ހިތެއް އޮތް ރައީސަކު މާލޭގެ ރައްޔިތުންނަށް މިހާރު ގޯތި ދީފައިވާ ތަންތަން ތަރައްގީ ނުކޮށް ފުށި ދިއްގަރުފަޅު ހިއްކުމުގެ މަސައްކަތް ކުރަން ނޫޅުއްވާނެ ކަމަށް މާލެ ސިޓީގެ މޭޔަރު ކަމަށް އެމްޑީޕީގެ ފަރާތުން ވާދަކުރައްވާ ކެންޑިޑޭޓް އާދަމް އާޒިމް ވިދާޅުވެއްޖެއެވެ.
"ރާއްޖެ އެމްވީ" އަށް ދެއްވި ހާއްސަ އިންޓަވިއުއެއްގައި އާޒިމް ވިދާޅުވީ މާލޭގެ ރައްޔިތުންނަށް ދިމާވެފައިވާ އެންމެ ބޮޑު ދަތިކަމަކީ އަދިވެސް ބޯހިޔާވަހިކަމުގެ ދަތިކަން ކަމަށެވެ. އެކަން ހައްލު ކުރުމަށް ނިމުނު އެމްޑީޕީ ސަރުކާރުގައި މާލޭގެ ރައްޔިތުންނަށް ގޯތި ދޫކޮށްފައިވާއިރު އެ ގޯތިތައް ދޫކުރުމަށް ހިއްކަމުން އަންނަ ފަޅުތައް އިތުރަށް ތަރައްގީ ކުރުމަކީ މުހިންމު ކަމެއް ކަމުގައި އޭނާ ވިދާޅުވިއެވެ.
މާލޭގެ މޭޔަރަކަށް ހޮވިވަޑައިގެންފި ނަމަ ސަރުކާރަށް ދޭން ޖެހޭ ހުރިހާ އެއްބާރުލުމެއް ދެއްވާނެ ކަމުގެ ޔަގީންކަން ދެއްވަމުން އާޒިމް ވިދާޅުވީ އިސްރާފު ކުރުމާ ދެކޮޅުހައްދަވާނެ ކަމަށެވެ. އެގޮތުން، މި ސަރުކާރުން ބޭނުންވާ ފުށިދިއްގަރު ފަޅު ހިއްކުމުގެ މަސައްކަތަކީ މިވަގުތައް މުހިންމު މަޝްރޫއެއްކަމުގައި ގަބޫލުނުކުރައްވާ ކަމަށާއި އެ ފައިސާ ޚަރަދު ކުރަންވީ ގޯތި ދޫކޮށްފައިވާ ތަންތަނުގައި އަސާސީ ޚިދުމަތްތައް ފޯރުކޮށްދިނުމަށް ކަމަށް އޭނާ ވިދާޅުވިއެވެ.
މީގެ އިތުރުން ފުށިދިއްގަރު ފަޅަކީ މާލެއާ ދުރު ސަރަހައްދަކަށްވާއިރު އެތަނުގައި މީހުންނަށް ދިރިއުޅެން ދަތިވާނެ ކަމަށާއި ރާއްޖޭގެ ވެރިކަން ކުރާ ބޭފުޅަކަށް ޤައުމުގެ ޖިއޯގްރަފީ އެނގެންވާނެ ކަމަށް ވެސް އާޒިމް ވިދާޅުވިއެވެ.
އެ ފައިސާ ހަރަދު ކުރަންވީ މިހާރު ގޯތިތައް ލިބިފައިވާ މީހުންނަށް އެ ގޯތިތަކަށް ދޭވެ ގޮތް ހަދައިދޭން. އެއީ ފެނާއި ނަރުދަމާ އާއި ކަރަންޓާއި މަގުތަކާއި މިސްކިތާއި ސްކޫލާއި ހެލްތު ޕޯސްޓް ހަދާފައި އެ ރައްޔިތުން ގެންދަންވީ. ގާތްގަނޑަކަށް 90 ޕަސެންޓް މީހުން އުޅެނީ ވަރަށް ހާލުގައި. ހިތެއް ހުރި ރައީސުލްޖޫމްހޫރިއްޔާއެއް ވެއްޖެއްޔާމުން މިތަންތަން ޑިވެލޮޕް ނުކޮށް ގޮސް، މިތަންތަނަށް މީހުންނަށް ދެވޭނެ ގޮތް އަވަހަށް ހަދައިނުދީގޮސް ފިށިދިްގަރު ފަޅު ހިއްކާކަށް ނޫޅޭނެއާދަމް އާޒިމް
ފުށިދިއްގަރު ފަޅު ތަަރައްގީ ކުރުމަކީ މި ސަރުކާރުގެ މުހިންމު ވައުދެކެވެ. އެ ވައުދު ފުއްދުމަށް އަންނަ އަހަރަށް ލަފާކުރާ ދައުލަތުގެ ބަޖެޓު މަޖިލީހަށް ހުށަހެޅި އިރު އެތަން ހިއްކަން 400 މިލިއަން ރުފިޔާ ހިމެނިއެވެ. ނަމަވެސް އެ ފައިސާ ހޯދާނެ ގޮތެއް ބަޖެޓުގައި ކަނޑައަޅާފައި ނެތުމުން، ކުރީ ސަރުކާރުން މާލޭގެ ރައްޔިތުންނަށް ބޯހިޔާވަހިކަން ހޯދައިދިނުމަށް ހިއްކަން ފަށާފައިވާ ގުޅިފަޅާއި ގިރާވަރުފަޅު އިތުރަށް ތަރައްގީ ކުރުމަށް އިސްކަން ދިނުމަށް މަޖިލީހުން ވަނީ ފުށިދިއްގަރު ފަޅުގެ ބަޖެޓު އުނިކޮށްފައެވެ. އެ ފައިސާ ބަޖެޓުން އުނި ކުރި ނަމަވެސް މަޝްރޫއުގެ މަސައްކަތް އަންނަ އަހަރު ފެށުމަށް ސަރުކާރުން އަންނަނީ ތައްޔާރުވަމުންނެވެ.
އާޒިމް ވަނީ ކުރީ ސަރުކާރުން މާލޭގެ ރައްޔިތުންނަށް ދީފައިވާ ގޯތި އެ ފަރާތްތަކަށް ހޯދައިދިނުމަށް މަސައްކަތް ކުރައްވާނެ ކަމުގެ ޔަގީންކަން ދެއްވާފައެވެ. އަދި އޭނާއަކީ 30 އަހަރުގެ ތަޖުރިބާއާއެކު ވަޑައިގަންވާ ބޭފުޅެއް ކަމަށާއި ހަވާލުވެވަޑައިގެންނެވި ކުންފުނިތަކާއެއްގޮތަށް މާލެ ސިޓީ ކައުސިލުގެ މޭޔަރު ކަމަށް ހޮވިވަޑައިގެންފިނަމަ މާލެއަށް ވެސް ބޮޑެތި ކުރިއެރުންތަކެއް ހޯއްދަވައިދެއްވާނެ ކަމުގެ ޔަގީންކަން އާޒިމް ދެއްވިއެވެ.
