ގެވެށި އަނިޔާގެ ކަންކަމާ ގުޅޭ ޓެކްނިކަލް ކޮމިޓީއަށް އަމިއްލަ ފަރާތެއް ނުވަތަ ޖަމިއްޔާތައް ތަމްސީލު ކުރާނެ ފަރާތެއް ހޯދަނީ

ގެވެށި އަނިޔާގެ ކަންކަމާ ގުޅޭ ޓެކްނިކަލް ކޮމިޓީގައި ބައިވެރިވާން ބޭނުންވާ އަމިއްލަ ފަރާތްތަކަށް ނުވަތަ މަދަނީ ޖަމިއްޔާތައް ތަމްސީލު ކުރާނެ ފަރާތްތަކަށް އެ ފުރުސަތު ހުޅުވާލައިފިއެވެ.

މި ކޮމިޓީއަކީ ގެވެށި އަނިޔާ ހުއްޓުވުމާބެހޭ އާންމު ގަވާއިދުގައި، ގެވެށި އަނިޔާގެ ކަންކަމާގުޅޭ ގޮތުން އެކުލަވާލުމަށް ބަޔާންކޮށްފައިވާ ކޮމިޓީއެކެވެ. މި ކޮމިޓީއަކީ ގެވެށި އަނިޔާގެ ޢަމަލުން މީހުން ސަލާމަތްކުރުމަށްޓަކައި ރާއްޖޭގައި މަސައްކަތް ކުރާ އެކިއެކި ދާއިރާގެ މީހުން ހިމެނޭގޮތަށް އެކުލަވައިލާ ފަންނީ ކޮމިޓީއެކެވެ.

ގަވާއިދުގެ ދަށުން އެކުލަވައިލާ ޓެކްނިކަލް ކޮމިޓީގައި ގެވެށި އަނިޔާއާ ދެކޮޅަށް މަސައްކަތްކުރާ އަދި ޚިދުމަތް ފޯރުކޮށްދޭ އަމިއްލަ ފަރާތްތައް ހިމެނުމަށް ބަޔާންކޮށްފައިެއެވެ. އެހެންވެ، އެ ކޮމިޓީގައި ބައިވެރިވުމަށް ޝައުގުވެރިވާ މަދަނީ ޖަމިއްޔާއަކަށް ނުވަތަ ގެވެށި އަނިޔާއާ ދެކޮޅަށް މަސައްކަތްކުރާ އަމިއްލަ ފަރާތަކަށް އެ ފުރުސަތު ފެމިލީ ޕްރޮޓެކްޝަން އޮތޯރިޓީން މިހާރު ވަނީ ހުޅުވާލައިފައެވެ.

މި ޓެކްނިކަލް ކޮމިޓީ އެކުލެވިފައިވަނީ 10 މެންބަރުންގެ މައްޗަށެވެ. އެއީ ފެމިލީ ޕްރޮޓެކްޝަން އޮތޯރިޓީ އާއި ޖެންޑަރ މިނިސްޓްރީ އާއި ހެލްތު މިނިސްޓްރީ އާއި ޕްރޮސެކިއުޓަރ ޖެނެރަލްގެ އޮފީހާއި ދިވެހި ފުލުހުންގެ ޚިދުމަތާއި ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަނާއި ލޯކަލް ގަވަރމަންޓް އޮތޯރިޓީ އާއި އައިޖީއެމްޗް އަދި ގެވެށި އަނިޔާގެ އަމަލުން މީހުން ސަލާމަތްކުރުމަށްޓަކައި ރާއްޖޭގައި ގެވެށި އަނިޔާއާ ދެކޮޅަށް މަސައްކަތް ކުރާ ޖަމިއްޔާތަކާއި ޚިދުމަތް ފޯރުކޮށްދޭ އަމިއްލަ ފަރާތްތަކުން ތަމްސީލު ކުރާ ދެ މެންބަރުންނެވެ.

ގެވެށި އަނިޔާގެ ކަންކަމާ ގުޅޭ ޓެކްނިކަލް ކޮމިޓީގެ މެންބަރުންގެ ދައުރަކީ ފަސް އަހަރު ދުވަހުއެވެ. މި ކޮމިޓީގެ މަސައްކަތްތަކުގެ ތެރޭގައި ގެވެށި އަނިޔާގެ ކަންކަމާ ގުޅޭ ސްޓިއަރިންގ ކޮމިޓީގެ ލަފަޔާއި ގެވެށި އަނިޔާގެ ކަންކަމާ ގުޅޭ ޓެކްނިކަލް ކޮމިޓީގެ މެންބަރުްގެ މަޝްވަރާއާއެކ ޚިދުމަތް ފޯރުކޮށްދިނުމާއި ޕްރޮހްތާމްތަކާއި ހަރަކާތްތައް ހިންގުމުގެ ކަންކަން ވަސީލަތްތައް ލިބިގެންވާ މިންވަރަށް ބަލައިގެން އެންމެ ފުރިހަމައަށް ރޭވުން ހިމެނެއެވެ. އަދި ގެވެށި އަނިޔާގެ އަމަލުން މީހުން ސަލާމަތް ކުރުމަށްޓަކައި އެކި ދާއިރާތަކަށް އަމާޒުކޮށް ހިންގަން ޖެހޭ ތަމްރީނު ޕްރޮގްރާމުތަކާއި ހޭލުންތެރިކުރުމުގެ ޕްރޮގްރާމްތައް ފަރުމާ ކުރުމާއި ގެވެށި އަނިޔާގެ އަމަލުން މީހުން ސަލާމަތްކުރުމައްޓަކައި ކުރާ މަސައްކަތްތައް އިތުރަށް ހަރުދަނާ ކުރުމަށް ކުރަން ޖެހޭ ކަންކަން ކުރުމަށް އެކި ދާއިރާތަކަށް ލަފާ ދިނުން ވެސް ހިމެނެއެވެ.

މި ކޮމިޓީގައި ބައިވެރިވުމަށް ޝައުގުވެރިވާ ފަރާތްތަކުން 2023 ޑިސެންބަރު 26 ވަނަ ދުވަހުގެ 13:30 ގެ ކުރިން ޕްރޮޕޯސަލް ހުށަހެޅުމަށް ވަނީ ފެމިލީ ޕްރޮޓެކްޝަން އޮތޯރިޓީން އެދެއެވެ.