މިސަރުކާރަކީ ޑިމޮކްރަސީއާއި ވަރަށް ދުރުން މަސައްކަތް ކުރާ ސަރުކާރެއް ކަމަށާއި، އެމްޑީޕީގެ ޕްރައިމަރީ ބޭއްވުމަށް ސްކޫލުތަކުގެ ހޯލު ހޯދުމަށް ވެސް އުނދަގޫވެފައިވާ ކަމަށް އެޕާޓީން ބުނެފިއެވެ.
ހޮނިހިރު ދުވަހު ބޭއްވި ނޫސްވެރިންގެ ބައްދަލުވުމުގައި އެމްޑީޕީގެ ޑެޕިއުޓީ ޗެއާޕާސަން އިބްރާހިމް ވަހީދު (އިބުރޭ) ވިދާޅުވީ، ޕްރައިމަރީ ބޭއްވުމަށް މިހާރު ނިންމާފައި އޮތީ އަންނަ ޖެނުއަރީ މަހުގެ 26 އަދި 27 ގައި ކަމަށެވެ. އެއް ދާއިރާއަށް އެކަަކަށްވުރެ ގިނަ މީހުން ކުރިމަތިލާ ދާއިރާތަކަށް އަލިއަޅުވާލައްވާ އިބުރޭ ވިދާޅުވީ އެއީ އިދާރީ ގޮތުން އެންމެ ރަނގަޅަށް އެކަންކަން ގެންދިއުމަށް ކަމަށެވެ. ނަމަވެސް މިދެދުވަހު ޕްރައިމަރީ ބޭއްވިދާނެ ކަމާމެދު ސުވާލު އުފެދޭ ކަމަށް އިބުރޭ ވިދާޅުވިއެވެ.
އިބުރޭ ވިދާޅުވީ، ޕްރައިމަރީ ބާއްވަން ޖެހޭނަމަ ރަށްރަށުގެ ސްކޫލުތައް ބޭނުންވާނެ ކަމަށާއި، ނަމަވެސް އަދި ސަރުކާރުން އެކަމުގައި އެއްބާރުލުމެއް ދީފައިނުވާކަމަށެވެ. އެހެންކަމުން ޕްރައިމަރީގެ ތާރީޚަށް ބަދަލުއައުން އެކަށީގެންވާކަމަށްވެސް އޭނާ ވިދާޅުވިއެވެ.
އިބުރޭ ވިދާޅުވީ މިސަރުކާރަކީ ވަރަށް ޑިމޮކްރަސީއާއި ދުރު ސަރުކާރެއް ކަމަށާއި، ކުރީގެ ރައީސް އަބްދުﷲ ޔާމީންގެ ވެރިކަމުގައި ވެސް ޕްރައިމަރީ ބޭއްވުމަށް ސްކޫލުތަކުގެ ހޯލު ދޫކޮށްފައިވާ ކަމަށެވެ.
އެއީ އަޅުގަނޑުމެންނަށް އެދުވަހާއި ޕްރައިމަރީ ހިންގުމުގައި އިދާރީ ގޮތުން އެންމެ ފަސޭހަނުވެދާނެ ކަމަށް ބަލާފައި ދެބަޔަކަށް ބަހާލައިގެން ކުރިއަށް ގެންދަން ވިސްނާފައި އޮތީ. 26، 27 ކަމަށް އަޅުގަނޑު މިހެން ބުންޏަސް އަޅުގަނޑުމެންނަށް މިހާރު ފެންނަ ބައެއް ކަންތައްތަކަށް ބަލާއިރު އެދުވަހަށް ބަދަލު އަތުވެދާނެ. މިދެންނެވީ އަޅުގަނޑުމެންގެ މިހާރު މިއޮތް ސަރުކާރުން އަޅުގަނޑުމެންނަށް ސްކޫލުތައް ދޫކުރުމަށް މިހާރު މިއޮތީ ވަރަށް ޑިމޮކްރަސީއާއި ވަރަށް ދުރުގައި މަސައްކަތް ކުރާ ސަރުކާރެއް އަޅުގަނޑުމެންގެ މާލޭގެ މޭޔަރުގެ އިންތިޚާބަށް ނެރެނު ޕިކަޕު ވެސް ވަނީ ހުއްދަ ނެތް ކަމަށް ބުނެ ހުއްޓުވާފައި.އެމްޑީޕީގެ ޑެޕިއުޓީ ޗެއާޕާސަން އިބްރާހިމް ވަހީދު (އިބުރޭ)
2024 ވަނަ އަހަރު ބޭއްވުމަށް ހަމަޖެހިފައިވާ 20 ވަނަ ރައްޔިތުންގެ މަޖިލިސް އިންތިޚާބުގައި އެމްޑީޕީގެ ޓިކެޓްގައި ވާދަކުރަން ބޭނުންވާ އެމްޑީޕީގެ މެންބަރުންނަށް ފުރުސަތު ހުޅުވާލާފައިވާއިރު، މި ފުރުސަތު ހުޅުވާލާފައިވަނީ 16 ޑިސެމްބަރު 2023 ވާ ހޮނިހިރު ދުވަހުން ފެށިގެން 25 ޑިސެމްބަރު 2023 ވާ ހޯމަ ދުވަހުގެ ހަވީރު 04:00 އާ ހަމައަށެވެ.