ކުވައިތުގެ އަމީރު އަވަހާރަވުމުގެ ހިތާމައިގައި، ބައިދަނޑިއަށް ދިދަ ތިރިކުރުމަށް ނިންމަވައިފި
16 ޑިސެމްބަރު 2023 | ހޮނިހިރު 13:35އެމަނިކުފާނު އަވަހާރަވީއިރު އުމުރުފުޅަކީ 86 އަހަރު
ކުވައިތުގެ ޢަމީރު ޝައިޚް ނަވާފް އަލްއަޙްމަދު އަލްޖާބިރު އައްޞަބާޙް
ކުވައިތުގެ އަމީރު ޝައިޚް ނަވާފް އަލްއަޙްމަދު އަލްޖާބިރު އައްޞަބާޙް އަވަހާރަވުމުގެ ހިތާމައިގައި، ދިވެހި ގައުމީ ދިދަ ތިން ދުވަހަށް ބައިދަނޑިއަށް ތިރިކުރެއްވުމަށް ރައީސް ޑރ. މުޙައްމަދު މުޢިއްޒު ނިންމަވައިފިއެވެ.
ރައީސް އޮފީހުން ހޮނިހިރު ދުވަހު ނެރުނު ބަޔާނެއްގައި ބުނީ، ޝައިޚް ނަވާފް އަވަހާރަވުމާ ގުޅިގެން ރަސްމީކޮށް ހިތާމަފާޅުކުރުމަށް، އާދިއްތަ ދުވަހުން ފެށިގެން ތިން ދުވަހުގެ ނިޔަލަށް ގައުމީ ދިދަ ބައިދަނޑިއަށް ތިރިކުރެއްވުމަށް ރައީސް މުޢިއްޒު ނިންމަވާފައިވާ ކަމަށެވެ.
ކުވައިތުގެ އަމީރު އަވަހަރާވެފައިވަނީ ހޮނިހިރު ދުވަހުގެ ވަގުތެއްގައެވެ. އެމަނިކުފާނު އަވަހާރަވިއިރު އުމުރުފުޅަކީ 86 އަހަރެވެ.
ޝައިޚް ނަވާފް އަވަހާރަވިއިރު، މިދިޔަ ނޮވެމްބަރުން ފެށިގެން އެމަނިކުފާނު ގެންދެވީ ހޮސްޕިޓަލުގައި އާލާސްކަންފުޅަކަށް ފަރުވާ ހޯއްދަވަމުންނެވެ. އެ އާލާސްކަންފުޅުގެ ތަފްސީލެއް އެގައުމުގެ ސަރުކާރުން ހާމަކޮށްފައެއް ނުވެއެވެ.
ޝައިޚް ނަވާފް، ކުވައިތުގެ އަމީރުކަމުގެ ހުވާކުރެއްވީ 2020 ވަނަ އަހަރު، އޭރު އެގައުމުގެ އަމީރުގެ މަގާމުގައި ހުންނެވި ޝައިޚް ޞަބާޙް އަލްއަޙްމަދު އައްޞަބާޙް އަވަހާރަވުމާ ގުޅިގެންނެވެ.
އެމަނިކުފާނު އަވަހާރަވުމާ ގުޅިގެން ދެން ކުވައިތުގެ އަމީރަކަށް ވަޑައިގަންނަވާނީ އުމުރުފުޅުން 83 އަހަރުގެ ޝައިޚް މިޝްޢަލް އަލްއަޙްމަދު އަލްޖާބިރު އައްޞަބާޙެވެ.
