމާއި މެދު ނިޒާމީ މައްސަލައެއް، މަޖިލިސް ބްރޭކަކަށް
18 ޑިސެމްބަރު 2023 | ހޯމަ 04:27މަޖިލީހުގެ ހޯމަ ދުވަހުގެ ޖަލްސާގެ ރިޔާސަތުގައި އިންނެވީ މަޖިލީހުގެ ރައީސް މުހައްމަދު އަސްލަމް
ރައްޔިތުންގެ މަޖިލީހުގެ ރައީސް މުޙައްމަދު އަސްލަމް
ރައްޔިތުންގެ މަޖިލީހުން ވަޒީރުންނަށް ރުހުން ދިނުމުގެ ރިޕޯޓަށް ވޯޓަށް އެހުމާއި މެދު ނިޒާމީ މައްސަލަ އެއް ހުށަހަޅާފައިވާތީ އެކަމާއި މެދު މަޝްވަރާކުރުމަށް މަޖިލިސް މެދުކަނޑާލައިފިއެވެ.
މަޖިލީހުގެ ހޯމަ ދުވަހުގެ ޖަލްސާގެ ރިޔާސަތުގައި އިންނެވީ މަޖިލީހުގެ ރައީސް މުހައްމަދު އަސްލަމްއެވެ.
މަޖިލިސް ފެށުމާއި އެކު ތުޅާދޫ ދާއިރާގެ މެމްބަރު ހިސާން ހުސައިން ވަނީ ނިޒާމާއި ބެހޭ މައްސަލަ އެއް ނަންގަވާފައެވެ. އޭނާ އެ ނިޒާމީ ނުކުތާ ނެންގެވީ ހޯމަ ދުވަހުގެ އެޖެންޑާގައި ހިމަނާފައިވާ ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 129 ވަނަ މާއްދާގެ (ހ)ގެ ދަށުން ވަޒީރުންގެ މަޖިލީހަށް ރައީސުލްޖުމްހޫރިއްޔާ ޢައްޔަންކުރައްވާފައިވާ 22 ވަޒީރުންނަށް ރުހުންދިނުމުގެ މައްސަލަ ސަރުކާރުގެ މަސްއޫލިއްޔަތު އަދާކުރާ މިންވަރު ބަލާކޮމިޓީން ދިރާސާކޮށް ނިންމިގޮތުގެ ރިޕޯޓާއި ގުޅޭގޮތުންނެވެ.
އެ މައްސަލަ އެޖެންޑާގައި ހިމަނާފައި ވަނީ މަޖިލީހުގެ ޤަވާއިދުގެ 200ވަނަ މާއްދާގެ ވ އަދި ރ، ކ އަދި އގައި ބަޔާންކުރާ ހަމަތަކާއި ޚިލާފަށް ކަމަށް ހިސާން ވިދާޅުވިއެވެ. އަދި އެ މާއްދާތަކުގައިވާ ކަންކަން އެ މައްސަލައިގައި ފުރިހަމަ ނުވާތީ އެ ރިޕޯޓަށް ވޯޓަށް އެހިދާނެ ކަމަށް ޤަބޫލުނުކުރައްވާ ކަމަށް އޭނާ ވިދާޅުވިއެވެ. ވުޒާރާތަކުގެ މަސައްކަތްތައް މަޖިލީހަށް ހުށަހަޅާ ފާސްކުރަން ޖެހޭ ކަމަށް އޭނާ ވިދާޅުވިއެވެ. ހިސާން ވިދާޅުވީ ކޮމިޓީ އަށް މެންޑޭޓް ފޮނުވާފައި ނުވާތީ އެކަން ދިރާސާކުރެވިދާނެ ކަމަށް ޤަބޫލުނުކުރައްވާ ކަމަށެވެ. އަދި މެންޑޭޓް ދިރާސާނުކޮށް އެ ބޭފުޅުންނަށް ރުހުން ދެނީ އެ ބޭފުޅުން ކޮން މެންޑޭޓެއް ފުރިހަމަކުރަންތޯ އޭނާ ސުވާލު އުފެއްދެވިއެވެ. ހަމައެހެންމެ އެ ބޭފުޅުންނަށް ރުހުން ދެނީ ކޮންކަމެއްގެ ޤާބިލިއްޔަތުކަން ހުރެގެންކަން ނުވަތަ ނޫންކަން ވެސް ސާފު ނުވާ ކަމަށް އޭނާ ވަނީ ވިދާޅުވެފައެވެ.
އަދި މަޖިލީހުގެ ރުހުމަށް އެދި ފޮނުވާކަންކަމުގައި ކޮމިޓީން ރުހުން ދިނުމަށް ފެންނަކަމަށް ނުވަތަ ނުފެންނަކަމަށް ކަނޑައަޅަންވާނެ ކަމަށާއި އެކަން ކޮމިޓީ ރިޕޯޓްގައި ފާހަގަކޮށްފައި ނުވާ ކަމަށް ވެސް އޭނާ ވިދާޅުވިއެވެ. އެހެންކަމުން އެ ރިޕޯޓަށް ވޯޓަށް އެހޭނެކަމަށް ޤަބޫލުނުކުރާ ކަމަށް ހިސާން ވިދާޅުވިއެވެ.
ހިސާންގެ އެ ނިޒާމީ ނުކުތާ އާއި ގުޅިގެން މަޖިލީހުގެ ރައީސް އަސްލަމް މަޖިލިސް މެދުކަނޑާލެއްވީ މެޖޯރިޓީ ލީޑަރާއި މައިނޯރިޓީ ލީޑަރާއި މަޝްވަރާކުރެއްވުމަށެވެ. އަސްލަމް ވިދާޅުވީ އެ ރިޕޯޓަށް ވޯޓަށް އެހުމާއި މެދު ސުވާލު އުފެދިފައިވާތީ އެކަން ހައްލުކުރެވޭނީ މަޝްވަރާގެ މަތިން ކަމަށެވެ.
